Kenopanishad pdf download – కేనోపనిషత్

|| శాన్తి పాఠః ||
ఓం ఆప్యాయన్తు మమాఙ్గాని వాక్ప్రాణశ్చక్షుః శ్రోత్రమథో బలమిన్ద్రియాణి చ సర్వాణి | సర్వం బ్రహ్మౌపనిషదం మాఽహం బ్రహ్మ నిరాకుర్యాం మా మా బ్రహ్మ
నిరాకరోదనిరాకరణమస్త్వనిరాకరణం మేఽస్తు | తదాత్మని నిరతే య ఉపనిషత్సు ధర్మాస్తే మయి సన్తు తే మయి సన్తు |
ఓం శాన్తిః శాన్తిః శాన్తిః ||
ఓం కేనేషితం పతతి ప్రేషితం మనః
కేన ప్రాణః ప్రథమః ప్రైతి యుక్తః |
కేనేషితాం వాచమిమాం వదన్తి
చక్షుః శ్రోత్రం క ఉ దేవో యునక్తి || 1 ||
శ్రోత్రస్య శ్రోత్రం మనసో మనో య-
-ద్వాచో హ వాచం స ఉ ప్రాణస్య ప్రాణః |
చక్షుషశ్చక్షురతిముచ్య ధీరాః
ప్రేత్యాస్మాల్లోకాదమృతా భవన్తి || 2 ||
న తత్ర చక్షుర్గచ్ఛతి న వాగ్గచ్ఛతి నో మనో న విద్మో న విజానీమో యథైతదనుశిష్యాదన్యదేవ తద్విదితాదథో అవిదితాదధి |
ఇతి శుశ్రుమ పూర్వేషాం యే నస్తద్వ్యాచచక్షిరే || 3 ||
యద్వాచాఽనభ్యుదితం యేన వాగభ్యుద్యతే |
తదేవ బ్రహ్మ త్వం విద్ధి నేదం యదిదముపాసతే || 4 ||
యన్మనసా న మనుతే యేనాహుర్మనో మతం |
తదేవ బ్రహ్మ త్వం విద్ధి నేదం యదిదముపాసతే || 5 ||
యచ్చక్షుషా న పశ్యతి యేన చక్షూగ్ంషి పశ్యతి |
తదేవ బ్రహ్మ త్వం విద్ధి నేదం యదిదముపాసతే || 6 ||
యచ్ఛ్రోత్రేణ న శృణోతి యేన శ్రోత్రమిదగ్ం శ్రుతం |
తదేవ బ్రహ్మ త్వం విద్ధి నేదం యదిదముపాసతే || 7 ||
యత్ప్రాణేన న ప్రాణితి యేన ప్రాణః ప్రణీయతే |
తదేవ బ్రహ్మ త్వం విద్ధి నేదం యదిదముపాసతే || 8 ||
యది మన్యసే సువేదేతి దభ్రమేవాపి
నూనం త్వం వేత్థ బ్రహ్మణో రూపం |
యదస్య త్వం యదస్య దేవేష్వథ ను
మీమాంస్యమేవ తే మన్యే విదితం || 1 ||
నాహం మన్యే సువేదేతి నో న వేదేతి వేద చ |
యో నస్తద్వేద తద్వేద నో న వేదేతి వేద చ || 2 ||
యస్యామతం తస్య మతం మతం యస్య న వేద సః |
అవిజ్ఞాతం విజానతాం విజ్ఞాతమవిజానతాం || 3 ||
ప్రతిబోధవిదితం మతమమృతత్వం హి విన్దతే |
ఆత్మనా విన్దతే వీర్యం విద్యయా విన్దతేఽమృతం || 4 ||
ఇహ చేదవేదీదథ సత్యమస్తి
న చేదిహావేదీన్మహతీ వినష్టిః |
భూతేషు భూతేషు విచిత్య ధీరాః
ప్రేత్యాస్మాల్లోకాదమృతా భవన్తి || 5 ||
బ్రహ్మ హ దేవేభ్యో విజిగ్యే తస్య హ బ్రహ్మణో
విజయే దేవా అమహీయన్త || 1 ||
త ఐక్షన్తాస్మాకమేవాయం విజయోఽస్మాకమేవాయం మహిమేతి |
తద్ధైషాం విజజ్ఞౌ తేభ్యో హ ప్రాదుర్బభూవ తన్న వ్యజానత
కిమిదం యక్షమితి || 2 ||
తేఽగ్నిమబ్రువఞ్జాతవేద ఏతద్విజానీహి
