Agni Stotram (Markandeya Puranam) pdf download – అగ్ని స్తోత్రం

శాంతిరువాచ |
ఓం నమః సర్వభూతానాం సాధనాయ మహాత్మనే |
ఏకద్విపంచధిష్ట్యాయ రాజసూయే షడాత్మనే || 1 ||
నమః సమస్తదేవానాం వృత్తిదాయ సువర్చసే |
శుక్రరూపాయ జగతామశేషాణాం స్థితిప్రదః || 2 ||
త్వం ముఖం సర్వదేవానాం త్వయాత్తుం భగవన్హవిః |
ప్రీణయత్యఖిలాన్ దేవాన్ త్వత్ప్రాణాః సర్వదేవతాః || 3 ||
హుతం హవిస్త్వయ్యమలమేధత్వముపగచ్ఛతి |
తతశ్చ జలరూపేణ పరిణామముపైతి యత్ || 4 ||
తేనాఖిలౌషధీజన్మ భవత్యనిలసారథే |
ఔషధీభిరశేషాభిః సుఖం జీవంతి జంతవః || 5 ||
వితన్వతే నరా యజ్ఞాన్ త్వత్సృష్టాస్వోషధీషు చ |
యజ్ఞైర్దేవాస్తథా దైత్యాస్తద్వద్రక్షాంసి పావక || 6 ||
ఆప్యాయ్యంతే చ తే యజ్ఞాస్త్వదాధారా హుతాశన |
అతః సర్వస్య యోనిస్త్వం వహ్నే సర్వమయస్తథా || 7 ||
దేవతా దానవా యక్షా దైత్యా గంధర్వరాక్షసాః |
మానుషాః పశవో వృక్షా మృగపక్షిసరీసృపాః || 8 ||
ఆప్యాయ్యంతే త్వయా సర్వే సంవర్ధ్యంతే చ పావక |
త్వత్త ఏవోద్భవం యాంతి త్వయ్యంతే చ తథా లయం || 9 ||
అపః సృజసి దేవ త్వం త్వమత్సి పునరేవ తాః |
పచ్యమానాస్త్వయా తాశ్చ ప్రాణినాం పుష్టికారణం || 10 ||
దేవేషు తేజోరూపేణ కాంత్యా సిద్ధేష్వవస్థితః |
విషరూపేణ నాగేషు వాయురూపః పతత్త్రిషు || 11 ||
మనుజేషు భవాన్ క్రోధో మోహః పక్షిమృగాదిషు |
అవష్టంభోఽసి తరుషు కాఠిన్యం త్వం మహీం ప్రతి || 12 ||
జలే ద్రవత్వం భగవాన్ జలరూపీ తథాఽనిలే |
వ్యాపిత్వేన తథైవాగ్నే నభస్యాత్మా వ్యవస్థితః || 13 ||
త్వమగ్నే సర్వభూతానామంతశ్చరసి పాలయన్ |
త్వామేకమాహుః కవయస్త్వామాహుస్త్రివిధం పునః || 14 ||
త్వామష్టధా కల్పయిత్వా యజ్ఞవాహమకల్పయన్ |
త్వయా సృష్టమిదం విశ్వం వదంతి పరమర్షయః || 15 ||
త్వామృతే హి జగత్సర్వం సద్యో నశ్యేద్ధుతాశన |
తుభ్యం కృత్వా ద్విజః పూజాం స్వకర్మవిహితాం గతిం || 16 ||
ప్రయాతి హవ్యకవ్యాద్యైః స్వధాస్వాహాభ్యుదీరణాత్ |
పరిణామాత్మవీర్యా హి ప్రాణినామమరార్చిత || 17 ||
దహంతి సర్వభూతాని తతో నిష్క్రంయ హేతయః |
జాతవేదస్తవైవేయం విశ్వసృష్టిమహాద్యుతే || 18 ||
తవైవ వైదికం కర్మ సర్వభూతాత్మకం జగత్ |
నమస్తేఽనల పింగాక్ష నమస్తేఽస్తు హుతాశన || 19 ||
పావకాద్య నమస్తేఽస్తు నమస్తే హవ్యవాహన |
త్వమేవ భుక్తపీతానాం పాచనాద్విశ్వపావకః || 20 ||
శస్యానాం పాకకర్తా త్వం పోష్టా త్వం జగతస్తథా |
త్వమేవ మేఘస్త్వం వాయుస్త్వం బీజం శస్యహేతుకం || 21 ||
పోషాయ సర్వభూతానాం భూతభవ్యభవో హ్యసి |
త్వం జ్యోతిః సర్వభూతేషు త్వమాదిత్యో విభావసుః || 22 ||
త్వమహస్త్వం తథా రాత్రిరుభే సంధ్యే తథా భవాన్ |
హిరణ్యరేతాస్త్వం వహ్నే హిరణ్యోద్భవకారణం || 23 ||
హిరణ్యగర్భశ్చ భవాన్ హిరణ్యసదృశప్రభః |
