Sri Dakshinamurthy Manasika Puja Stotram pdf download – శ్రీ దక్షిణామూర్తి మానసిక పూజా స్తోత్రం

ముద్రాక్షమాలా మృతపాత్రవిద్యా
వ్యాఘ్రాజినార్ధేందుఫణీంద్రయుక్తం |
యోగీంద్రపర్జన్య మనః సరోజ-
-భృంగం భజేఽహం హృది దక్షిణాస్యం || 1 ||
స్ఫుటవటనికటస్థం స్తూయమానావభాసం
పటుభుజతటబద్ధవ్యాఘ్రచర్మోత్తరీయం |
చటులనిటలనేత్రం చంద్రచూడం మునీశం
స్ఫటికపటలదేహం భావయే దక్షిణాస్యం || 2 ||
ఆవాహయే సుందరనాగభూషం
విజ్ఞానముద్రాంచిత పంచశాఖం |
భస్మాంగరాగేణ విరాజమానం
శ్రీదక్షిణామూర్తి మహాత్మరూపం || 3 ||
సువర్ణరత్నామలవజ్రనీల-
-మాణిక్యముక్తామణియుక్తపీఠే |
స్థిరో భవ త్వం వరదో భవ త్వం
సంస్థాపయామీశ్వర దక్షిణాస్యం || 4 ||
శ్రీజాహ్నవీనిర్మలతోయమీశ
చార్ఘ్యార్థమానీయ సమర్పయిష్యే |
ప్రసన్నవక్త్రాంబుజలోకవంద్య
కాలత్రయేహం తవ దక్షిణాస్యం || 5 ||
కస్తూరికామిశ్రమిదం గృహాణ
రుద్రాక్షమాలాభరణాంకితాంగ |
కాలత్రయాబాధ్యజగన్నివాస
పాద్యం ప్రదాస్యే హృది దక్షిణాస్యం || 6 ||
ముదాహమానంద సురేంద్రవంద్య
గంగానదీతోయమిదం హి దాస్యే |
తవాధునా చాచమనం కురుష్వ
శ్రీదక్షిణామూర్తి గురుస్వరూప || 7 ||
సర్పిః పయో దధి మధు శర్కరాభిః ప్రసేచయే |
పంచామృతమిదం స్నానం దక్షిణాస్య కురు ప్రభో || 8 ||
వేదాంతవేద్యాఖిలశూలపాణే
బ్రహ్మామరోపేంద్రసురేంద్రవంద్య |
స్నానం కురుష్వామలగాంగతోయే
సువాసితేస్మిన్ కురు దక్షిణాస్య || 9 ||
కౌశేయవస్త్రేణ చ మార్జయామి
దేవేశ్వరాంగాని తవామలాని |
ప్రజ్ఞాఖ్యలోకత్రితయప్రసన్న
శ్రీదక్షిణాస్యాఖిలలోకపాల || 10 ||
సువర్ణతంతూద్భవమగ్ర్యమీశ
యజ్ఞోపవీతం పరిధత్స్వదేవ |
విశాలబాహూదరపంచవక్త్ర
శ్రీదక్షిణామూర్తి సుఖస్వరూప || 11 ||
కస్తూరికాచందనకుంకుమాది-
-విమిశ్రగంధం మణిపాత్రసంస్థం |
సమర్పయిష్యామి ముదా మహాత్మన్
గౌరీమనోవస్థితదక్షిణాస్య || 12 ||
శుభ్రాక్షతైః శుభ్రతిలైః సుమిశ్రైః
సంపూజయిష్యే భవతః పరాత్మన్ |
తదేకనిష్ఠేన సమాధినాథ
సదాహమానంద సుదక్షిణాస్య || 13 ||
సురత్నదాంగేయ కిరీటకుండలం
హారాంగుళీకంకణమేఖలావృతం |
ఖండేందుచూడామృతపాత్రయుక్తం
శ్రీదక్షిణామూర్తిమహం భజామి || 14 ||
ముక్తామణిస్థాపితకర్బురప్ర-
-సూనైః సదాహం పరిపూజయిష్యే |
కుక్షిప్రపుష్టాఖిలలోకజాల
శ్రీదక్షిణామూర్తి మహత్ స్వరూపం || 15 ||
దశాంగధూపం పరికల్పయామి
నానాసుగంధాన్వితమాజ్యయుక్తం |
మేధాఖ్య సర్వజ్ఞ బుధేంద్రపూజ్య
దిగంబర స్వీకురు దక్షిణాస్య || 16 ||
ఆజ్యేన సంమిశ్రమిమం ప్రదీపం
వర్తిత్రయేణాన్వితమగ్నియుక్తం |
గృహాణ యోగీంద్ర మయార్పితం భో
శ్రీదక్షిణామూర్తిగురో ప్రసీద || 17 ||
శాల్యోదనం నిర్మలసూపశాక-
-భక్ష్యాజ్యసంయుక్తదధిప్రసిక్తం |
కపిత్థ సద్రాక్షఫలైశ్చ చూతైః
సాపోశనం భక్షయ దక్షిణాస్య || 18 ||
గుడాంబు సత్సైంధవయుక్తతక్రం
కర్పూరపాటీర లవంగయుక్తం |
యజ్ఞేశ కామాంతక పుణ్యమూర్తే
పిబోదకం నిర్మల దక్షిణాస్య || 19 ||
ఖమార్గనిర్యజ్జలమాశు దేవ
కురూత్తరాపోశనమభ్రకేశ |
ప్రక్షాళనం పాణియుగస్య శర్వ
గండూషమాపాదయ దక్షిణాస్య || 20 ||
సంయగ్జలేనాచమనం కురుష్వ
స్వస్థో భవ త్వం మమ చాగ్రభాగే |
చిదాకృతే నిర్మలపూర్ణకామ
వినిర్మితం పావన దక్షిణాస్య || 21 ||
తాంబూలమద్య ప్రతిసంగృహాణ
కర్పూరముక్తామణిచూర్ణయుక్తం |
సుపర్ణపర్ణాన్వితపూగఖండ-
-మనేకరూపాకృతి దక్షిణాస్య || 22 ||
నీరాజనం నిర్మలపాత్రసంస్థం
కర్పూరసందీపితమచ్ఛరూపం |
కరోమి వామేశ తవోపరీదం
వ్యోమాకృతే శంకర దక్షిణాస్య || 23 ||
తతః పరం దర్పణమీశ పశ్య
స్వచ్ఛం జగద్దీపితచక్రభాస్వత్ |
మాణిక్య ముక్తా మణి హేమ నీల
వినిర్మితం పావన దక్షిణాస్య || 24 ||
మందారపంకేరుహకుందజాజీ-
-సుగంధపుష్పాంజలిమర్పయామి |
త్రిశూల ఢక్కాంచిత పాణియుగ్మ
తే దక్షిణామూర్తి విరూపధారిన్ || 25 ||
ప్రదక్షిణం సంయగహం కరిష్యే
కాలత్రయే త్వాం కరుణాభిరామం |
శివామనోనాథ మమాపరాధం
క్షమస్వ యజ్ఞేశ్వర దక్షిణాస్య || 26 ||
నమో నమః పాపవినాశనాయ
నమో నమః కంజభవార్చితాయ |
నమో నమః కృష్ణహృదిస్థితాయ
శ్రీదక్షిణామూర్తి మహేశ్వరాయ || 27 ||
ఇతి శ్రీవిజ్ఞానేంద్ర విరచితం శ్రీ దక్షిణామూర్తి మానసిక పూజా స్తోత్రం ||