కిమేతద్యక్షమితి తథేతి || 3 ||
తదభ్యద్రవత్తమభ్యవదత్కోఽసీత్యగ్నిర్వా
అహమస్మీత్యబ్రవీజ్జాతవేదా వా అహమస్మీతి || 4 ||
తస్మింస్త్వయి కిం వీర్యమిత్యపీదగ్ం సర్వం
దహేయం యదిదం పృథివ్యామితి || 5 ||
తస్మై తృణం నిదధావేతద్దహేతి |
తదుపప్రేయాయ సర్వజవేన తన్న శశాక దగ్ధుం స తత ఏవ
నివవృతే నైతదశకం విజ్ఞాతుం యదేతద్యక్షమితి || 6 ||
అథ వాయుమబ్రువన్వాయవేతద్విజానీహి
కిమేతద్యక్షమితి తథేతి || 7 ||
తదభ్యద్రవత్తమభ్యవదత్కోఽసీతి వాయుర్వా
అహమస్మీత్యబ్రవీన్మాతరిశ్వా వా అహమస్మీతి || 8 ||
తస్మింస్త్వయి కిం వీర్యమిత్యపీదగ్ం
సర్వమాదదీయ యదిదం పృథివ్యామితి || 9 ||
తస్మై తృణం నిదధావేతదాదత్స్వేతి
తదుపప్రేయాయ సర్వజవేన తన్న శశాకాదాతుం స తత ఏవ
నివవృతే నైతదశకం విజ్ఞాతుం యదేతద్యక్షమితి || 10 ||
అథేన్ద్రమబ్రువన్మఘవన్నేతద్విజానీహి కిమేతద్యక్షమితి తథేతి
తదభ్యద్రవత్తస్మాత్తిరోదధే || 11 ||
స తస్మిన్నేవాకాశే స్త్రియమాజగామ బహుశోభమానాముమాగ్ం
హైమవతీం తాగ్ం హోవాచ కిమేతద్యక్షమితి || 12 ||
|| చతుర్థః ఖణ్డః ||
సా బ్రహ్మేతి హోవాచ బ్రహ్మణో వా ఏతద్విజయే మహీయధ్వమితి
తతో హైవ విదాంచకార బ్రహ్మేతి || 1 ||
తస్మాద్వా ఏతే దేవా అతితరామివాన్యాన్దేవాన్యదగ్నిర్వాయురిన్ద్రస్తేన
హ్యేనన్నేదిష్ఠం పస్పృశుస్తే హ్యేనత్ప్రథమో విదాంచకార బ్రహ్మేతి || 2 ||
తస్మాద్వా ఇన్ద్రోఽతితరామివాన్యాన్దేవాన్స హ్యేనన్నేదిష్ఠం పస్పర్శ స హ్యేనత్ప్రథమో విదాంచకార బ్రహ్మేతి || 3 ||
తస్యైష ఆదేశో యదేతద్విద్యుతో వ్యద్యుతదా 3
ఇతీన్న్యమీమిషదా 3 ఇత్యధిదైవతం || 4 ||
అథాధ్యాత్మం యదేతద్గచ్ఛతీవ చ మనోఽనేన
చైతదుపస్మరత్యభీక్ష్ణగ్ం సఙ్కల్పః || 5 ||
తద్ధ తద్వనం నామ తద్వనమిత్యుపాసితవ్యం స య ఏతదేవం వేదాభి
హైనగ్ం సర్వాణి భూతాని సంవాఞ్ఛన్తి || 6 ||
ఉపనిషదం భో బ్రూహీత్యుక్తా త ఉపనిషద్బ్రాహ్మీం వావ త ఉపనిషదమబ్రూమేతి || 7 ||
తసై తపో దమః కర్మేతి ప్రతిష్ఠా వేదాః సర్వాఙ్గాని సత్యమాయతనం || 8 ||
యో వా ఏతామేవం వేదాపహత్య పాప్మానమనన్తే స్వర్గే లోకే జ్యేయే ప్రతితిష్ఠతి ప్రతితిష్ఠతి || 9 ||
|| శాన్తి పాఠః ||
ఓం ఆప్యాయన్తు మమాఙ్గాని వాక్ప్రాణశ్చక్షుః శ్రోత్రమథో బలమిన్ద్రియాణి చ సర్వాణి | సర్వం బ్రహ్మౌపనిషదం మాఽహం బ్రహ్మ నిరాకుర్యాం మా మా బ్రహ్మ
నిరాకరోదనిరాకరణమస్త్వనిరాకరణం మేఽస్తు | తదాత్మని నిరతే య ఉపనిషత్సు ధర్మాస్తే మయి సన్తు తే మయి సన్తు |
ఓం శాన్తిః శాన్తిః శాన్తిః ||