ఓం పూర్ణమదః పూర్ణమిదం పూర్ణాత్ పూర్ణముదచ్యతే | పూర్ణస్య పూర్ణమాదాయ పూర్ణమేవావశిష్యతే | ఓం శాన్తిః శాన్తిః శాన్తిః ||
బృహస్పతిరువాచ యాజ్ఞవల్క్యం | యదను కురుక్షేత్రం దేవానాం దేవయజనం సర్వేషాం భూతానాం బ్రహ్మసదనం | అవిముక్తం వై కురుక్షేత్రం దేవానాం దేవయజనం సర్వేషాం భూతానాం బ్రహ్మసదనం | తస్మాద్యత్ర క్వచన గచ్ఛతి తదేవ మన్యేతేతి | ఇదం వై కురుక్షేత్రం దేవానాం దేవయజనం సర్వేషాం భూతానాం బ్రహ్మసదనం | అత్ర హి జన్తోః ప్రాణేషూత్క్రమమాణేషు రుద్రస్తారకం బ్రహ్మ వ్యాచష్టే యేనాసావమృతీ భూత్వా మోక్షీ భవతి | తస్మాదవిముక్తమేవ నిషేవేతావిముక్తం న విముఞ్చేత్ | ఏవమేవైతద్యాజ్ఞవల్క్య ఏవమేవైతద్భగవన్ ఇతి వై యాజ్ఞవల్క్యేతి || 1 ||
అథ హైనమత్రిః పప్రచ్ఛ యాజ్ఞవల్క్యం | య ఏషోఽనన్తోఽవ్యక్త ఆత్మా తం కథమహం విజానీయామితి | స హోవాచ యాజ్ఞవల్క్యః | సోఽవిముక్త ఉపాస్యో య ఏషోఽనన్తోఽవ్యక్త ఆత్మా సోఽవిముక్తే ప్రతిష్ఠిత ఇతి || 1 ||
సోఽవిముక్తః కస్మిన్ప్రతిష్ఠిత ఇతి | వరణాయాం నాస్యాం చ మధ్యే ప్రతిష్ఠిత ఇతి | కా వై వరణా కా చ నాశీతి | సర్వానిన్ద్రియకృతాన్దోషాన్వారయతీతి తేన వరణా భవతి | సర్వానిన్ద్రియకృతాన్ పాపాన్ నాశయతీతి తేన నాసీ భవతీతి | కతమచ్చాస్య స్థానం భవతీతి | భ్రువోర్ఘ్రాణస్య చ యః సన్ధిః స ఏష ద్యౌర్లోకస్య పరస్య చ సన్ధిర్భవతీతి | ఏతద్వై సన్ధిం సన్ధ్యాం బ్రహ్మవిద ఉపాసత ఇతి | సోఽవిముక్త ఉపాస్య ఇతి | సోఽవిముక్తం జ్ఞానమాచష్టే | యో వై తదేవం వేదేతి || 2 ||
అథ హైనం బ్రహ్మచారిణ ఊచుః | కిం జప్యేనామృతత్వం బ్రూహీతి | స హోవాచ యాజ్ఞవల్క్యః | శతరుద్రీయేణేతి | ఏతాన్యేవ హ వా అమృతస్య నామధేయాని | ఏతైర్హ వా అమృతో భవతీతి ఏవమేవైతద్యాజ్ఞవల్క్యః || 1 ||
అథ జనకో హ వైదేహో యాజ్ఞవల్క్యముపసమేత్యోవాచ | భగవన్సంన్యాసమనుబ్రూహీతి | స హోవాచ యాజ్ఞవల్క్యః | బ్రహ్మచర్యం సమాప్య గృహీ భవేత్ | గృహీ భూత్వా వనీ భవేత్ | వనీ భూత్వా ప్రవ్రజేత్ | యది వేతరథా బ్రహ్మచర్యాదేవ ప్రవ్రజేద్గృహాద్వా వనాద్వా | అథ పునరవ్రతీ వా వ్రతీ వా స్నాతకో వాస్నాతకో వా ఉత్సన్నాగ్నిరనగ్నికో వా యదహరేవ విరజేత్తదహరేవ ప్రవ్రజేత్ || 1 ||
తద్ధైకే ప్రాజాపత్యామేవేష్టిం కుర్వన్తి | తదు తథా న కుర్యాత్ | ఆగ్నేయీమేవ కుర్యాత్ | అగ్నిర్హి వై ప్రాణః | ప్రాణమేవైతయా కరోతి | త్రైధాతవీయామేవ కుర్యాత్ | ఏతయైవ త్రయో ధాతవో యదుత సత్త్వం రజస్తమ ఇతి | అయం తే యోనిరృత్వియో యతో జాతో అరోచథాః | తం జానన్నగ్న ఆరోహాథా నో వర్ధయా రయిం | ఇత్యనేన మన్త్రేణాగ్నిమాజిఘ్రేత్ | ఏష హ వా అగ్నేర్యోనిర్యః ప్రాణః | ప్రాణం గచ్ఛ స్వాహేత్యేవమేవైతదాహ || 2 ||
