శ్రీమాన్వేంకటనాథార్యః కవితార్కిక కేసరీ |
వేదాంతాచార్యవర్యో మే సన్నిధత్తాం సదా హృది ||
వందే బృందావనచరం వల్లవీజనవల్లభం |
జయంతీసంభవం ధామ వైజయంతీవిభూషణం || 1 ||
వాచం నిజాంకరసికాం ప్రసమీక్షమాణో
వక్త్రారవిందవినివేశితపాంచజన్యః |
వర్ణత్రికోణరుచిరే వరపుండరీకే
బద్ధాసనో జయతి వల్లవచక్రవర్తీ || 2 ||
ఆంనాయగంధిరుదితస్ఫురితాధరోష్ఠం
ఆస్రావిలేక్షణమనుక్షణమందహాసం |
గోపాలడింభవపుషం కుహనాజనన్యాః
ప్రాణస్తనంధయమవైమి పరం పుమాంసం || 3 ||
ఆవిర్భవత్వనిభృతాభరణం పురస్తాత్
ఆకుంచితైకచరణం నిభృతాన్యపాదం |
దధ్నా నిమంథముఖరేణ నిబద్ధతాళం
నాథస్య నందభవనే నవనీతనాట్యం || 4 ||
హర్తుం కుంభే వినిహితకరః స్వాదు హైయంగవీనం
దృష్ట్వా దామగ్రహణచటులాం మాతరం జాతరోషాం |
పాయాదీషత్ ప్రచలితపదో నాపగచ్ఛన్ న తిష్ఠన్
మిథ్యాగోపః సపది నయనే మీలయన్ విశ్వగోప్తా || 5 ||
వ్రజయోషిదపాంగవేధనీయం
మధురాభాగ్యమనన్యభోగ్యమీడే |
వసుదేవవధూస్తనంధయం తత్
కిమపి బ్రహ్మ కిశోరభావదృశ్యం || 6 ||
పరివర్తితకంధరం భయేన
స్మితఫుల్లాధరపల్లవం స్మరామి |
విటపిత్వనిరాసకం కయోశ్చిత్
విపులోలూఖలకర్షకం కుమారం || 7 ||
నికటేషు నిశామయామి నిత్యం
నిగమాంతైరధునాఽపి మృగ్యమాణం |
యమళార్జునదృష్టబాలకేళిం
యమునాసాక్షికయౌవనం యువానం || 8 ||
పదవీమదవీయసీం విముక్తేః
అటవీసంపదమంబువాహయంతీం |
అరుణాధరసాభిలాషవంశాం
కరుణాం కారణమానుషీం భజామి || 9 ||
అనిమేషనిషేవణీయమక్ష్ణోః
అజహద్యౌవనమావిరస్తు చిత్తే |
కలహాయితకుంతలం కలాపైః
కరుణోన్మాదకవిభ్రమం మహో మే || 10 ||
అనుయాయిమనోజ్ఞవంశనాళైః
అవతు స్పర్శితవల్లవీవిమోహైః |
అనఘస్మితశీతలైరసౌ మాం
అనుకంపాసరిదంబుజైరపాంగైః || 11 ||
అధరాహితచారువంశనాళాః
మకుటాలంబిమయూరపింఛమాలాః |
హరినీలశిలావిభంగనీలాః
ప్రతిభాః సంతు మమాంతిమప్రయాణే || 12 ||
అఖిలానవలోకయామి కాలాన్
మహిళాధీనభుజాంతరస్య యూనః |
అభిలాషపదం వ్రజాంగనానాం
అభిలాపక్రమదూరమాభిరూప్యం || 13 ||
హృది ముగ్ధశిఖండమండనో
లిఖితః కేన మమైష శిల్పినా |
మదనాతురవల్లవాంగనా-
-వదనాంభోజదివాకరో యువా || 14 ||
మహసే మహితాయ మౌళినా
వినతేనాంజలిమంజనత్విషే |
కలయామివిముగ్ధవల్లవీ-
-వలయాభాషితమంజువేణవే || 15 ||
జయతి లలితవృత్తిం శిక్షితో వల్లవీనాం
శిథిలవలయశింజాశీతలైర్హస్తతాళైః |
అఖిలభువనరక్షాగోపవేషస్య విష్ణోః
అధరమణిసుధాయామంశవాన్ వంశనాలః || 16 ||
చిత్రాకల్పః శ్రవసి కలయన్ లాంగలీకర్ణపూరం
బర్హోత్తంసస్ఫురితచికురో బంధుజీవం దధానః |
గుంజాబద్ధామురసి లలితాం ధారయన్ హారయష్టిం
గోపస్త్రీణాం జయతి కితవః కోఽపి కౌమారహారీ || 17 ||
లీలాయష్టిం కరకిసలయే దక్షిణే న్యస్య ధన్యాం
అంసే దేవ్యాః పులకరుచిరే సన్నివిష్టాన్యబాహుః |
మేఘశ్యామో జయతి లలితో మేఖలాదత్తవేణుః
గుంజాపీడస్ఫురితచికురో గోపకన్యాభుజంగః || 18 ||
ప్రత్యాలీఢస్థితిమధిగతాం ప్రాప్తగాఢాంకపాళిం
పశ్చాదీషన్మిళితనయనాం ప్రేయసీం ప్రేక్షమాణః |
భస్త్రాయంత్రప్రణిహితకరో భక్తజీవాతురవ్యాత్
వారిక్రీడానిబిడవసనో వల్లవీవల్లభో నః || 19 ||
వాసో హృత్వా దినకరసుతాసన్నిధౌ వల్లవీనాం
లీలాస్మేరో జయతి లలితామాస్థితః కుందశాఖాం |
సవ్రీడాభిస్తదను వసనే తాభిరభ్యర్థ్యమానే
కామీ కశ్చిత్ కరకమలయోరంజలిం యాచమానః || 20 ||
ఇత్యనన్యమనసా వినిర్మితాం
వేంకటేశకవినా స్తుతిం పఠన్ |
దివ్యవేణురసికం సమీక్షతే
దైవతం కిమపి యౌవతప్రియం || 21 ||
ఇతి శ్రీవేదాంతాదేశికాచార్య కృత శ్రీ గోపాల వింశతిః ||