రుద్రయామల తంత్రం నుండి ఉద్భవించిన బటుక భైరవ స్తవరాజ అష్టోత్తరశతనామ స్తోత్రం బటుక భైరవుని స్తుతిస్తూ 108 పేర్లతో కూడిన స్తోత్రం. దీనిని పూజలలో పువ్వులను సమర్పించేటప్పుడు బటుక భైరవుని ప్రీతి కొరకు ఉపయోగిస్తారు.
కైలాసశిఖరాసీనం దేవదేవం జగద్గురుం |
శంకరం పరిపప్రచ్ఛ పార్వతీ పరమేశ్వరం || 1 ||
శ్రీపార్వత్యువాచ |
భగవన్ సర్వధర్మజ్ఞ సర్వశాస్త్రాగమాదిషు |
ఆపదుద్ధారణం మంత్రం సర్వసిద్ధిప్రదం నృణాం || 2 ||
సర్వేషాం చైవ భూతానాం హితార్థం వాంఛితం మయా |
విశేషతస్తు రాజ్ఞాం వై శాంతిపుష్టిప్రసాధనం || 3 ||
అంగన్యాస కరన్యాస బీజన్యాస సమన్వితం |
వక్తుమర్హసి దేవేశ మమ హర్షవివర్ధనం || 4 ||
శ్రీభగవానువాచ |
శృణు దేవి మహామంత్రమాపదుద్ధారహేతుకం |
సర్వదుఃఖప్రశమనం సర్వశత్రునిబర్హణం || 5 ||
అపస్మారాదిరోగాణాం జ్వరాదీనాం విశేషతః |
నాశనం స్మృతిమాత్రేణ మంత్రరాజమిమం ప్రియే || 6 ||
గ్రహరాజభయానాం చ నాశనం సుఖవర్ధనం |
స్నేహాద్వక్ష్యామి తే మంత్రం సర్వసారమిమం ప్రియే || 7 ||
సర్వకామార్థదం మంత్రం రాజ్యభోగప్రదం నృణాం |
ప్రణవం పూర్వముచ్చార్య దేవీ ప్రణవముద్ధరేత్ || 8 ||
బటుకాయేతి వై పశ్చాదాపదుద్ధారణాయ చ |
కురు ద్వయం తతః పశ్చాద్బటుకాయ పునః క్షిపేత్ || 9 ||
దేవీ ప్రణవముద్ధృత్య మంత్రరాజమిమం ప్రియే |
మంత్రోద్ధారమిమం దేవి త్రైలోక్యస్యాపి దుర్లభం || 10 ||
అప్రకాశ్యమిమం మంత్రం సర్వశక్తిసమన్వితం |
స్మరణాదేవ మంత్రస్య భూతప్రేతపిశాచకాః || 11 ||
విద్రవంతి భయార్తా వై కాలరుద్రాదివ ప్రజాః |
పఠేద్వా పాఠయేద్వాపి పూజయేద్వాపి పుస్తకం || 12 ||
నాగ్నిచౌరభయం వాపి గ్రహరాజభయం తథా |
న చ మారీభయం తస్య సర్వత్ర సుఖవాన్ భవేత్ || 13 ||
ఆయురారోగ్యమైశ్వర్యం పుత్రపౌత్రాదిసంపదః |
భవంతి సతతం తస్య పుస్తకస్యాపి పూజనాత్ || 14 ||
శ్రీపార్వత్యువాచ |
య ఏష భైరవో నామ ఆపదుద్ధారకో మతః |
త్వయా చ కథితో దేవ భైరవః కల్ప ఉత్తమః || 15 ||
తస్య నామసహస్రాణి అయుతాన్యర్బుదాని చ |
సారముద్ధృత్య తేషాం వై నామాష్టశతకం వద || 16 ||
శ్రీభగవానువాచ |
యస్తు సంకీర్తయేదేతత్ సర్వదుష్టనిబర్హణం |
సర్వాన్ కామానవాప్నోతి సాధకః సిద్ధిమేవ చ || 17 ||
శృణు దేవి ప్రవక్ష్యామి భైరవస్య మహాత్మనః |
ఆపదుద్ధారకస్యేహ నామాష్టశతముత్తమం || 18 ||
