ప్రణంయ దేవం విప్రేశం ప్రణంయ చ సరస్వతీం |
ప్రణంయ చ మునీన్ సర్వాన్ సర్వశాస్త్ర విశారదాన్ || 1 ||
శ్రీకృష్ణకవచం వక్ష్యే శ్రీకీర్తివిజయప్రదం |
కాంతారే పథి దుర్గే చ సదా రక్షాకరం నృణాం || 2 ||
స్మృత్వా నీలాంబుదశ్యామం నీలకుంచితకుంతలం |
బర్హిపింఛలసన్మౌళిం శరచ్చంద్రనిభాననం || 3 ||
రాజీవలోచనం రాజద్వేణునా భూషితాధరం |
దీర్ఘపీనమహాబాహుం శ్రీవత్సాంకితవక్షసం || 4 ||
భూభారహరణోద్యుక్తం కృష్ణం గీర్వాణవందితం |
నిష్కళం దేవదేవేశం నారదాదిభిరర్చితం || 5 ||
నారాయణం జగన్నాథం మందస్మితవిరాజితం |
జపేదేవమిమం భక్త్యా మంత్రం సర్వార్థసిద్ధయే || 6 ||
సర్వదోషహరం పుణ్యం సకలవ్యాధినాశనం |
వసుదేవసుతః పాతు మూర్ధానం మమ సర్వదా || 7 ||
లలాటం దేవకీసూనుః భ్రూయుగ్మం నందనందనః |
నయనౌ పూతనాహంతా నాసాం శకటమర్దనః || 8 ||
యమలార్జునహృత్కర్ణౌ కపోలౌ నగమర్దనః |
దంతాన్ గోపాలకః పాతు జిహ్వాం హయ్యంగవీణధృత్ || 9 || [భుక్] ఓష్ఠం ధేనుకజిత్ పాయాదధరం కేశినాశనః |
చిబుకం పాతు గోవిందో బలదేవానుజో ముఖం || 10 ||
అక్రూరసహితః కంఠం కక్షౌ దంతివరాంతకః |
భుజౌ చాణూరహారిర్మే కరౌ కంసనిషూదనః || 11 ||
వక్షో లక్ష్మీపతిః పాతు హృదయం జగదీశ్వరః |
ఉదరం మధురానాథో నాభిం ద్వారవతీపతిః || 12 ||
రుక్మిణీవల్లభః పృష్ఠం జఘనం శిశుపాలహా |
ఊరూ పాండవదూతో మే జానునీ పార్థసారథిః || 13 ||
విశ్వరూపధరో జంఘే ప్రపదే భూమిభారహృత్ |
చరణౌ యాదవః పాతు పాతు కృష్ణోఽఖిలం వపుః || 14 ||
దివా పాయాజ్జగన్నాథో రాత్రౌ నారాయణః స్వయం |
సర్వకాలముపాసీనః సర్వకామార్థసిద్ధయే || 15 ||
ఇదం కృష్ణబలోపేతం యః పఠేత్ కవచం నరః |
సర్వదాఽఽర్తిభయాన్ముక్తః కృష్ణభక్తిం సమాప్నుయాత్ || 16 ||