భవభయాపహం భారతీపతిం
భజకసౌఖ్యదం భానుదీధితిం |
భువనసుందరం భూతిదం హరిం
భజత సజ్జనా మారుతాత్మజం || 1 ||
అమితవిక్రమం హ్యంజనాసుతం
భయవినాశనం త్వబ్జలోచనం |
అసురఘాతినం హ్యబ్ధిలంఘినం
భజత సజ్జనా మారుతాత్మజం || 2 ||
పరభయంకరం పాండునందనం
పతితపావనం పాపహారిణం |
పరమసుందరం పంకజాననం
భజత సజ్జనా మారుతాత్మజం || 3 ||
కలివినాశకం కౌరవాంతకం
కలుషసంహరం కామితప్రదం |
కురుకులోద్భవం కుంభిణీపతిం
భజత సజ్జనా మారుతాత్మజం || 4 ||
మతవివర్ధనం మాయిమర్దనం
మణివిభంజనం మధ్వనామకం |
మహితసన్మతిం మానదాయకం
భజత సజ్జనా మారుతాత్మజం || 5 ||
ద్విజకులోద్భవం దివ్యవిగ్రహం
దితిజహారిణం దీనరక్షకం |
దినకరప్రభం దివ్యమానసం
భజత సజ్జనా మారుతాత్మజం || 6 ||
కపికులోద్భవం కేసరీసుతం
భరతపంకజం భీమనామకం |
విబుధవందితం విప్రవంశజం
భజత సజ్జనా మారుతాత్మజం || 7 ||
పఠతి యః పుమాన్ పాపనాశకం
పవనజాష్టకం పుణ్యవర్ధనం |
పరమసౌఖ్యదం జ్ఞానముత్తమం
భువి సునిర్మలం యాతి సంపదం || 8 ||