నారద ఉవాచ |
స్వామిన్ సర్వజగన్నాథ సంశయోఽస్తి మమ ప్రభో |
చతుఃషష్టికలాభిజ్ఞ పాతకాద్యోగవిద్వర || 1 ||
ముచ్యతే కేన పుణ్యేన బ్రహ్మరూపః కథం భవేత్ |
దేహశ్చ దేవతారూపో మంత్రరూపో విశేషతః || 2 ||
కర్మ తచ్ఛ్రోతుమిచ్ఛామి న్యాసం చ విధిపూర్వకం |
ఋషిశ్ఛందోఽధిదైవం చ ధ్యానం చ విధివద్విభో || 3 ||
శ్రీనారాయణ ఉవాచ |
అస్త్యేకం పరమం గుహ్యం గాయత్రీకవచం తథా |
పఠనాద్ధారణాన్మర్త్యః సర్వపాపైః ప్రముచ్యతే || 4 ||
సర్వాన్కామానవాప్నోతి దేవీరూపశ్చ జాయతే |
గాయత్రీకవచస్యాస్య బ్రహ్మవిష్ణుమహేశ్వరాః || 5 ||
ఋషయో ఋగ్యజుఃసామాథర్వశ్ఛందాంసి నారద |
బ్రహ్మరూపా దేవతోక్తా గాయత్రీ పరమా కలా || 6 ||
తద్బీజం భర్గ ఇత్యేషా శక్తిరుక్తా మనీషిభిః |
కీలకం చ ధియః ప్రోక్తం మోక్షార్థే వినియోజనం || 7 ||
చతుర్భిర్హృదయం ప్రోక్తం త్రిభిర్వర్ణైః శిరః స్మృతం |
చతుర్భిః స్యాచ్ఛిఖా పశ్చాత్ త్రిభిస్తు కవచం స్మృతం || 8 ||
చతుర్భిర్నేత్రముద్దిష్టం చతుర్భిః స్యాత్తదస్త్రకం |
అథ ధ్యానం ప్రవక్ష్యామి సాధకాభీష్టదాయకం || 9 ||
ముక్తావిద్రుమహేమనీలధవలచ్ఛాయైర్ముఖైస్త్రీక్షణై-
-ర్యుక్తామిందునిబద్ధరత్నముకుటాం తత్త్వార్థవర్ణాత్మికాం |
గాయత్రీం వరదాఽభయాంకుశకశాః శుభ్రం కపాలం గుణం
శంఖం చక్రమథారవిందయుగళం హస్తైర్వహంతీం భజే || 10 ||
గాయత్రీ పూర్వతః పాతు సావిత్రీ పాతు దక్షిణే |
బ్రహ్మసంధ్యా తు మే పశ్చాదుత్తరాయాం సరస్వతీ || 11 ||
పార్వతీ మే దిశం రక్షేత్పావకీం జలశాయినీ |
యాతుధానీ దిశం రక్షేద్యాతుధానభయంకరీ || 12 ||
పావమానీ దిశం రక్షేత్పవమానవిలాసినీ |
దిశం రౌద్రీం చ మే పాతు రుద్రాణీ రుద్రరూపిణీ || 13 ||
ఊర్ధ్వం బ్రహ్మాణి మే రక్షేదధస్తాద్వైష్ణవీ తథా |
ఏవం దశ దిశో రక్షేత్సర్వాంగం భువనేశ్వరీ || 14 ||
తత్పదం పాతు మే పాదౌ జంఘే మే సవితుః పదం |
వరేణ్యం కటిదేశే తు నాభిం భర్గస్తథైవ చ || 15 ||
దేవస్య మే తద్ధృదయం ధీమహీతి చ గల్లయోః |
ధియః పదం చ మే నేత్రే యః పదం మే లలాటకం || 16 ||
నః పాతు మే పదం మూర్ధ్ని శిఖాయాం మే ప్రచోదయాత్ |
తత్పదం పాతు మూర్ధానం సకారః పాతు భాలకం || 17 ||
చక్షుషీ తు వికారార్ణస్తుకారస్తు కపోలయోః |
నాసాపుటం వకారార్ణో రేకారస్తు ముఖే తథా || 18 ||
ణికార ఊర్ధ్వమోష్ఠం తు యకారస్త్వధరోష్ఠకం |
ఆస్యమధ్యే భకారార్ణో ర్గోకారశ్చుబుకే తథా || 19 ||
దేకారః కంఠదేశే తు వకారః స్కంధదేశకం |
స్యకారో దక్షిణం హస్తం ధీకారో వామహస్తకం || 20 ||
మకారో హృదయం రక్షేద్ధికార ఉదరే తథా |
ధికారో నాభిదేశే తు యోకారస్తు కటిం తథా || 21 ||
గుహ్యం రక్షతు యోకార ఊరూ ద్వౌ నః పదాక్షరం |
ప్రకారో జానునీ రక్షేచ్చోకారో జంఘదేశకం || 22 ||
దకారం గుల్ఫదేశే తు యకారః పదయుగ్మకం |
తకారవ్యంజనం చైవ సర్వాంగం మే సదాఽవతు || 23 ||
ఇదం తు కవచం దివ్యం బాధాశతవినాశనం |
చతుఃషష్టికళావిద్యాదాయకం మోక్షకారకం || 24 ||
ముచ్యతే సర్వపాపేభ్యః పరం బ్రహ్మాధిగచ్ఛతి |
పఠనాచ్ఛ్రవణాద్వాపి గోసహస్రఫలం లభేత్ || 25 ||
ఇతి శ్రీదేవీభాగవతే మహాపురాణే ద్వాదశస్కంధే శ్రీ గాయత్రీ మంత్రకవచం నామ తృతీయోఽధ్యాయః ||