సర్వపాపహరం పుణ్యం సర్వాపద్వినివారకం |
సర్వకామార్థదం దేవి సాధకానాం సుఖావహం || 19 ||
దేహాంగన్యసనం చైవ పూర్వం కుర్యాత్ సమాహితః |
భైరవం మూర్ధ్ని విన్యస్య లలాటే భీమదర్శనం || 20 ||
అక్ష్ణోర్భూతాశ్రయం న్యస్య వదనే తీక్ష్ణదర్శనం |
క్షేత్రపం కర్ణయోర్మధ్యే క్షేత్రపాలం హృది న్యసేత్ || 21 ||
క్షేత్రాఖ్యం నాభిదేశే చ కట్యాం సర్వాఘనాశనం |
త్రినేత్రమూర్వోర్విన్యస్య జంఘయో రక్తపాణికం || 22 ||
పాదయోర్దేవదేవేశం సర్వాంగే వటుకం న్యసేత్ |
ఏవం న్యాసవిధిం కృత్వా తదనంతరముత్తమం || 23 ||
నామాష్టశతకస్యాపి ఛందోఽనుష్టుబుదాహృతం |
బృహదారణ్యకో నామ ఋషిశ్చ పరికీర్తితః || 24 ||
దేవతా కథితా చేహ సద్భిర్వటుకభైరవః |
ధర్మార్థకామమోక్షేషు వినియోగః ప్రకీర్తితః || 25 ||
(అష్టోత్తరశతనామ స్తోత్రం)
ఓం భైరవో భూతనాథశ్చ భూతాత్మా భూతభావనః |
క్షేత్రదః క్షేత్రపాలశ్చ క్షేత్రజ్ఞః క్షత్రియో విరాట్ || 26 ||
శ్మశానవాసీ మాంసాశీ ఖర్పరాశీ మఖాంతకృత్ |
రక్తపః ప్రాణపః సిద్ధః సిద్ధిదః సిద్ధసేవితః || 27 ||
కరాలః కాలశమనః కలాకాష్ఠాతనుః కవిః |
త్రినేత్రో బహునేత్రశ్చ తథా పింగలలోచనః || 28 ||
శూలపాణిః ఖడ్గపాణిః కంకాలీ ధూంరలోచనః |
అభీరుర్భైరవో భీరుర్భూతపో యోగినీపతిః || 29 ||
ధనదో ధనహారీ చ ధనపః ప్రతిభావవాన్ |
నాగహారో నాగకేశో వ్యోమకేశః కపాలభృత్ || 30 ||
కాలః కపాలమాలీ చ కమనీయః కలానిధిః |
త్రిలోచనో జ్వలన్నేత్రస్త్రిశిఖీ చ త్రిలోకపాత్ || 31 ||
త్రివృత్తనయనో డింభః శాంతః శాంతజనప్రియః |
వటుకో వటుకేశశ్చ ఖట్వాంగవరధారకః || 32 ||
భూతాధ్యక్షః పశుపతిర్భిక్షుకః పరిచారకః |
ధూర్తో దిగంబరః సౌరిర్హరిణః పాండులోచనః || 33 ||
ప్రశాంతః శాంతిదః శుద్ధః శంకరప్రియబాంధవః |
అష్టమూర్తిర్నిధీశశ్చ జ్ఞానచక్షుస్తమోమయః || 34 ||
అష్టాధారః కలాధారః సర్పయుక్తః శశీశిఖః |
భూధరో భూధరాధీశో భూపతిర్భూధరాత్మకః || 35 ||
కంకాలధారీ ముండీ చ వ్యాలయజ్ఞోపవీతవాన్ |
జృంభణో మోహనః స్తంభీ మారణః క్షోభణస్తథా || 36 ||
శుద్ధనీలాంజనప్రఖ్యదేహో ముండవిభూషితః |
బలిభుక్ బలిభూతాత్మా కామీ కామపరాక్రమః || 37 ||
సర్వాపత్తారకో దుర్గో దుష్టభూతనిషేవితః |
కామీ కలానిధిః కాంతః కామినీవశకృద్వశీ |
సర్వసిద్ధిప్రదో వైద్యః ప్రభవిష్ణుః ప్రభావవాన్ || 38 ||