గ్రామాదగ్నిమాహృత్య పూర్వైవదగ్నిమాఘ్రాపయేత్ | యదగ్నిం న విన్దేదప్సు జుహుయాత్ | ఆపో వై సర్వా దేవతాః | సర్వాభ్యో దేవతాభ్యో జుహోమి స్వాహేతి హుత్వోద్ధృత్య ప్రాశ్నీయాత్సాజ్యం హవిరనామయం | మోక్షమన్త్రస్త్రయ్యేవం విన్దేత్ | తద్బ్రహ్మ తదుపాసితవ్యం | ఏవమేవైతద్భగవన్నితి వై యాజ్ఞవల్క్య || 3 ||
అథ హైనమత్రిః పప్రచ్ఛ యాజ్ఞవల్క్యం | పృచ్ఛామి త్వా యాజ్ఞవల్క్యాయజ్ఞోపవీతి కథం బ్రాహ్మణ ఇతి | స హోవాచ యాజ్ఞవల్క్యః | ఇదమేవాస్య యజ్ఞోపవీతం య ఆత్మా అపః ప్రాశ్యాచంయ | అయం విధిః ప్రవ్రాజినాం || 1 ||
వీరాధ్వానే వానాశకే వాపాం ప్రవేశే వాగ్నిప్రవేశే వా మహాప్రస్థానే వా | అథ పరివ్రాడ్వివర్ణవాసా ముణ్డోఽపరిగ్రహః శుచిరద్రోహీ భైక్షమాణో బ్రహ్మభూయాయ భవతీతి | యద్యాతురః స్యాన్మనసా వాచా సంన్యసేత్ | ఏష పన్థా బ్రహ్మణా హానువిత్తస్తేనైతి సంన్యాసీ బ్రహ్మవిదితి | ఏవమేవైష భగవన్నితి వై యాజ్ఞవల్క్య || 2 ||
తత్ర పరమహంసా నామ సంవర్తకారుణిశ్వేతకేతుదుర్వాసఋభునిదాఘజడభరతదత్తత్రేయరైవతక-
ప్రభృతయోఽవ్యక్తలిఙ్గా అవ్యక్తాచారా అనున్మత్తా ఉన్మత్తవదాచరన్తః || 1 ||
ఇతి శ్రుతేః | త్రిదణ్డం కమణ్డలుం శిక్యం పాత్రం జలపవిత్రం శిఖాం యజ్ఞోపవీతం చేత్యేతత్సర్వం భూః స్వాహేత్యప్సు పరిత్యజ్యాత్మానమన్విచ్ఛేత్ || 2 ||
యథాజాతరూపధరో నిర్ద్వన్ద్వో నిష్పరిగ్రహః తత్త్వబ్రహ్మమార్గే సంయక్సంపన్నః శుద్ధమానసః ప్రాణసన్ధారణార్థం యథోక్తకాలే విముక్తో భైక్షమాచరన్నుదరపాత్రేణ లాభాలాభౌ సమో భూత్వా శూన్యాగారదేవగృహతృణకూటవల్మీకవృక్షమూల-
కులాలశాలాగ్నిహోత్రశాలానదీపులినగిరికుహరకన్దరకోటరనిర్ఝరస్థణ్డిలే-ష్వనికేతవాస్యప్రయత్నో నిర్మమః శుక్లధ్యానపరాయణోఽధ్యాత్మనిష్ఠః శుభాశుభకర్మనిర్మూలనపరః సంన్యాసేన దేహత్యాగం కరోతి స పరమహంసో నామ | ఇత్యుపనిషత్ || 3 ||
ఓం పూర్ణమదః పూర్ణమిదం పూర్ణాత్ పూర్ణముదచ్యతే | పూర్ణస్య పూర్ణమాదాయ పూర్ణమేవావశిష్యతే | ఓం శాన్తిః శాన్తిః శాన్తిః ||
ఇత్యథర్వవేదీయా జాబాలోపనిషత్సమాప్తా |
Jabalopanishad pdf download – జాబాలోపనిషత్
Author
Pavan Teja
పవన్ తేజ రచయితగా సినిమాలు, రాజకీయం, ఆరోగ్యం, వ్యాయామం, అందం, ధర్మం, విజ్ఞాన శాస్త్రం, సాంకేతికత, డబ్బు సంపాదించే మార్గాలు, ఆంగ్లం నుండి తెలుగు అనువాదం మొదలైన అంశాలలో అనుభవం పొందాడు. అతను గతంలో తెలుగు సినిమా విశ్లేషకుడిగా పని చేశాడు. ప్రస్తుతం అసిస్టెంట్ డైరెక్టర్ గా పనిచేస్తున్నాడు.
