దేవా ఊచుః |
నమోఽస్తు శశిసంకాశ నమస్తే జగతః పతే |
నమోఽస్తు దేవరూపాయ స్వర్గమార్గప్రదర్శక |
కర్మమార్గస్వరూపాయ సర్వగాయ నమో నమః || 1 ||
త్వయేయం పాల్యతే పృథ్వీ త్రైలోక్యం చ త్వయైవ హి |
జనస్తపస్తథా సత్యం త్వయా సర్వం తు పాల్యతే || 2 ||
న త్వయా రహితం కించిజ్జగత్స్థావరజంగమం |
విద్యతే త్వద్విహీనం తు సద్యో నశ్యతి వై జగత్ || 3 ||
త్వమాత్మా సర్వభూతానాం సతాం సత్త్వస్వరూపవాన్ |
రాజసానాం రజస్త్వం చ తామసానాం తమ ఏవ చ || 4 ||
చతుష్పాదో భవాన్ దేవ చతుఃశృంగస్త్రిలోచనః |
సప్తహస్తిస్త్రిబంధశ్చ వృషరూప నమోఽస్తు తే || 5 ||
త్వయా హీనా వయం దేవ సర్వ ఉన్మార్గవర్తినః |
తన్మార్గం యచ్ఛ మూఢానాం త్వం హి నః పరమాగతిః || 6 ||
ఏవం స్తుతస్తదా దేవైర్వృషరూపీ ప్రజాపతిః |
తుష్టః ప్రసన్నమనసా శాంతచక్షురపశ్యత || 7 ||
దృష్టమాత్రాస్తు తే దేవాః స్వయం ధర్మేణ చక్షుషా |
క్షణేన గతసంమోహాః సంయక్సద్ధర్మసంహితాః || 8 ||
అసురా అపి తద్వచ్చ తతో బ్రహ్మా ఉవాచ తం |
అద్యప్రభృతి తే ధర్మ తిథిరస్తు త్రయోదశీ || 9 ||
యస్తాముపోష్య పురుషో భవంతం సముపార్జయేత్ |
కృత్వా పాపసమాహారం తస్మాన్ముంచతి మానవః || 10 ||
యచ్చారణ్యమిదం ధర్మ త్వయా వ్యాప్తం చిరం ప్రభో |
తతో నాంనా భవిష్యే తద్ధర్మారణ్యమితి ప్రభో || 11 ||
చతుస్త్రిపాద్ద్వ్యేకపాచ్చ ప్రభో త్వం
కృతాదిభిర్లక్ష్యసే యేన లోకైః |
తథా తథా కర్మభూమౌ నభశ్చ
ప్రాయోయుక్తః స్వగృహం పాహి విశ్వం || 12 ||
ఇత్యుక్తమాత్రః ప్రపితామహోఽధునా
సురాసురాణామథ పశ్యతాం నృప |
అదృశ్యతామగమత్ స్వాలయాంశ్చ
జగ్ముః సురాః సవృషా వీతశోకాః || 13 ||
ధర్మోత్పత్తిం య ఇమాం శ్రావయీత
తదా శ్రాద్ధే తర్పయేత పితౄంశ్చ |
త్రయోదశ్యాం పాయసేన స్వశక్త్యా
స స్వర్గగామీ తు సురానుపేయాత్ || 14 ||
ఇతి శ్రీవరాహపురాణే భగవచ్ఛాస్త్రే ద్వాత్రింశోఽధ్యాయే ధర్మదేవతా స్తోత్రం ||