(ఫలశ్రుతిః)
అష్టోత్తరశతం నామ భైరవస్య మహాత్మనః |
మయా తే కథితం దేవి రహస్యం సర్వకామికం || 39 ||
య ఇదం పఠతి స్తోత్రం నామాష్టశతముత్తమం |
న తస్య దురితం కించన్న రోగేభ్యో భయం తథా |
న శత్రుభ్యో భయం కించిత్ ప్రాప్నోతి మానవః క్వచిత్ || 40 ||
పాతకానాం భయం నైవ పఠేత్ స్తోత్రమనన్యధీః |
మారీభయే రాజభయే తథా చౌరాగ్నిజే భయే || 41 ||
ఔత్పాతికే మహాఘోరే యథా దుఃస్వప్నదర్శనే |
బంధనే చ తథా ఘోరే పఠేత్ స్తోత్రం సమాహితః || 42 ||
సర్వే ప్రశమనం యాంతి భయాద్భైరవకీర్తనాత్ |
ఏకాదశసహస్రం తు పురశ్చరణముచ్యతే || 43 ||
త్రిసంధ్యం యః పఠేద్దేవి సంవత్సరమతంద్రితః |
స సిద్ధిం ప్రాప్నుయాదిష్టాం దుర్లభమపి మానుషః || 44 ||
షణ్మాసాన్ భూమికామస్తు స జప్త్వా లభతే మహీం |
రాజా శత్రువినాశాయ జపేన్మాసాష్టకం పునః || 45 ||
రాత్రౌ వారత్రయం చైవ నాశయత్యేవ శాత్రవాన్ |
జపేన్మాసత్రయం రాత్రౌ రాజానం వశమానయేత్ || 46 ||
ధనార్థీ చ సుతార్థీ చ దారార్థీ యస్తు మానవః |
పఠేద్వారత్రయం యద్వా వారమేకం తథా నిశి || 47 ||
ధనం పుత్రాంస్తథా దారాన్ ప్రాప్నుయాన్నాత్ర సంశయః |
రోగీ రోగాత్ ప్రముచ్యేత బద్ధో ముచ్యేత బంధనాత్ || 48 ||
భీతో భయాత్ ప్రముచ్యేత దేవి సత్యం న సంశయః |
యాన్ యాన్ సమీ హతే కామాంస్తాంస్తానాప్నోతి నిశ్చితం |
అప్రకాశ్యమిదం గుహ్యం న దేయం యస్య కస్యచిత్ || 49 ||
సత్కులీనాయ శాంతాయ ఋజవే దంభవర్జితే |
దద్యాత్ స్తోత్రమిదం పుణ్యం సర్వకామఫలప్రదం |
ధ్యానం వక్ష్యామి దేవస్య యథా ధ్యాత్వా పఠేన్నరః || 50 ||
ఓం శుద్ధస్ఫటికసంకాశం సహస్రాదిత్యవర్చసం |
అష్టబాహుం త్రినయనం చతుర్బాహుం ద్విబాహుకం || 51 ||
భుజంగమేఖలం దేవమగ్నివర్ణశిరోరుహం |
దిగంబరం కుమారీశం వటుకాఖ్యం మహాబలం || 52 ||
ఖట్వాంగమసిపాశం చ శూలం చైవ తథా పునః |
డమరుం చ కపాలం చ వరదం భుజగం తథా || 53 ||
నీలజీమూతసంకాశం నీలాంజనచయప్రభం |
దంష్ట్రాకరాలవదనం నూపురాంగదభూషితం || 54 ||
ఆత్మవర్ణసమోపేతసారమేయసమన్వితం |
ధ్యాత్వా జపేత్ సుసంహృష్టః సర్వాన్ కామానవాప్నుయాత్ || 55 ||
ఏతచ్ఛ్రుత్వా తతో దేవీ నామాష్టశతముత్తమం |
భైరవాయ ప్రహృష్టాభూత్ స్వయం చైవ మహేశ్వరీ || 56 ||
ఇతి విశ్వసారోద్ధారతంత్రే ఆపదుద్ధారకల్పే భైరవ స్తవరాజః సమాప్తః ||
