శ్రీమన్వృషభశైలేశ వర్ధతాం విజయీ భవాన్ |
దివ్యం త్వదీయమైశ్వర్యం నిర్మర్యాదం విజృంభతాం || 1 ||
దేవీభూషాయుధైర్నిత్యైర్ముక్తైర్మోక్షైకలక్షణైః |
సత్త్వోత్తరైస్త్వదీయైశ్చ సంగః స్తాత్సరసస్తవ || 2 ||
ప్రాకారగోపురవరప్రాసాదమణిమంటపాః |
శాలిముద్గతిలాదీనాం శాలాః శైలకులోజ్జ్వలాః || 3 ||
రత్నకాంచనకౌశేయక్షౌమక్రముకశాలికాః |
శయ్యాగృహాణి పర్యంకవర్యాః స్థూలాసనాని చ || 4 ||
కనత్కనకభృంగారపతద్గ్రహకలాచికాః |
ఛత్రచామరముఖ్యాశ్చ సంతు నిత్యాః పరిచ్ఛదాః || 5 ||
అస్తు నిస్తులమవ్యగ్రం నిత్యమభ్యర్చనం తవ |
పక్షేపక్షే వివర్ధంతాం మాసిమాసి మహోత్సవాః || 6 ||
మణికాంచనచిత్రాణి భూషణాన్యంబరాణి చ |
కాశ్మీరసారకస్తూరీకర్పూరాద్యనులేపనం || 7 ||
కోమలాని చ దామాని కుసుమైః సౌరభోత్కరైః |
ధూపాః కర్పూరదీపాశ్చ సంతు సంతతమేవ తే || 8 ||
నృత్తగీతయుతం వాద్యం నిత్యమత్ర వివర్ధతాం |
శ్రోత్రేషు సుధాధారాః కల్పంతాం కాహలీస్వనాః || 9 ||
కందమూలఫలోదగ్రం కాలేకాలే చతుర్విధం |
సూపాపూపఘృతక్షీరశర్కరాసహితం హవిః || 10 ||
ఘనసారశిలోదగ్రైః క్రముకాష్టదళైః సహ |
విమలాని చ తాంబూలీదళాని స్వీకురు ప్రభో || 11 ||
ప్రీతిభీతియుతో భూయాద్భూయాన్ పరిజనస్తవ |
భక్తిమంతో భజంతు త్వాం పౌరా జానపదాస్తథా || 12 ||
ధరణీధనరత్నాని వితరంతు చిరం తవ |
కైంకర్యమఖిలం సర్వే కుర్వంతు క్షోణిపాలకాః || 13 ||
ప్రేమదిగ్ధదృశః స్వైరం ప్రేక్షమాణాస్త్వదాననం |
మహాంతః సంతతం సంతో మంగళాని ప్రయుంజతాం || 14 ||
ఏవమేవ భవేన్నిత్యం పాలయన్ కుశలీ భవాన్ |
మామహీరమణ శ్రీమాన్ వర్ధతామభివర్ధతాం || 15 ||
పత్యుః ప్రత్యహమిత్థం యః ప్రార్థయేత సముచ్ఛ్రయం |
ప్రసాదసుముఖః శ్రీమాన్ పశ్యత్యేనం పరః పుమాన్ || 16 ||