సుశాంతోవాచ |
జయ హరేఽమరాధీశసేవితం
తవ పదాంబుజం భూరిభూషణం |
కురు మమాగ్రతః సాధుసత్కృతం
త్యజ మహామతే మోహమాత్మనః || 1 ||
తవ వపుర్జగద్రూపసంపదా
విరచితం సతాం మానసే స్థితం |
రతిపతేర్మనో మోహదాయకం
కురు విచేష్టితం కామలంపటం || 2 ||
తవ యశో జగచ్ఛోకనాశకం
మృదుకథామృతం ప్రీతిదాయకం |
స్మితసుఖేక్షితం చంద్రవన్ముఖం
తవ కరోత్యలం లోకమంగళం || 3 ||
మమ పతిస్త్వయం సర్వదుర్జయో
యది తవాప్రియం కర్మణాచరేత్ |
జహి తదాత్మనః శత్రుముద్యతం
కురు కృపాం న చేదీదృగీశ్వరః || 4 ||
మహదహంయుతం పంచమాత్రయా
ప్రకృతిజాయయా నిర్మితం వపుః |
తవ నిరీక్షణాల్లీలయా జగ-
-త్స్థితిలయోదయం బ్రహ్మకల్పితం || 5 ||
భూవియన్మరుద్వారితేజసాం
రాశిభిః శరీరేంద్రియాశ్రితైః |
త్రిగుణయా స్వయా మాయయా విభో
కురు కృపాం భవత్సేవనార్థినాం || 6 ||
తవ గుణాలయం నామ పావనం
కలిమలాపహం కీర్తయంతి యే |
భవభయక్షయం తాపతాపితా
ముహురహో జనాః సంసరంతి నో || 7 ||
తవ జపః సతాం మానవర్ధనం
జినకులక్షయం దేవపాలకం |
కృతయుగార్పకం ధర్మపూరకం
కలికులాంతకం శం తనోతు మే || 8 ||
మమ గృహం ప్రతి పుత్రనప్తృకం
గజరథైర్ధ్వజైశ్చామరైర్ధనైః |
మణివరాసనం సత్కృతిం వినా
తవ పదాబ్జయోః శోభయంతి కిం || 9 ||
తవ జగద్వపుః సుందరస్మితం
ముఖమనిందితం సుందరాననం |
యది న మే ప్రియం వల్గుచేష్టితం
పరికరోత్యహో మృత్యురస్త్విహ || 10 ||
హయచర భయహర కరహరశరణ
ఖరతరవరశర దశబలదమన |
జయ హతపరభవ భరవరనాశన
శశధర శతసమరసభరమదన || 11 ||
ఇతి శ్రీకల్కిపురాణే శ్రీసుశాంతకృతం కల్కిస్తోత్రం |