వసంత చూతారుణ పల్లవాభం
ధ్వజాబ్జ వజ్రాంకుశ చక్రచిహ్నం |
వైఖానసాచార్యపదారవిందం
యోగీంద్రవంద్యం శరణం ప్రపద్యే || 1 ||
ప్రత్యుప్త గారుత్మత రత్నపాద
స్ఫురద్విచిత్రాసనసన్నివిష్టం |
వైఖానసాచార్యపదారవిందం
సింహాసనస్థం శరణం ప్రపద్యే || 2 ||
ప్రతప్తచామీకర నూపురాఢ్యం
కర్పూర కాశ్మీరజ పంకరక్తం |
వైఖానసాచార్యపదారవిందం
సదర్చితం తచ్చరణం ప్రపద్యే || 3 ||
సురేంద్రదిక్పాల కిరీటజుష్ట-
-రత్నాంశు నీరాజన శోభమానం |
వైఖానసాచార్యపదారవిందం
సురేంద్రవంద్యం శరణం ప్రపద్యే || 4 ||
ఇక్ష్వాకుమాంధాతృదిలీపముఖ్య-
-మహీశమౌళిస్థకిరీటజుష్టం |
వైఖానసాచార్యపదారవిందం
మహీశవంద్యం శరణం ప్రపద్యే || 5 ||
మరీచిముఖ్యైర్భృగుకశ్యపాత్రి-
-మునీంద్రవంద్యైరభిపూజితం తత్ |
వైఖానసాచార్యపదారవిందం
మునీంద్రవంద్యం శరణం ప్రపద్యే || 6 ||
అనేకముక్తామణివిద్రుమైశ్చ
వైఢూర్యహేంనాకృత పాదుకస్థం |
వైఖానసాచార్యపదారవిందం
తత్పాదుకస్థం శరణం ప్రపద్యే || 7 ||
దితేః సుతానాం కరపల్లవాభ్యాం
సంలాలితం తత్సురపుంగవానాం |
వైఖానసాచార్యపదారవిందం
సురారివంద్యం శరణం ప్రపద్యే || 8 ||
క్షేత్రాణి తీర్థాని వనాని భూమౌ
తీర్థాని కుర్వద్రజసోత్థితేన |
వైఖానసాచార్యపదారవిందం
సంచారితం తం శరణం ప్రపద్యే || 9 ||
దీనం భవాంభోధిగతం నృశంసం
వైఖానసాచార్య సురార్థనీయైః |
త్వత్పాదపద్మోత్థమరందవర్షై-
-ర్దోషాకరం మాం కృపయాఽభిషించ || 10 ||
వైఖానసాచార్యపదాంకితం యః
పఠేద్ధరేరర్చనయాగకాలే |
సుపుత్రపౌత్రాన్ లభతే చ కీర్తిం
ఆయుష్యమారోగ్యమలోలుపత్వం || 11 ||
ఏషామాసీదాది వైఖానసానాం
జన్మక్షేత్రే నైమిశారణ్యభూమిః |
దేవో యేషాం దేవకీ పుణ్యరాశిః
తేషాం పాదద్వంద్వపద్మం ప్రపద్యే || 12 ||
భవ్యాయ మౌనివర్యాయ పరిపూతాయ వాగ్మినే |
యోగప్రభా సమేతాయ శ్రీమద్విఖనసే నమః || 13 ||
లక్ష్మీవల్లభ సంకల్పవల్లభాయ మహాత్మనే |
శ్రీమద్విఖనసే భూయాత్ నిత్యశ్రీః నిత్యమంగళం || 14 ||
నారాయణం సకమలం సకలామరేంద్రం
వైఖానసం మమ గురుం నిగమాగమేంద్రం |
భృగ్వాత్రికశ్యపమరీచి ముఖాన్మునీంద్రాన్
సర్వానహం కులగురూన్ ప్రణమామి మూర్ధ్నా || 15 ||
ఇతి శ్రీ విఖనస పాదారవింద స్తోత్రం |