అంబ శశిబింబవదనే కంబుగ్రీవే కఠోరకుచకుంభే |
అంబరసమానమధ్యే శంబరరిపువైరిదేవి మాం పాహి || 1 ||
కుందముకులాగ్రదంతాం కుంకుమపంకేన లిప్తకుచభారాం |
ఆనీలనీలదేహామంబామఖిలాండనాయకీం వందే || 2 ||
సరిగమపధనిసతాంతాం వీణాసంక్రాంతచారుహస్తాం తాం |
శాంతాం మృదులస్వాంతాం కుచభరతాంతాం నమామి శివకాంతాం || 3 ||
అరటతటఘటికజూటీతాడితతాలీకపాలతాటంకాం |
వీణావాదనవేలాకంపితశిరసం నమామి మాతంగీం || 4 ||
వీణారసానుషంగం వికచమదామోదమాధురీభృంగం |
కరుణాపూరితరంగం కలయే మాతంగకన్యకాపాంగం || 5 ||
దయమానదీర్ఘనయనాం దేశికరూపేణ దర్శితాభ్యుదయాం |
వామకుచనిహితవీణాం వరదాం సంగీత మాతృకాం వందే || 6 ||
మాణిక్యవీణా ముపలాలయంతీం మదాలసాం మంజులవాగ్విలాసాం |
మాహేంద్రనీలద్యుతికోమలాంగీం మాతంగకన్యాం మనసా స్మరామి || 7 ||