కపిల ఉవాచ |
నమస్తే విఘ్నరాజాయ భక్తానాం విఘ్నహారిణే |
అభక్తానాం విశేషేణ విఘ్నకర్త్రే నమో నమః || 1 ||
ఆకాశాయ చ భూతానాం మనసే చామరేషు తే |
బుద్ధ్యైరింద్రియవర్గేషు త్రివిధాయ నమో నమః || 2 ||
దేహానాం బిందురూపాయ మోహరూపాయ దేహినాం |
తయోరభేదభావేషు బోధాయ తే నమో నమః || 3 ||
సాంఖ్యాయ వై విదేహానాం సంయోగానాం నిజాత్మనే |
చతుర్ణాం పంచ మాయైవ సర్వత్ర తే నమో నమః || 4 ||
నామరూపాత్మకానాం వై శక్తిరూపాయ తే నమః |
ఆత్మనాం రవయే తుభ్యం హేరంబాయ నమో నమః || 5 ||
ఆనందానాం మహావిష్ణురూపాయ నేతి ధారిణాం |
శంకరాయ చ సర్వేషాం సంయోగే గణపాయ తే || 6 ||
కర్మణాం కర్మయోగాయ జ్ఞానయోగాయ జానతాం |
సమేషు సమరూపాయ లంబోదర నమోఽస్తు తే || 7 ||
స్వాధీనానాం గణాధ్యక్ష సహజాయ నమో నమః |
తేషామభేదభావేషు స్వానందాయ చ తే నమః || 8 ||
నిర్మాయికస్వరూపాణామయోగాయ నమో నమః |
యోగానాం యోగరూపాయ గణేశాయ నమో నమః || 9 ||
శాంతియోగప్రదాత్రే తే శాంతియోగమయాయ చ |
కిం స్తౌమి తత్ర దేవేశ అతస్త్వాం ప్రణమాంయహం || 10 ||
తతస్తం గణనాథో వై జగాద భక్తముత్తమం |
హర్షేణ మహతా యుక్తో హర్షయన్మునిసత్తమ || 11 ||
శ్రీగణేశ ఉవాచ |
త్వయా కృతం మదీయం యత్ స్తోత్రం యోగప్రదం భవేత్ |
ధర్మార్థకామమోక్షాణాం దాయకం ప్రభవిష్యతి || 12 ||
ఇతి శ్రీముద్గలపురాణే యోగప్రద గణేశ స్తోత్రం సమాప్తం ||