Sri Kamakala Kali Bhujanga Prayata Stotram pdf download – శ్రీ కామకళాకాళీ భుజంగ ప్రయాత స్తోత్రం

మహాకాల ఉవాచ |
అథ వక్ష్యే మహేశాని దేవ్యాః స్తోత్రమనుత్తమం |
యస్య స్మరణమాత్రేణ విఘ్నా యాంతి పరాఙ్ముఖాః || 1 ||
విజేతుం ప్రతస్థే యదా కాలకస్యా-
-సురాన్ రావణో ముంజమాలిప్రవర్హాన్ |
తదా కామకాళీం స తుష్టావ వాగ్భి-
-ర్జిగీషుర్మృధే బాహువీర్యేణ సర్వాన్ || 2 ||
మహావర్తభీమాసృగబ్ధ్యుత్థవీచీ-
-పరిక్షాళితా శ్రాంతకంథశ్మశానే |
చితిప్రజ్వలద్వహ్నికీలాజటాలే-
-శివాకారశావాసనే సన్నిషణ్ణాం || 3 ||
మహాభైరవీయోగినీడాకినీభిః
కరాళాభిరాపాదలంబత్కచాభిః |
భ్రమంతీభిరాపీయ మద్యామిషాస్రా-
-న్యజస్రం సమం సంచరంతీం హసంతీం || 4 ||
మహాకల్పకాలాంతకాదంబినీత్విట్-
పరిస్పర్ధిదేహద్యుతిం ఘోరనాదాం |
స్ఫురద్ద్వాదశాదిత్యకాలాగ్నిరుద్ర-
-జ్వలద్విద్యుదోఘప్రభాదుర్నిరీక్ష్యాం || 5 ||
లసన్నీలపాషాణనిర్మాణవేది-
-ప్రభశ్రోణివింబాం చలత్పీవరోరుం |
సముత్తుంగపీనాయతోరోజకుంభాం
కటిగ్రంథితద్వీపికృత్యుత్తరీయాం || 6 ||
స్రవద్రక్తవల్గన్నృముండావనద్ధా-
-సృగావద్ధనక్షత్రమాలైకహారాం |
మృతబ్రహ్మకుల్యోపక్లుప్తాంగభూషాం
మహాట్టాట్టహాసైర్జగత్త్రాసయంతీం || 7 ||
నిపీతాననాంతామితోద్వృత్తరక్తో-
-చ్ఛలద్ధారయా స్నాపితోరోజయుగ్మాం |
మహాదీర్ఘదంష్ట్రాయుగన్యంచదంచ-
-ల్లలల్లేలిహానోగ్రజిహ్వాగ్రభాగాం || 8 ||
చలత్పాదపద్మద్వయాలంబిముక్త-
-ప్రకంపాలిసుస్నిగ్ధసంభుగ్నకేశాం |
పదన్యాససంభారభీతాహిరాజా-
-ననోద్గచ్ఛదాత్మస్తుతివ్యస్తకర్ణాం || 9 ||
మహాభీషణాం ఘోరవింశార్ధవక్త్రై-
-స్తథాసప్తవింశాన్వితైర్లోచనైశ్చ |
పురోదక్షవామే ద్వినేత్రోజ్జ్వలాభ్యాం
తథాన్యాననే త్రిత్రినేత్రాభిరామాం || 10 ||
లసద్ద్వీపిహర్యక్షఫేరుప్లవంగ-
-క్రమేలర్క్షతార్క్షద్విపగ్రాహవాహైః |
ముఖైరీదృశాకారితైర్భ్రాజమానాం
మహాపింగళోద్యజ్జటాజూటభారాం || 11 ||
భుజైః సప్తవింశాంకితైర్వామభాగే
యుతాం దక్షిణే చాపి తావద్భిరేవ |
క్రమాద్రత్నమాలాం కపాలం చ శుష్కం
తతశ్చర్మపాశం సుదీర్ఘం దధానాం || 12 ||
