Sri Gopala Stotram (Narada Krutam) pdf download – శ్రీ గోపాల స్తోత్రం (నారద కృతం)

శ్రీనారద ఉవాచ |
నవీననీరదశ్యామం నీలేందీవరలోచనం |
వల్లవీనందనం వందే కృష్ణం గోపాలరూపిణం || 1 ||
స్ఫురద్బర్హిదలోద్బద్ధనీలకుంచితమూర్ధజం |
కదంబకుసుమోద్బద్ధవనమాలావిభూషితం || 2 ||
గండమండలసంసర్గిచలత్కాంచనకుండలం |
స్థూలముక్తాఫలోదారహారోద్యోతితవక్షసం || 3 ||
హేమాంగదతులాకోటికిరీటోజ్జ్వలవిగ్రహం |
మందమారుతసంక్షోభవల్గితాంబరసంచయం || 4 ||
రుచిరౌష్ఠపుటన్యస్తవంశీమధురనిఃస్వనైః |
లసద్గోపాలికాచేతో మోహయంతం ముహుర్ముహుః || 5 ||
వల్లవీవదనాంభోజమధుపానమధువ్రతం |
క్షోభయంతం మనస్తాసాం సస్మరాపాంగవీక్షణైః || 6 ||
యౌవనోద్భిన్నదేహాభిః సంసక్తాభిః పరస్పరం |
విచిత్రాంబరభూషాభిర్గోపనారీభిరావృతం || 7 ||
ప్రభిన్నాంజనకాళిందీదలకేళికలోత్సుకం |
యోధయంతం క్వచిద్గోపాన్ వ్యాహరంతం గవాం గణం || 8 ||
కాళిందీజలసంసర్గిశీతలానిలసేవితే |
కదంబపాదపచ్ఛాయే స్థితం వృందావనే క్వచిత్ || 9 ||
రత్నభూధరసంలగ్నరత్నాసనపరిగ్రహం |
కల్పపాదపమధ్యస్థహేమమండపికాగతం || 10 ||
వసంతకుసుమామోదసురభీకృతదిఙ్ముఖే |
గోవర్ధనగిరౌ రంయే స్థితం రాసరసోత్సుకం || 11 ||
సవ్యహస్తతలన్యస్తగిరివర్యాతపత్రకం |
ఖండితాఖండలోన్ముక్తాముక్తాసారఘనాఘనం || 12 ||
వేణువాద్యమహోల్లాసకృతహుంకారనిఃస్వనైః |
సవత్సైరున్ముఖైః శశ్వద్గోకులైరభివీక్షితం || 13 ||
కృష్ణమేవానుగాయద్భిస్తచ్చేష్టావశవర్తిభిః |
దండపాశోద్ధృతకరైర్గోపాలైరుపశోభితం || 14 ||
నారదాద్యైర్మునిశ్రేష్ఠైర్వేదవేదాంగపారగైః |
ప్రీతిసుస్నిగ్ధయా వాచా స్తూయమానం పరాత్పరం || 15 ||
య ఏవం చింతయేద్దేవం భక్త్యా సంస్తౌతి మానవః |
త్రిసంధ్యం తస్య తుష్టోఽసౌ దదాతి వరమీప్సితం || 16 ||
రాజవల్లభతామేతి భవేత్సర్వజనప్రియః |
అచలాం శ్రియమాప్నోతి స వాగ్మీ జాయతే ధ్రువం || 17 ||
ఇతి శ్రీనారదపంచరాత్రే జ్ఞానామృతసారే శ్రీ గోపాల స్తోత్రం ||