గోప్య ఊచుః |
జయతి తేఽధికం జన్మనా వ్రజః
శ్రయత ఇందిరా శశ్వదత్ర హి |
దయిత దృశ్యతాం దిక్షు తావకా-
-స్త్వయి ధృతాసవస్త్వాం విచిన్వతే || 1 ||
శరదుదాశయే సాధుజాతసత్
సరసిజోదరశ్రీముషా దృశా |
సురతనాథ తేఽశుల్కదాసికా
వరద నిఘ్నతో నేహ కిం వధః || 2 ||
విషజలాప్యయాద్వ్యాలరాక్షసా-
-ద్వర్షమారుతాద్వైద్యుతానలాత్ |
వృషమయాత్మజాద్విశ్వతోభయా-
-దృషభ తే వయం రక్షితా ముహుః || 3 ||
న ఖలు గోపికానందనో భవా-
-నఖిలదేహినామంతరాత్మదృక్ |
విఖనసాఽర్థితో విశ్వగుప్తయే
సఖ ఉదేయివాన్ సాత్వతాం కులే || 4 ||
విరచితాభయం వృష్ణిధుర్య తే
చరణమీయుషాం సంసృతేర్భయాత్ |
కరసరోరుహం కాంత కామదం
శిరసి ధేహి నః శ్రీకరగ్రహం || 5 ||
వ్రజజనార్తిహన్ వీరయోషితాం
నిజజనస్మయ ధ్వంసనస్మిత |
భజ సఖే భవత్కింకరీః స్మ నో
జలరుహాననం చారు దర్శయ || 6 ||
ప్రణతదేహినాం పాపకర్శనం
తృణచరానుగం శ్రీనికేతనం |
ఫణిఫణార్పితం తే పదాంబుజం
కృణు కుచేషు నః కృంధి హృచ్ఛయం || 7 ||
మధురయా గిరా వల్గువాక్యయా
బుధమనోజ్ఞయా పుష్కరేక్షణ |
విధికరీరిమా వీర ముహ్యతీ-
-రధరసీధునాఽఽప్యాయయస్వ నః || 8 ||
తవ కథామృతం తప్తజీవనం
కవిభిరీడితం కల్మషాపహం |
శ్రవణమంగళం శ్రీమదాతతం
భువి గృణంతి తే భూరిదా జనాః || 9 ||
ప్రహసితం ప్రియ ప్రేమవీక్షణం
విహరణం చ తే ధ్యానమంగళం |
రహసి సంవిదో యా హృదిస్పృశః
కుహక నో మనః క్షోభయంతి హి || 10 ||
చలసి యద్వ్రజాచ్చారయన్ పశూన్
నళినసుందరం నాథ తే పదం |
శిలతృణాంకురైః సీదతీతి నః
కలిలతాం మనః కాంత గచ్ఛతి || 11 ||
దినపరిక్షయే నీలకుంతలై-
-ర్వనరుహాననం బిభ్రదావృతం |
ఘనరజస్వలం దర్శయన్ ముహు-
-ర్మనసి నః స్మరం వీర యచ్ఛసి || 12 ||
ప్రణతకామదం పద్మజార్చితం
ధరణిమండనం ధ్యేయమాపది |
చరణపంకజం శంతమం చ తే
రమణ నః స్తనేష్వర్పయాధిహన్ || 13 ||
సురతవర్ధనం శోకనాశనం
స్వరితవేణునా సుష్ఠు చుంబితం |
ఇతరరాగవిస్మారణం నృణాం
వితర వీర నస్తేఽధరామృతం || 14 ||
అటతి యద్భవానహ్ని కాననం
త్రుటిర్యుగాయతే త్వామపశ్యతాం |
కుటిలకుంతలం శ్రీముఖం చ తే
జడ ఉదీక్షతాం పక్ష్మకృద్దృశాం || 15 ||
పతిసుతాన్వయ భ్రాతృబాంధవా-
-నతివిలంఘ్య తేఽంత్యచ్యుతాగతాః |
గతివిదస్తవోద్గీతమోహితాః
కితవ యోషితః కస్త్యజేన్నిశి || 16 ||
రహసి సంవిదం హృచ్ఛయోదయం
ప్రహసితాననం ప్రేమవీక్షణం |
బృహదురః శ్రియో వీక్ష్య ధామ తే
ముహురతిస్పృహా ముహ్యతే మనః || 17 ||
వ్రజవనౌకసాం వ్యక్తిరంగ తే
వృజినహంత్ర్యలం విశ్వమంగళం |
త్యజ మనాక్ చ నస్త్వత్ స్పృహాత్మనాం
స్వజనహృద్రుజాం యన్నిషూదనం || 18 ||
యత్తే సుజాతచరణాంబురుహం స్తనేషు
భీతాః శనైః ప్రియ దధీమహి కర్కశేషు |
తేనాటవీమటసి తద్వ్యథతే న కింస్విత్
కూర్పాదిభిర్భ్రమతి ధీర్భవదాయుషాం నః || 19 ||
[** అధిక శ్లోకాః –
శ్రీ శుక ఉవాచ –
ఇతి గోప్యః ప్రగాయన్త్యః ప్రలపన్త్యశ్చచిత్రధా |
రురుదుః సుస్వరం రాజన్ కృష్ణదర్శనలాలసాః ||
తాసామావిరభూచ్ఛౌరిః స్మయమానముఖాంబుజః |
పీతాంబరధరః స్రగ్వీ సాక్షాన్మన్మథమన్మథః ||
**] ఇతి శ్రీమద్భాగవత మహాపురాణే పారమహంస్యాం సంహితాయాం దశమస్కంధే పూర్వార్ధే రాసక్రీడాయాం గోపీగీతం నామైకత్రింశోఽధ్యాయః ||