Sri Manasa Devi Stotram (Mahendra Krutam) 1 pdf download – శ్రీ మనసా దేవీ స్తోత్రం (మహేంద్ర కృతం) 1

దేవి త్వాం స్తోతుమిచ్ఛామి సాధ్వీనాం ప్రవరాం పరాం |
పరాత్పరాం చ పరమాం న హి స్తోతుం క్షమోఽధునా || 1 ||
స్తోత్రాణాం లక్షణం వేదే స్వభావాఖ్యానతః పరం |
న క్షమః ప్రకృతిం వక్తుం గుణానాం తవ సువ్రతే || 2 ||
శుద్ధసత్త్వస్వరూపా త్వం కోపహింసావివర్జితా |
న చ శప్తో మునిస్తేన త్యక్తయా చ త్వయా యతః || 3 ||
త్వం మయా పూజితా సాధ్వీ జననీ చ యథాఽదితిః |
దయారూపా చ భగినీ క్షమారూపా యథా ప్రసూః || 4 ||
త్వయా మే రక్షితాః ప్రాణా పుత్రదారాః సురేశ్వరి |
అహం కరోమి త్వాం పూజ్యాం మమ ప్రీతిశ్చ వర్ధతే || 5 ||
నిత్యం యద్యపి పూజ్యా త్వం భవేఽత్ర జగదంబికే |
తథాపి తవ పూజాం వై వర్ధయామి పునః పునః || 6 ||
యే త్వామాషాఢసంక్రాంత్యాం పూజయిష్యంతి భక్తితః |
పంచంయాం మనసాఖ్యాయాం మాసాంతే వా దినే దినే || 7 ||
పుత్రపౌత్రాదయస్తేషాం వర్ధంతే చ ధనాని చ |
యశస్వినః కీర్తిమంతో విద్యావంతో గుణాన్వితాః || 8 ||
యే త్వాం న పూజయిష్యంతి నిందంత్యజ్ఞానతో జనాః |
లక్ష్మీహీనా భవిష్యంతి తేషాం నాగభయం సదా || 9 ||
త్వం స్వర్గలక్ష్మీః స్వర్గే చ వైకుంఠే కమలాకలా |
నారాయణాంశో భగవాన్ జరత్కారుర్మునీశ్వరః || 10 ||
తపసా తేజసా త్వాం చ మనసా ససృజే పితా |
అస్మాకం రక్షణాయైవ తేన త్వం మనసాభిధా || 11 ||
మనసా దేవి తు శక్తా చాత్మనా సిద్ధయోగినీ |
తేన త్వం మనసాదేవీ పూజితా వందితా భవే || 12 ||
యాం భక్త్యా మనసా దేవాః పూజయంత్యనిశం భృశం |
తేన త్వాం మనసాదేవీం ప్రవదంతి పురావిదః || 13 ||
సత్త్వరూపా చ దేవీ త్వం శశ్వత్సత్త్వనిషేవయా |
యో హి యద్భావయేన్నిత్యం శతం ప్రాప్నోతి తత్సమం || 14 ||
ఇదం స్తోత్రం పుణ్యబీజం తాం సంపూజ్య చ యః పఠేత్ |
తస్య నాగభయం నాస్తి తస్య వంశోద్భవస్య చ || 15 ||
విషం భవేత్సుధాతుల్యం సిద్ధస్తోత్రం యదా పఠేత్ |
పంచలక్షజపేనైవ సిద్ధస్తోత్రో భవేన్నరః |
సర్పశాయీ భవేత్సోఽపి నిశ్చితం సర్పవాహనః || 16 ||
ఇతి శ్రీబ్రహ్మవైవర్తే మహాపురాణే ప్రకృతిఖండే షట్చత్వారింశోఽధ్యాయే మహేంద్ర కృత శ్రీ మనసాదేవీ స్తోత్రం ||