శ్రీవల్లభసోదరీ శ్రితజనశ్చిద్దాయినీ శ్రీమతీ
శ్రీకంఠార్ధశరీరగా శ్రుతిలసన్మాణిక్యతాటంకకా |
శ్రీచక్రాంతరవాసినీ శ్రుతిశిరః సిద్ధాంతమార్గప్రియా
శ్రీవాణీ గిరిజాత్మికా భగవతీ శాకంభరీ పాతు మాం || 1 ||
శాంతా శారదచంద్రసుందరముఖీ శాల్యన్నభోజ్యప్రియా
శాకైః పాలితవిష్టపా శతదృశా శాకోల్లసద్విగ్రహా |
శ్యామాంగీ శరణాగతార్తిశమనీ శక్రాదిభిః సంస్తుతా
శంకర్యష్టఫలప్రదా భగవతీ శాకంభరీ పాతు మాం || 2 ||
కంజాక్షీ కలశీ భవాదివినుతా కాత్యాయనీ కామదా
కల్యాణీ కమలాలయా కరకృతాంభోజాసిఖేటాభయా |
కాదంవాసవమోదినీ కుచలసత్కాశ్మీరజాలేపనా
కస్తూరీతిలకాంచితా భగవతీ శాకంభరీ పాతు మాం || 3 ||
భక్తానందవిధాయినీ భవభయప్రధ్వంసినీ భైరవీ
భస్మాలంకృతిభాసురా భువనభీకృద్దుర్గదర్పాపహా |
భూభృన్నాయకనందినీ భువనసూర్భాస్వత్పరః కోటిభా
భౌమానందవిహారిణీ భగవతీ శాకంభరీ పాతు మాం || 4 ||
రీతాంనాయశిఖాసు రక్తదశనా రాజీవపత్రేక్షణా
రాకారాజకరావదాతహసితా రాకేందుబింబస్థితా |
రుద్రాణీ రజనీకరార్భకలసన్మౌలీ రజోరుపిణీ
రక్షః శిక్షణదీక్షితా భగవతీ శాకంభరీ పాతు మాం || 5 ||
శ్లోకానామిహ పంచకం పఠతి యః స్తోత్రాత్మకం శర్మదం
సర్వాపత్తివినాశకం ప్రతిదినం భక్త్యా త్రిసంధ్యం నరః |
ఆయుఃపూర్ణమపారమర్థమమలాం కీర్తిం ప్రజామక్షయాం
శాకంభర్యనుకంపయా స లభతే విద్యాం చ విశ్వార్థకాం || 6 ||
ఇతి శ్రీమచ్ఛంకరాచార్యవిరచితం శాకంభరీ పంచకం ||