Sri Dakshinamurthy Manu Suvarnamala Stotram pdf download – శ్రీ దక్షిణామూర్తి మనుసువర్ణమాలా స్తోత్రం

ఓమితి నిఖిలా దేవా
యస్యాజ్ఞాం శిరసి కుర్వతే సతతం |
ఓంకారపద్మభృంగం
తమహం ప్రణమామి దక్షిణామూర్తిం || 1 ||
నత్వా యత్పదయుగ్మం
మూకా అపి వాగ్విధూతగురవః స్యుః |
నతజనరక్షణదక్షం
తమహం ప్రణమామి దక్షిణామూర్తిం || 2 ||
మోహమతంగజభేదన-
-పంచాస్యా యత్పదాంబుజప్రణతాః |
మోహాంధకారమిహిరం
తమహం ప్రణమామి దక్షిణామూర్తిం || 3 ||
భవవారిధిమాశు తరే-
-త్కుల్యామివ యత్పదాంబుజధ్యానాత్ |
భగవత్పదాదిరూపం
తమహం ప్రణమామి దక్షిణామూర్తిం || 4 ||
గతివిజితహంసగర్వం
గగనమరుద్వహ్నిజలధరారూపం |
గజముఖషడాస్యపూజిత-
-మనిశం ప్రణమామి దక్షిణామూర్తిం || 5 ||
వరయంతేఽఖిలవిద్యాః
స్వయమేవ యదంఘ్రిపద్మనంరజనాన్ |
వనవాసలోలచిత్తం
తమహం ప్రణమామి దక్షిణామూర్తిం || 6 ||
తేన జితం జగదఖిలం
తేనైవాత్తం సమస్తభాగ్యం చ |
యేన త్వత్పదయుగళం
పూజితమపి జాతు దక్షిణామూర్తే || 7 ||
దమశమముఖాస్తు సుగుణాః
ప్రాప్యంతే సత్వరం యస్య |
పాదాంబుజయుగనమనా-
-త్తమహం ప్రణమామి దక్షిణామూర్తిం || 8 ||
క్షితిపతయో దాసాః స్యు-
-ర్యత్పాదపాథోజపూజకస్యాశు |
క్షితిధరశిఖరావాసం
తమహం ప్రణమామి దక్షిణామూర్తిం || 9 ||
ణాణేతి యన్మనుస్థం
వర్ణం జప్తుః సమస్తపురుషార్థాః |
కరతలమధ్యగతాః స్యు-
-స్తమహం ప్రణమామి దక్షిణామూర్తిం || 10 ||
మూర్తిం నిరీక్ష్య మోహం
ప్రాప్యాగసుతా పురా తపస్తేపే |
యస్య ప్రాప్త్యై సుచిరం
తమహం ప్రణమామి దక్షిణామూర్తిం || 11 ||
తస్యాణిమాదిసిద్ధి-
-ర్వినైవ యోగం భవేన్న సందేహః |
తరుణేందుభూషితజటం
యస్త్వాం నమతీహ దక్షిణామూర్తే || 12 ||
యే త్వత్పాదాబ్జయుగళం
చిత్తే సందధతి దక్షిణామూర్తే |
తాన్మత్తవారణేంద్రా
దధతి తురంగాః సువర్ణశిబికాశ్చ || 13 ||
మథితాసురసందోహం
మానసచరమద్రిరాజతనయాయాః |
మానప్రదమానమతా-
-మనిశం ప్రణమామి దక్షిణామూర్తిం || 14 ||
హ్యంభోధౌ లుఠతాం త-
-త్పారం గంతుం యదీయపదభక్తిః |
సంసృతిరూపే నౌకా
తమహం ప్రణమామి దక్షిణామూర్తిం || 15 ||
మేధాప్రజ్ఞే చేటీ-
-భావం వ్రజతో యదంఘ్రినతికర్తుః |
మేనాసఖజాకాంతం
తమహం ప్రణమామి దక్షిణామూర్తిం || 16 ||
ధాం బాపూర్వాం నిఖిలాం
యోఽరం వారయతి భక్తబృందస్య |
ధాంనామపి ధామత్వద-
-మనిశం ప్రణమామి దక్షిణామూర్తిం || 17 ||
ప్రజ్ఞామాత్రశరీరం
ప్రణతాఘాంభోధికుంభసంజాతం |
ప్రత్యక్షం నతవితతేః
సతతం ప్రణమామి దక్షిణామూర్తిం || 18 ||
జ్ఞాంశీభూతాంజీవాన్
భవమగ్నాన్ బ్రహ్మబోధదానేన |
కుర్వాణం ప్రవిముక్తాన్
సతతం ప్రణమామి దక్షిణామూర్తిం || 19 ||
ప్రత్నవచస్తతిగేయం
ప్రజ్ఞాదానప్రచండనిజనమనం |
ప్రణవప్రతిపాద్యతనుం
సతతం ప్రణమామి దక్షిణామూర్తిం || 20 ||
యస్యార్ధవర్ష్మలాభా-
-దేవాభూత్ సర్వమంగళా గిరిజా |
యమివరహృదబ్జనిలయం
తమహం ప్రణమామి దక్షిణామూర్తిం || 21 ||
ఛత్రీభూతవటాగం
ఛన్నమవిద్యాఽఽఖ్యవాససానాదిం |
ఛత్రాదినృపవిభూతిద-
-మనిశం ప్రణమామి దక్షిణామూర్తిం || 22 ||
స్వాహాస్వధానిషేవ్యం
స్వాకృతిసంతోషితాగజాహృదయం |
స్వాహాసహాయతిలకం
సతతం ప్రణమామి దక్షిణామూర్తిం || 23 ||
హాసాధరీకృతవిధుం
హాలాహలశోభమానగలదేశం |
హారాయితాహిరాజం
సతతం ప్రణమామి దక్షిణామూర్తిం || 24 ||
శ్రీమన్నృసింహయతిరాట్-
-శిష్యః శ్రీసచ్చిదానందః |
అకరోద్గురువరకృపయా
స్తోత్రం శ్రీదక్షిణామూర్తేః || 25 ||
మనువర్ణఘటితమేతత్
స్తోత్రం యః పఠతి భక్తిసంయుక్తః |
తస్మై వటతటవాసీ
దద్యాత్ సకలాః కలాస్త్వరితం || 26 ||
ఇతి శ్రీజగద్గురు శ్రీసచ్చిదానంద శివాభినవ నృసింహ భారతీ స్వామిభిః విరచితం శ్రీ దక్షిణామూర్తి మనుసువర్ణమాలా స్తోత్రం |