సదా గోపికామండలే రాజమానం
లసన్నృత్యబంధాదిలీలానిదానం |
గలద్దర్పకందర్పశోభాభిదానం
భజే నందసూనుం సదానందరూపం || 1 ||
వ్రజస్త్రీజనానందసందోహసక్తం
సుధావర్షివంశీనినాదానురక్తం |
త్రిభంగాకృతి స్వీకృతస్వీయభక్తం
భజే నందసూనుం సదానందరూపం || 2 ||
స్ఫురద్రాసలీలావిలాసాతిరంయం
పరిత్యక్తగేహాదిదాసైకగంయం |
విమానస్థితాశేషదేవాదినంయం
భజే నందసూనుం సదానందరూపం || 3 ||
స్వలీలారసానందదుగ్ధోదమగ్నం
ప్రియస్వామినీబాహుకంఠైకలగ్నం |
రసాత్మైకరూపాఽవబోధం త్రిభంగం
భజే నందసూనుం సదానందరూపం || 4 ||
రసామోదసంపాదకం మందహాసం
కృతాభీరనారీవిహారైకరాసం |
ప్రకాశీకృతస్వీయనానావిలాసం
భజే నందసూనుం సదానందరూపం || 5 ||
జితాఽనంగసర్వాంగశోభాభిరామం
క్షపాపూరితస్వామినీవృందకామం |
నిజాధీనతావర్తిరామాతివామం
భజే నందసూనుం సదానందరూపం || 6 ||
స్వసంగీకృతానంతగోపాలబాలం
వృతస్వీయగోపీమనోవృత్తిపాలం |
కృతానంతచౌర్యాదిలీలారసాలం
భజే నందసూనుం సదానందరూపం || 7 ||
ధృతాద్రీశగోవర్ధనాధారహస్తం
పరిత్రాతగోగోపగోపీసమస్తం |
సురాధీశసర్వాదిదేవప్రశస్తం
భజే నందసూనుం సదానందరూపం || 8 ||
ఇతి శ్రీహరిరాయాచార్య విరచితం శ్రీ కృష్ణ భుజంగప్రయాతాష్టకం |