Navagraha Mangala Sloka (Navagraha Mangalashtakam) pdf download – నవగ్రహ మంగళ శ్లోకాః (మంగళాష్టకం)

భాస్వాన్ కాశ్యపగోత్రజోఽరుణరుచిర్యః సింహపోఽర్కః సమి-
-త్షట్త్రిస్థోఽదశశోభనో గురుశశీ భౌమాః సుమిత్రాః సదా |
శుక్రో మందరిపుః కళింగజనపశ్చాగ్నీశ్వరౌ దేవతే
మధ్యేవర్తులపూర్వదిగ్దినకరః కుర్యాత్సదా మంగళం || 1 ||
చంద్రః కర్కటకప్రభుః సితనిభశ్చాత్రేయగోత్రోద్భవ-
-శ్చాత్రేయశ్చతురశ్రవారుణముఖశ్చాపే ఉమాధీశ్వరః |
షట్సప్తాగ్ని దశైకశోభనఫలో నోరిర్బుధార్కౌప్రియౌ
స్వామీ యామునజశ్చ పర్ణసమిధః కుర్యాత్సదా మంగళం || 2 ||
భౌమో దక్షిణదిక్త్రికోణయమదిగ్వింధ్యేశ్వరః ఖాదిరః
స్వామీ వృశ్చికమేషయోస్తు సుగురుశ్చార్కః శశీ సౌహృదః |
జ్ఞోఽరిః షట్త్రిఫలప్రదశ్చ వసుధాస్కందౌ క్రమాద్దేవతే
భారద్వాజకులోద్వహోఽరుణరుచిః కుర్యాత్సదా మంగళం || 3 ||
సౌంయః పీత ఉదఙ్ముఖః సమిదపామార్గోఽత్రిగోత్రోద్భవో
బాణేశానదిశః సుహృద్రవిసుతః శాంతః సుతః శీతగోః |
కన్యాయుగ్మపతిర్దశాష్టచతురః షణ్ణేత్రగః శోభనో
విష్ణుర్దేవ్యధిదేవతే మగధపః కుర్యాత్సదా మంగళం || 4 ||
జీవశ్చాంగిరగోత్రజోత్తరముఖో దీర్ఘోత్తరాశాస్థితః
పీతోఽశ్వత్థసమిచ్చ సింధుజనితశ్చాపోఽథ మీనాధిపః |
సూర్యేందుక్షితిజాః ప్రియా బుధసితౌ శత్రూ సమాశ్చాపరే
సప్తద్వే నవపంచమే శుభకరః కుర్యాత్సదా మంగళం || 5 ||
శుక్రో భార్గవగోత్రజః సితరుచిః పూర్వాముఖః పూర్వదిక్
పాంచాలస్థ వృషస్తులాధిపమహారాష్ట్రాధిపౌదుంబరః |
ఇంద్రాణీమఘవా బుధశ్చ రవిజో మిత్రోర్క చంద్రావరీ
షష్ఠత్రిర్దశవర్జితే భృగుసుతః కుర్యాత్సదా మంగళం || 6 ||
మందః కృష్ణనిభః సపశ్చిమముఖః సౌరాష్ట్రపః కాశ్యపః
స్వామీ నక్రసుకుంభయోర్బుధసితౌ మిత్రౌ కుజేందూ ద్విషౌ |
స్థానం పశ్చిమదిక్ ప్రజాపతియమౌ దేవౌ ధనుర్ధారకః
షట్త్రిస్థః శుభకృచ్ఛనీ రవిసుతః కుర్యాత్సదా మంగళం || 7 ||
రాహుః సింహళదేశపోఽపి సతమః కృష్ణాంగశూర్పాసనో
యః పైఠీనసగోత్రసంభవసమిద్దూర్వాముఖో దక్షిణః |
యః సర్పః పశుదైవతోఽఖిలగతః సూర్యగ్రహే ఛాదకః
షట్త్రిస్థః శుభకృచ్చ సింహకసుతః కుర్యాత్సదా మంగళం || 8 ||
కేతుర్జైమినిగోత్రజః కుశసమిద్వాయవ్యకోణేస్థిత-
-శ్చిత్రాంకధ్వజలాంఛనో హి భగవాన్ యో దక్షిణాశాముఖః |
బ్రహ్మా చైవ తు చిత్రగుప్తపతిమాన్ ప్రీత్యాధిదేవః సదా
షట్త్రిస్థః శుభకృచ్చ బర్బరపతిః కుర్యాత్సదా మంగళం || 9 ||