అస్య శ్రీతులసీకవచస్తోత్రమంత్రస్య శ్రీమహాదేవ ఋషిః, అనుష్టుప్ఛందః శ్రీతులసీదేవతా, మమ ఈప్సితకామనా సిద్ధ్యర్థే జపే వినియోగః |
తులసీ శ్రీమహాదేవి నమః పంకజధారిణి |
శిరో మే తులసీ పాతు ఫాలం పాతు యశస్వినీ || 1 ||
దృశౌ మే పద్మనయనా శ్రీసఖీ శ్రవణే మమ |
ఘ్రాణం పాతు సుగంధా మే ముఖం చ సుముఖీ మమ || 2 ||
జిహ్వాం మే పాతు శుభదా కంఠం విద్యామయీ మమ |
స్కంధౌ కల్హారిణీ పాతు హృదయం విష్ణువల్లభా || 3 ||
పుణ్యదా మే పాతు మధ్యం నాభిం సౌభాగ్యదాయినీ |
కటిం కుండలినీ పాతు ఊరూ నారదవందితా || 4 ||
జననీ జానునీ పాతు జంఘే సకలవందితా |
నారాయణప్రియా పాదౌ సర్వాంగం సర్వరక్షిణీ || 5 ||
సంకటే విషమే దుర్గే భయే వాదే మహాహవే |
నిత్యం హి సంధ్యయోః పాతు తులసీ సర్వతః సదా || 6 ||
ఇతీదం పరమం గుహ్యం తులస్యాః కవచామృతం |
మర్త్యానామమృతార్థాయ భీతానామభయాయ చ || 7 ||
మోక్షాయ చ ముముక్షూణాం ధ్యాయినాం ధ్యానయోగకృత్ |
వశాయ వశ్యకామానాం విద్యాయై వేదవాదినాం || 8 ||
ద్రవిణాయ దరిద్రాణాం పాపినాం పాపశాంతయే |
అన్నాయ క్షుధితానాం చ స్వర్గాయ స్వర్గమిచ్ఛతాం || 9 ||
పశవ్యం పశుకామానాం పుత్రదం పుత్రకాంక్షిణాం |
రాజ్యాయ భ్రష్టరాజ్యానామశాంతానాం చ శాంతయే || 10 ||
భక్త్యర్థం విష్ణుభక్తానాం విష్ణౌ సర్వాంతరాత్మని |
జాప్యం త్రివర్గసిద్ధ్యర్థం గృహస్థేన విశేషతః || 11 ||
ఉద్యంతం చండకిరణముపస్థాయ కృతాంజలిః |
తులసీ కాననే తిష్ఠాన్నాసీనో వా జపేదిదం || 12 ||
సర్వాన్కామానవాప్నోతి తథైవ మమ సన్నిధిం |
మమ ప్రియకరం నిత్యం హరిభక్తివివర్ధనం || 13 ||
యా స్యాన్మృతప్రజానారీ తస్యా అంగం ప్రమార్జయేత్ |
సా పుత్రం లభతే దీర్ఘజీవినం చాప్యరోగిణం || 14 ||
వంధ్యాయా మార్జయేదంగం కుశైర్మంత్రేణ సాధకః |
సాఽపి సంవత్సరాదేవ గర్భం ధత్తే మనోహరం || 15 ||
అశ్వత్థే రాజవశ్యార్థీ జపేదగ్నేః సురూపభాక్ |
పలాశమూలే విద్యార్థీ తేజోఽర్థ్యభిముఖో రవేః || 16 ||
కన్యార్థీ చండికాగేహే శత్రుహత్యై గృహే మమ |
శ్రీకామో విష్ణుగేహే చ ఉద్యానే స్త్రీవశా భవేత్ || 17 ||
కిమత్ర బహునోక్తేన శృణు సైన్యేశ తత్త్వతః |
యం యం కామమభిధ్యాయేత్తం తం ప్రాప్నోత్యసంశయం || 18 ||
మమ గేహగతస్త్వం తు తారకస్య వధేచ్ఛయా |
జపన్ స్తోత్రం చ కవచం తులసీగతమానసః || 19 ||
మండలాత్తారకం హంతా భవిష్యసి న సంశయః || 20 ||
ఇతి శ్రీబ్రహ్మాండపురాణే తులసీమహాత్ంయే తులసీకవచం సంపూర్ణం |