క్వ ప్రాసూత కదా త్వాం గౌరీ న ప్రామాణ్యం తవ జననే |
విప్రాః ప్రాహురజం గణరాజం యః ప్రాచామపి పూర్వతమః || 1 ||
నాసి గణపతే శంకరాత్మజో భాసి తద్వదేవాఖిలాత్మకః |
ఈశతా తవానీశతా నృణాం కేశవేరితా సాశయోక్తిభిః || 2 ||
గజముఖ తావకమంత్ర మహింనా సృజతి జగద్విధిరనుకల్పం |
భజతి హరిస్త్వాం తదవనకృత్యే యజతి హరోఽపి విరామవిధౌ || 3 ||
సుఖయతి శతమఖముఖసురనికరానఖిలక్రతు విఘ్నఘ్నోఽయం |
నిఖిలజగజ్జీవకజీవనదః స ఖలు యతః పర్జన్యాత్మా || 4 ||
ప్రారంభే కార్యాణాం హేరంబం యో ధ్యాయేత్ |
పారం యాత్యేవ కృతేరారాదాప్నోతి సుఖం || 5 ||
గౌరీసూనోః పాదాంభోజే లీనా చేతోవృత్తిర్మే |
ఘోరే సంసారారణ్యే వాసః కైలాసే వాస్తు || 6 ||
గుహగురు పదయుగమనిశమభయదం |
వహసి మనసి యది శమయసి దురితం || 7 ||
జయ జయ శంకరవరసూనో భయహర భజతాం గణరాజ |
నయ మమ చేతస్తవ చరణం నియమయ ధర్మేఽంతః కరణం || 8 ||
చలసి చిత్త కిన్ను విషమవిషయకాననే
కలయ వృత్తిమమృత దాతృకరివరాననే |
తులయ ఖేదమోదయుగళమిదమశాశ్వతం
విలయ భయమలంఘ్యమేవ జన్మని స్మృతం || 9 ||
సోమశేఖరసూనవే సిందూరసోదరభానవే
యామినీపతిమౌళయే యమిహృదయవిరచితకేళయే |
మూషకాధిపగామినే ముఖ్యాత్మనోఽంతర్యామినే
మంగళం విఘ్నద్విషే మత్తేభవక్త్రజ్యోతిషే || 10 ||
అవధీరితదాడిమసుమ సౌభగమవతు గణేశజ్యోతి-
-ర్మామవతు గణేశజ్యోతిః |
హస్తచతుష్టయధృత వరదాభయ పుస్తకబీజాపూరం
ధృత పుస్తకబీజాపూరం || 11 ||
రజతాచల వప్రక్రీడోత్సుక గజరాజాస్యముదారం
భజ శ్రీగజరాజాస్యముదారం |
ఫణిపరికృత కటివలయాభరణం కృణు రే జనహృదికారణం
తవ కృణు రే జనహృదికారణం || 12 ||
యః ప్రగే గజరాజమనుదినమప్రమేయమనుస్మరేత్ |
స ప్రయాతి పవిత్రితాంగో విప్రగంగాద్యధికతాం || 13 ||
సుబ్రహ్మణ్యమనీషివిరచితా త్వబ్రహ్మణ్యమపాకురుతే |
గణపతిగీతా గానసముచితా సంయక్పఠతాం సిద్ధాంతః || 14 ||
ఇతి శ్రీసుబ్రహ్మణ్యయోగి విరచిత శ్రీ గణపతి గీతా ||