అక్షరం పరమం బ్రహ్మ జ్యోతీరూపం సనాతనం |
గుణాతీతం నిరాకారం స్వేచ్ఛామయమనంతకం || 1 ||
భక్తధ్యానాయ సేవాయై నానారూపధరం వరం |
శుక్లరక్తపీతశ్యామం యుగానుక్రమణేన చ || 2 ||
శుక్లతేజః స్వరూపం చ సత్యే సత్యస్వరూపిణం |
త్రేతాయాం కుంకుమాకారం జ్వలంతం బ్రహ్మతేజసా || 3 ||
ద్వాపరే పీతవర్ణం చ శోభితం పీతవాససా |
కృష్ణవర్ణం కలౌ కృష్ణం పరిపూర్ణతమం ప్రభుం || 4 ||
నవధారాధరోత్కృష్టశ్యామసుందరవిగ్రహం |
నందైకనందనం వందే యశోదానందనం ప్రభుం || 5 ||
గోపికాచేతనహరం రాధాప్రాణాధికం పరం |
వినోదమురళీశబ్దం కుర్వంతం కౌతుకేన చ || 6 ||
రూపేణాప్రతిమేనైవ రత్నభూషణభూషితం |
కందర్పకోటిసౌందర్యం బిభ్రతం శాంతమీశ్వరం || 7 ||
క్రీడంతం రాధయా సార్ధం బృందారణ్యే చ కుత్రచిత్ |
కుత్రచిన్నిర్జనేఽరణ్యే రాధావక్షః స్థలస్థితం || 8 ||
జలక్రీడాం ప్రకుర్వంతం రాధయా సహ కుత్రచిత్ |
రాధికాకబరీభారం కుర్వంతం కుత్రచిద్వనే || 9 ||
కుత్రచిద్రాధికాపాదే దత్తవంతమలక్తకం |
రాధాచర్చితతాంబూలం గృహ్ణంతం కుత్రచిన్ముదా || 10 ||
పశ్యంతం కుత్రచిద్రాధాం పశ్యంతీం వక్రచక్షుషా |
దత్తవంతం చ రాధాయై కృత్వా మాలాం చ కుత్రచిత్ || 11 ||
కుత్రచిద్రాధయా సార్ధం గచ్ఛంతం రాసమండలం |
రాధాదత్తాం గళే మాలాం ధృతవంతం చ కుత్రచిత్ || 12 ||
సార్ధం గోపాలికాభిశ్చ విహరంతం చ కుత్రచిత్ |
రాధాం గృహీత్వా గచ్ఛంతం విహాయ తాం చ కుత్రచిత్ || 13 ||
విప్రపత్నీదత్తమన్నం భుక్తవంతం చ కుత్రచిత్ |
భుక్తవంతం తాళఫలం బాలకైః సహ కుత్రచిత్ || 14 ||
వస్త్రం గోపాలికానాం చ హరంతం కుత్రచిన్ముదా |
గవాం గణం వ్యాహరంతం కుత్రచిద్బాలకైః సహ || 15 ||
కాళీయమూర్ధ్ని పాదాబ్జం దత్తవంతం చ కుత్రచిత్ |
వినోదమురళీశబ్దం కుర్వంతం కుత్రచిన్ముదా || 16 ||
గాయంతం రంయసంగీతం కుత్రచిద్బాలకైః సహ |
స్తుత్వా శక్రః స్తవేంద్రేణ ప్రణనామ హరిం భియా || 17 ||
పురా దత్తేన గురుణా రణే వృత్రాసురేణ చ |
కృష్ణేన దత్తం కృపయా బ్రహ్మణే చ తపస్యతే || 18 ||
ఏకాదశాక్షరో మంత్రః కవచం సర్వలక్షణం |
దత్తమేతత్ కుమారాయ పుష్కరే బ్రహ్మణా పురా || 19 ||
కుమారోఽంగిరసే దత్తం గురవేఽంగిరసాం మునే |
ఇదమింద్రకృతం స్తోత్రం నిత్యం భక్త్యా చ యః పఠేత్ || 20 ||
స హి ప్రాప్య దృఢాం భక్తిమంతే దాస్యం లభేద్ధ్రువం |
జన్మమృత్యుజరావ్యాధిశోకేభ్యో ముచ్యతే నరః |
న హి పశ్యతి స్వప్నేఽపి యమదూతం యమాలయం || 21 ||
ఇతి శ్రీబ్రహ్మవైవర్తే మహాపురాణే శ్రీకృష్ణజన్మఖండే ఏకవింశోఽధ్యాయే ఇంద్రకృత శ్రీ కృష్ణ స్తోత్రం |