దేవా ఊచుః |
జగద్యోనిరయోనిస్త్వమనంతోఽవ్యయ ఏవ చ |
జ్యోతిః స్వరూపో హ్యనఘః సగుణో నిర్గుణో మహాన్ || 1 ||
భక్తానురోధాత్ సాకారో నిరాకారో నిరంకుశః |
నిర్వ్యూహో నిఖిలాధారో నిఃశంకో నిరుపద్రవః || 2 ||
నిరుపాధిశ్చ నిర్లిప్తో నిరీహో నిధనాంతకః |
స్వాత్మారామః పూర్ణకామో నిమిషో నిత్య ఏవ చ || 3 ||
స్వేచ్ఛామయః సర్వహేతుః సర్వః సర్వగుణాశ్రయః |
సుఖదో దుఃఖదో దుర్గో దుర్జనాంతక ఏవ చ || 4 ||
సుభగో దుర్భగో వాగ్మీ దురారాధ్యో దురత్యయః |
వేదహేతుశ్చ వేదశ్చ వేదాంగో వేదవిద్విభుః || 5 ||
ఇత్యేవముక్త్వా దేవాశ్చ ప్రణేముశ్చ ముహుర్ముహుః |
హర్షాశ్రులోచనాః సర్వే వవృషుః కుసుమాని చ || 6 ||
ద్విచత్వారింశన్నామాని ప్రాతరుత్థాయ యః పఠేత్ |
దృఢాం భక్తిం హరేర్దాస్యం లభతే వాంఛితం ఫలం || 7 ||
ఇత్యేవం స్తవనం కృత్వా దేవాస్తే స్వాలయం యయుః |
బభూవ జలవృష్టిశ్చ నిశ్చేష్టా మథురాపురీ || 8 ||
ఇతి శ్రీబ్రహ్మవైవర్తే మహాపురాణే శ్రీకృష్ణజన్మఖండే సప్తమోఽధ్యాయే దేవకృత గర్భస్తుతిః |