అచ్యుతాచ్యుత హరే పరమాత్మన్
రామ కృష్ణ పురుషోత్తమ విష్ణో |
వాసుదేవ భగవన్ననిరుద్ధ
శ్రీపతే శమయ దుఃఖమశేషం || 1 ||
విశ్వమంగళ విభో జగదీశ
నందనందన నృసింహ నరేంద్ర |
ముక్తిదాయక ముకుంద మురారే
శ్రీపతే శమయ దుఃఖమశేషం || 2 ||
రామచంద్ర రఘునాయక దేవ
దీననాథ దురితక్షయకారిన్ |
యాదవేంద్ర యదుభూషణ యజ్ఞ
శ్రీపతే శమయ దుఃఖమశేషం || 3 ||
దేవకీతనయ దుఃఖదవాగ్నే
రాధికారమణ రంయసుమూర్తే |
దుఃఖమోచన దయార్ణవ నాథ
శ్రీపతే శమయ దుఃఖమశేషం || 4 ||
గోపికావదనచంద్రచకోర
నిత్య నిర్గుణ నిరంజన జిష్ణో |
పూర్ణరూప జయ శంకర శర్వ
శ్రీపతే శమయ దుఃఖమశేషం || 5 ||
గోకులేశ గిరిధారణ ధీర
యామునాచ్ఛతటఖేలనవీర |
నారదాదిమునివందితపాద
శ్రీపతే శమయ దుఃఖమశేషం || 6 ||
ద్వారకాధిప దురంతగుణాబ్ధే
ప్రాణనాథ పరిపూర్ణ భవారే |
జ్ఞానగంయ గుణసాగర బ్రహ్మన్
శ్రీపతే శమయ దుఃఖమశేషం || 7 ||
దుష్టనిర్దళన దేవ దయాళో
పద్మనాభ ధరణీధర ధర్మిన్ |
రావణాంతక రమేశ మురారే
శ్రీపతే శమయ దుఃఖమశేషం || 8 ||
అచ్యుతాష్టకమిదం రమణీయం
నిర్మితం భవభయం వినిహంతుం |
యః పఠేద్విషయవృత్తినివృత్తి-
-ర్జన్మదుఃఖమఖిలం స జహాతి || 9 ||
ఇతి శ్రీమచ్ఛంకరాచార్య విరచితం శ్రీ అచ్యుతాష్టకం |