Sri Krishna Stavaraja 2 (Krishnadasa Krutam) pdf download – శ్రీ కృష్ణ స్తవరాజః –2 (కృష్ణదాస కృతం)

అనంతకందర్పకలావిలాసం
కిశోరచంద్రం రసికేంద్రశేఖరం |
శ్యామం మహాసుందరతానిధానం
శ్రీకృష్ణచంద్రం శరణం గతోఽస్మి || 1 ||
అనంతవిద్యుద్ద్యుతిచారుపీతం
కౌశేయసంవీతనితంబబింబం |
అనంతమేఘచ్ఛవిదివ్యమూర్తిం
శ్రీకృష్ణచంద్రం శరణం గతోఽస్మి || 2 ||
మహేంద్రచాపచ్ఛవిపిచ్ఛచూఢం
కస్తూరికాచిత్రకశోభిమాలం |
మందాదరోద్ఘూర్ణవిశాలనేత్రం
శ్రీకృష్ణచంద్రం శరణం గతోఽస్మి || 3 ||
భ్రాజిష్ణుగల్లం మకరాంకితేన
విచిత్రరత్నోజ్జ్వలకుండలేన |
కోటీందులావణ్యముఖారవిందం
శ్రీకృష్ణచంద్రం శరణం గతోఽస్మి || 4 ||
వృందాటవీమంజులకుంజవాద్యం
శ్రీరాధయా సార్థముదారకేళిం |
ఆనందపుంజం లలితాదిదృశ్యం
శ్రీకృష్ణచంద్రం శరణం గతోఽస్మి || 5 ||
మహార్హకేయూరకకంకణశ్రీ-
-గ్రైవేయహారావళిముద్రికాభిః |
విభూషితం కింకిణినూపురాభ్యాం
శ్రీకృష్ణచంద్రం శరణం గతోఽస్మి || 6 ||
విచిత్రరత్నోజ్జ్వలదివ్యవాసా-
-ప్రగీతరామాగుణరూపలీలం |
ముహుర్ముహుః ప్రోదితరోమహర్షం
శ్రీకృష్ణచంద్రం శరణం గతోఽస్మి || 7 ||
శ్రీరాధికేయాధరసేవనేన
మాద్యంతముచ్చై రతికేళిలోలం |
స్మరోన్మదాంధం రసికేంద్రమౌళిం
శ్రీకృష్ణచంద్రం శరణం గతోఽస్మి || 8 ||
అంకే నిధాయ ప్రణయేన రాధాం
ముహుర్ముహుశ్చుంబితతన్ముఖేందుం |
విచిత్రవేషైః కృతతద్విభూషణం
శ్రీకృష్ణచంద్రం శరణం గతోఽస్మి || 9 ||
ఇతి శ్రీకృష్ణదాస కృత శ్రీ కృష్ణ స్తవరాజః |