Skandopanishad pdf download – స్కందోపనిషత్

యత్రాసంభిన్నతాం యాతి స్వాతిరిక్తభిదాతతిః |
సంవిన్మాత్రం పరం బ్రహ్మ తత్స్వమాత్రం విజృంభతే ||
ఓం సహ నావవతు | సహ నౌ భునక్తు | సహ వీర్యం కరవావహై | తేజస్వి నావధీతమస్తు మా విద్విషావహై | ఓం శాంతిః శాంతిః శాంతిః ||
అచ్యుతోఽస్మి మహాదేవ తవ కారుణ్యలేశతః |
విజ్ఞానఘన ఏవాస్మి శివోఽస్మి కిమతః పరం || 1 ||
న నిజం నిజవద్భాత్యంతఃకరణజృంభణాత్ |
అంతఃకరణనాశేన సంవిన్మాత్రస్థితో హరిః || 2 ||
సంవిన్మాత్రస్థితశ్చాహమజోఽస్మి కిమతః పరం |
వ్యతిరిక్తం జడం సర్వం స్వప్నవచ్చ వినశ్యతి || 3 ||
చిజ్జడానాం తు యో ద్రష్టా సోఽచ్యుతో జ్ఞానవిగ్రహః |
స ఏవ హి మహాదేవః స ఏవ హి మహాహరిః || 4 ||
స ఏవ హి జ్యోతిషాం జ్యోతిః స ఏవ పరమేశ్వరః |
స ఏవ హి పరం బ్రహ్మ తద్బ్రహ్మాహం న సంశయః || 5 ||
జీవః శివః శివో జీవః స జీవః కేవలః శివః |
తుషేణ బద్ధో వ్రీహిః స్యాత్తుషాభావేన తండులః || 6 ||
ఏవం బద్ధస్తథా జీవః కర్మనాశే సదాశివః |
పాశబద్ధస్తథా జీవః పాశముక్తః సదాశివః || 7 ||
శివాయ విష్ణురూపాయ శివరూపాయ విష్ణవే |
శివస్య హృదయం విష్ణుర్విష్ణోశ్చ హృదయం శివః || 8 ||
యథా శివమయో విష్ణురేవం విష్ణుమయః శివః |
యథాంతరం న పశ్యామి తథా మే స్వస్తిరాయుషి || 9 ||
యథాంతరం న భేదాః స్యుః శివకేశవయోస్తథా |
దేహో దేవాలయః ప్రోక్తః స జీవః కేవలః శివః |
త్యజేదజ్ఞాననిర్మాల్యం సోఽహం‍భావేన పూజయేత్ || 10 ||
అభేదదర్శనం జ్ఞానం ధ్యానం నిర్విషయం మనః |
స్నానం మనోమలత్యాగః శౌచమింద్రియనిగ్రహః || 11 ||
బ్రహ్మామృతం పిబేద్భైక్ష్యమాచరేద్దేహరక్షణే |
వసేదేకాంతికో భూత్వా చైకాంతే ద్వైతవర్జితే || 12 ||
ఇత్యేవమాచరేద్ధీమాన్స ఏవం ముక్తిమాప్నుయాత్ |
శ్రీపరమధాంనే స్వస్తి చిరాయుష్యోన్నమ ఇతి || 13 ||
విరించినారాయణశంకరాత్మకం
నృసింహ దేవేశ తవ ప్రసాదతః |
అచింత్యమవ్యక్తమనంతమవ్యయం
వేదాత్మకం బ్రహ్మ నిజం విజానతే || 14 ||
తద్విష్ణోః పరమం పదం సదా పశ్యంతి సూరయః | దివీవ చక్షురాతతం | తద్విప్రాసో విపన్యవో జాగృవాంసః సమింధతే | విష్ణోర్యత్పరమం పదం | ఇత్యేతన్నిర్వాణానుశాసనమితి వేదానుశాసనమితి వేదానుశాసనమిత్యుపనిషత్ || 15 ||
ఓం సహ నావవతు | సహ నౌ భునక్తు | సహ వీర్యం కరవావహై | తేజస్వి నావధీతమస్తు మా విద్విషావహై | ఓం శాంతిః శాంతిః శాంతిః ||