త్వం ముహూర్తం క్షణశ్చ త్వం త్వం త్రుటిస్త్వం తథా లవః || 24 ||
కలాకాష్ఠానిమేషాదిరూపేణాసి జగత్ప్రభో |
త్వమేతదఖిలం కాలః పరిణామాత్మకో భవాన్ || 25 ||
యా జిహ్వా భవతః కాలీ కాలనిష్ఠాకరీ ప్రభో |
భయాన్నః పాహి పాపేభ్యః ఐహికాచ్చ మహాభయాత్ || 26 ||
కరాలీ నామ యా జిహ్వా మహాప్రలయకారణం |
తయా నః పాహి పాపేభ్యః ఐహికాచ్చ మహాభయాత్ || 27 ||
మనోజవా చ యా జిహ్వా లఘిమాగుణలక్షణా |
తయా నః పాహి పాపేభ్యః ఐహికాచ్చ మహాభయాత్ || 28 ||
కరోతి కామం భూతేభ్యో యా తే జిహ్వా సులోహితా |
తయా నః పాహి పాపేభ్యః ఐహికాచ్చ మహాభయాత్ || 29 ||
సుధూంరవర్ణా యా జిహ్వా ప్రాణినాం రోగదాహికా |
తయా నః పాహి పాపేభ్యః ఐహికాచ్చ మహాభయాత్ || 30 ||
స్ఫులింగినీ చ యా జిహ్వా యతః సకలపుద్గలాః |
తయా నః పాహి పాపేభ్యః ఐహికాచ్చ మహాభయాత్ || 31 ||
యా తే విశ్వా సదా జిహ్వా ప్రాణినాం శర్మదాయినీ |
తయా నః పాహి పాపేభ్యః ఐహికాచ్చ మహాభయాత్ || 32 ||
పింగాక్ష లోహితగ్రీవ కృష్ణవర్ణ హుతాశన |
త్రాహి మాం సర్వదోషేభ్యః సంసారాదుద్ధరేహ మాం || 33 ||
ప్రసీద వహ్నే సప్తార్చిః కృశానో హవ్యవాహన |
అగ్నిపావకశుక్రాది నామాష్టభిరుదీరితః || 34 ||
అగ్నేఽగ్రే సర్వభూతానాం సముద్భూత విభావసో |
ప్రసీద హవ్యవాహాఖ్య అభిష్టుత మయావ్యయ || 35 ||
త్వమక్షయో వహ్నిరచింత్యరూపః
సమృద్ధిమన్ దుష్ప్రసహోఽతితీవ్రః |
త్వమవ్యయం భీమమశేషలోకం
సమూర్తికో హంత్యథవాతివీర్యః || 36 ||
త్వముత్తమం సత్త్వమశేషసత్వ-
-హృత్పుండరీకస్త్వమనంతమీడ్యం |
త్వయా తతం విశ్వమిదం చరాచరం
హుతాశనైకో బహుధా త్వమత్ర || 37 ||
త్వమక్షయః సగిరివనా వసుంధరా
నభః ససోమార్కమహర్దివాఖిలం |
మహోదధేర్జఠరగతంచ వాడవో
భవాన్విభూత్యా పరయా కరే స్థితః || 38 ||
హుతాశనస్త్వమితి సదాభిపూజ్యసే
మహాక్రతౌ నియమపరైర్మహర్షిభిః |
అభిష్టుతః పివసి చ సోమమధ్వరే
వషట్కృతాన్యపి చ హవీం‍షి భూతయే || 39 ||
త్వం విప్రైః సతతమిహేజ్యసే ఫలార్థం
వేదాంగేష్వథ సకలేషు గీయసే త్వం |
త్వద్ధేతోర్యజనపరాయణా ద్విజేంద్రా
వేదాంగాన్యధిగమయంతి సర్వకాలే || 40 ||
త్వం బ్రహ్మా యజనపరస్తథైవ విష్ణుః
భూతేశః సురపతిరర్యమా జలేశః |
సూర్యేందు సకలసురాసురాశ్చ హవ్యైః
సంతోష్యాభిమతఫలాన్యథాప్నువంతి || 41 ||
అర్చిర్భిః పరమమహోపఘాతదుష్టం
సంస్పృష్టం తవ శుచి జాయతే సమస్తం |
స్నానానాం పరమమతీవ భస్మనా సత్
సంధ్యాయాం మునిభిరతీవ సేవ్యసే తత్ || 42 ||
ప్రసీద వహ్నే శుచినామధేయ
ప్రసీద వాయో విమలాతిదీప్తే |
ప్రసీద మే పావక వైద్యుతాద్య
ప్రసీద హవ్యాశన పాహి మాం త్వం || 43 ||
యత్తే వహ్నే శివం రూపం యే చ తే సప్త హేతయః |
తః పాహి నః స్తుతో దేవ పితా పుత్రమివాత్మజం || 44 ||
ఇతి శ్రీమార్కండేయపురాణే భౌత్యమన్వంతరే అగ్ని స్తోత్రం నామ ఏకోనశతోఽధ్యాయః ||