సుదర్శన మహాజ్వాల ప్రసీద జగతః పతే |
తేజోరాశే ప్రసీద త్వం కోటిసూర్యామితప్రభ || 1 ||
అజ్ఞానతిమిరధ్వంసిన్ ప్రసీద పరమాద్భుత |
సుదర్శన నమస్తేఽస్తు దేవానాం త్వం సుదర్శన || 2 ||
అసురాణాం సుదుర్దర్శ పిశాచానాం భయంకర |
భంజకాయ నమస్తేఽస్తు సర్వేషామపి తేజసాం || 3 ||
శాంతానామపి శాంతాయ ఘోరాయ చ దురాత్మనాం |
చక్రాయ చక్రరూపాయ పరచక్రాయ మాయినే || 4 ||
హతయే హేతిరూపాయ హేతీనాం పతయే నమః |
కాలాయ కాలరూపాయ కాలచక్రాయ తే నమః || 5 ||
ఉగ్రాయ చోగ్రరూపాయ క్రుద్ధోల్కాయ నమో నమః |
సహస్రారాయ శూరాయ సహస్రాక్షాయ తే నమః || 6 ||
సహస్రాక్షాది పూజ్యాయ సహస్రారశిరసే నమః |
జ్యోతిర్మండలరూపాయ జగత్త్రితయ ధారిణే || 7 ||
త్రినేత్రాయ త్రయీ ధాంనే నమస్తేఽస్తు త్రిరూపిణే |
త్వం యజ్ఞస్త్వం వషట్కారః త్వం బ్రహ్మా త్వం ప్రజాపతిః || 8 ||
త్వమేవ వహ్నిస్త్వం సూర్యః త్వం వాయుస్త్వం విశాం పతిః |
ఆదిమధ్యాంతశూన్యాయ నాభిచక్రాయ తే నమః || 9 ||
జ్ఞానవిజ్ఞానరూపాయ ధ్యాన ధ్యేయస్వరూపిణే |
చిదానందస్వరూపాయ ప్రకృతేః పృథగాత్మనే || 10 ||
చరాచరాణాం భూతానాం సృష్టిస్థిత్యంతకారిణే |
సర్వేషామపి భూతానాం త్వమేవ పరమాగతిః || 11 ||
త్వయైవ సర్వం సర్వేశ భాసతే సకలం జగత్ |
త్వదీయేన ప్రసాదేన భాస్కరోఽస్మి సుదర్శన || 12 ||
త్వత్తేజసాం ప్రభావేన మమ తేజో హతం ప్రభో |
భూయః సంహర తేజస్త్వం అవిషహ్యం సురాసురైః || 13 ||
త్వత్ప్రసాదాదహం భూయః భవిష్యామి ప్రభాన్వితః |
క్షమస్వ తే నమస్తేఽస్తు అపరాధం కృతం మయా |
భక్తవత్సల సర్వేశ ప్రణమామి పునః పునః || 14 ||
ఇతి స్తుతో భానుమతా సుదర్శనః
హతప్రభేణాద్భుత ధామ వైభవః |
శశామ ధాంనాతిశయేన ధాంనాం
సహస్రభానౌ కృపయా ప్రసన్నః || 15 ||
ఇతి భవిష్యోత్తరపురాణే కుంభకోణమాహాత్ంయే సూర్య కృత శ్రీ సుదర్శన స్తోత్రం |