సుదర్శనశ్చక్రరాజః తేజోవ్యూహో మహాద్యుతిః |
సహస్రబాహుర్దీప్తాంగః అరుణాక్షః ప్రతాపవాన్ || 1 ||
అనేకాదిత్యసంకాశః ప్రోద్యజ్జ్వాలాభిరంజితః |
సౌదామినీసహస్రాభో మణికుండలశోభితః || 2 ||
పంచభూతమనోరూపో షట్కోణాంతరసంస్థితః |
హరాంతఃకరణోద్భూతరోషభీషణవిగ్రహః || 3 ||
హరిపాణిలసత్పద్మవిహారారమనోహరః |
శ్రాకారరూపః సర్వజ్ఞః సర్వలోకార్చితప్రభుః || 4 ||
చతుర్దశసహస్రారః చతుర్వేదమయోఽనలః |
భక్తచాంద్రమసజ్యోతిః భవరోగవినాశకః || 5 ||
రేఫాత్మకో మకారశ్చ రక్షోసృగ్రూషితాంగకః |
సర్వదైత్యగ్రీవనాలవిభేదనమహాగజః || 6 ||
భీమదంష్ట్రోజ్జ్వలాకారో భీమకర్మా త్రిలోచనః |
నీలవర్త్మా నిత్యసుఖో నిర్మలశ్రీర్నిరంజనః || 7 ||
రక్తమాల్యాంబరధరో రక్తచందనరూషితః |
రజోగుణాకృతిః శూరో రక్షఃకులయమోపమః || 8 ||
నిత్యక్షేమకరః ప్రాజ్ఞః పాషండజనఖండనః |
నారాయణాజ్ఞానువర్తీ నైగమాంతఃప్రకాశకః || 9 ||
బలినందనదోర్దండఖండనో విజయాకృతిః |
మిత్రభావీ సర్వమయో తమోవిధ్వంసకస్తథా || 10 ||
రజస్సత్త్వతమోద్వర్తీ త్రిగుణాత్మా త్రిలోకధృత్ |
హరిమాయాగుణోపేతో అవ్యయోఽక్షస్వరూపభాక్ || 11 ||
పరమాత్మా పరంజ్యోతిః పంచకృత్యపరాయణః |
జ్ఞానశక్తిబలైశ్వర్యవీర్యతేజఃప్రభామయః || 12 ||
సదసత్పరమః పూర్ణో వాఙ్మయో వరదోఽచ్యుతః |
జీవో గురుర్హంసరూపః పంచాశత్పీఠరూపకః || 13 ||
మాతృకామండలాధ్యక్షో మధుధ్వంసీ మనోమయః |
బుద్ధిరూపశ్చిత్తసాక్షీ సారో హంసాక్షరద్వయః || 14 ||
మంత్రయంత్రప్రభావజ్ఞో మంత్రయంత్రమయో విభుః |
స్రష్టా క్రియాస్పదః శుద్ధః ఆధారశ్చక్రరూపకః || 15 ||
నిరాయుధో హ్యసంరంభః సర్వాయుధసమన్వితః |
ఓంకారరూపీ పూర్ణాత్మా ఆంకారఃసాధ్యబంధనః || 16 ||
ఐంకారో వాక్ప్రదో వాగ్మీ శ్రీంకారైశ్వర్యవర్ధనః |
క్లీంకారమోహనాకారో హుంఫట్‍క్షోభణాకృతిః || 17 ||
ఇంద్రార్చితమనోవేగో ధరణీభారనాశకః |
వీరారాధ్యో విశ్వరూపో వైష్ణవో విష్ణురూపకః || 18 ||
సత్యవ్రతః సత్యపరః సత్యధర్మానుషంగకః |
నారాయణకృపావ్యూహతేజశ్చక్రః సుదర్శనః || 19 ||
ఇతి శ్రీ సుదర్శనాష్టోత్తరశతనామ స్తోత్రం |