ధ్యానం –
శ్వేతాంబరాన్వితవపుర్వరశుభ్రవర్ణం
శ్వేతాశ్వయుక్తరథగం సురసేవితాంఘ్రిం |
దోర్భ్యాం ధృతాభయగదం వరదం సుధాంశుం
శ్రీవత్సమౌక్తికధరం ప్రణమామి చంద్రం || 1 ||
ఆగ్నేయభాగే సరథో దశాశ్వ-
-శ్చాత్రేయజో యామునదేశజశ్చ |
ప్రత్యఙ్ముఖస్థశ్చతురస్రపీఠే
గదాధరాంగో వరరోహిణీశః || 2 ||
చంద్రం చతుర్భుజం దేవం కేయూరమకుటోజ్జ్వలం |
వాసుదేవస్య నయనం శంకరస్య చ భూషణం || 3 ||
చంద్రం చ ద్విభుజం జ్ఞేయం శ్వేతవస్త్రధరం విభుం |
శ్వేతమాల్యాంబరధరం శ్వేతగంధానులేపనం || 4 ||
శ్వేతచ్ఛత్రధరం దేవం సర్వాభరణభూషితం |
ఏతత్ స్తోత్రం పఠిత్వా తు సర్వసంపత్కరం శుభం || 5 ||
ఫలశ్రుతిః –
క్షయాపస్మారకుష్ఠాది తాపజ్వరనివారణం |
ఇదం నిశాకరస్తోత్రం యః పఠేత్ సతతం నరః |
సోపద్రవాత్ ప్రముచ్యేత నాత్ర కార్యా విచారణా || 6 ||
ఇతి శ్రీబ్రహ్మాండపురాణే ఉమామహేశ్వరసంవాదే నిశాకర స్తోత్రం |