తతః శక్తిఖట్వాంగముండం భుశుండీం
ధనుశ్చక్రఘంటాశిశుప్రేతశైలాన్ |
తతో నారకంకాలబభ్రూరగోన్మా-
-దవంశీం తథా ముద్గరం వహ్నికుండం || 13 ||
అధో డంమరుం పారిఘం భిందిపాలం
తథా మౌశలం పట్టిశం ప్రాశమేవం |
శతఘ్నీం శివాపోతకం చాథ దక్షే
మహారత్నమాలాం తథా కర్తృఖడ్గౌ || 14 ||
చలత్తర్జనీమంకుశం దండముగ్రం
లసద్రత్నకుంభం త్రిశూలం తథైవ |
శరాన్ పాశుపత్యాంస్తథా పంచ కుంతం
పునః పారిజాతం ఛురీం తోమరం చ || 15 ||
ప్రసూనస్రజం డిండిమం గృధ్రరాజం
తతః కోరకం మాంసఖండం శ్రువం చ |
ఫలం బీజపూరాహ్వయం చైవ సూచీం
తథా పర్శుమేవం గదాం యష్టిముగ్రాం || 16 ||
తతో వజ్రముష్టిం కుణప్పం సుఘోరం
తథా లాలనం ధారయంతీం భుజైస్తైః |
జవాపుష్పరోచిష్ఫణీంద్రోపక్లుప్త-
-క్వణన్నూపురద్వంద్వసక్తాంఘ్రిపద్మాం || 17 ||
మహాపీతకుంభీనసావద్ధనద్ధ
స్ఫురత్సర్వహస్తోజ్జ్వలత్కంకణాం చ |
మహాపాటలద్యోతిదర్వీకరేంద్రా-
-వసక్తాంగదవ్యూహసంశోభమానాం || 18 ||
మహాధూసరత్త్విడ్భుజంగేంద్రక్లుప్త-
-స్ఫురచ్చారుకాటేయసూత్రాభిరామాం |
చలత్పాండురాహీంద్రయజ్ఞోపవీత-
-త్విడుద్భాసివక్షఃస్థలోద్యత్కపాటాం || 19 ||
పిషంగోరగేంద్రావనద్ధావశోభా-
-మహామోహబీజాంగసంశోభిదేహాం |
మహాచిత్రితాశీవిషేంద్రోపక్లుప్త-
-స్ఫురచ్చారుతాటంకవిద్యోతికర్ణాం || 20 ||
వలక్షాహిరాజావనద్ధోర్ధ్వభాసి-
-స్ఫురత్పింగళోద్యజ్జటాజూటభారాం |
మహాశోణభోగీంద్రనిస్యూతమూండో-
-ల్లసత్కింకణీజాలసంశోభిమధ్యాం || 21 ||
సదా సంస్మరామీదృశోం కామకాళీం
జయేయం సురాణాం హిరణ్యోద్భవానాం |
స్మరేయుర్హి యేఽన్యేఽపి తే వై జయేయు-
-ర్విపక్షాన్మృధే నాత్ర సందేహలేశః || 22 ||
పఠిష్యంతి యే మత్కృతం స్తోత్రరాజం
ముదా పూజయిత్వా సదా కామకాళీం |
న శోకో న పాపం న వా దుఃఖదైన్యం
న మృత్యుర్న రోగో న భీతిర్న చాపత్ || 23 ||
ధనం దీర్ఘమాయుః సుఖం బుద్ధిరోజో
యశః శర్మభోగాః స్త్రియః సూనవశ్చ |
శ్రియో మంగళం బుద్ధిరుత్సాహ ఆజ్ఞా
లయః సర్వ విద్యా భవేన్ముక్తిరంతే || 24 ||
ఇతి శ్రీ మహాకాలసంహితాయాం దశమ పటలే రావణ కృత శ్రీ కామకళాకాళీ భుజంగ ప్రయాత స్తోత్రం ||