బలిరువాచ |
అనంతస్యాప్రమేయస్య విశ్వమూర్తేర్మహాత్మనః |
నమామి చక్రిణశ్చక్రం కరసంగి సుదర్శనం || 1 ||
సహస్రమివ సూర్యాణాం సంఘాతం విద్యుతామివ |
కాలాగ్నిమివ యచ్చక్రం తద్విష్ణోః ప్రణమాంయహం || 2 ||
దుష్టరాహుగలచ్ఛేదశోణితారుణతారకం |
తన్నమామి హరేశ్చక్రం శతనేమి సుదర్శనం || 3 ||
యస్యారకేషు శక్రాద్యా లోకపాలా వ్యవస్థితాః |
తదంతర్వసవో రుద్రాస్తథైవ మరుతాం గణాః || 4 ||
ధారాయాం ద్వాదశాదిత్యాః సమస్తాశ్చ హుతాశనాః |
ధారాజాలేఽబ్ధయః సర్వే నాభిమధ్యే ప్రజాపతిః || 5 ||
సమస్తనేమిష్వఖిలా యస్య విద్యాః ప్రతిష్ఠితాః |
యస్య రూపమనిర్దేశ్యమపి యోగిభిరుత్తమైః || 6 ||
యద్భ్రమత్సురసంఘానాం తేజసః పరిబృంహణం |
దైత్యౌజసాం చ నాశాయ తన్నమామి సుదర్శనం || 7 ||
భ్రమన్మతమహావేగవిభ్రాంతాఖిలఖేచరం |
తన్నమామి హరేశ్చక్రమనంతారం సుదర్శనం || 8 ||
నక్షత్రవద్వహ్నికణవ్యాప్తం కృత్స్నం నభస్తలం |
తన్నమామి హరేశ్చక్రం కరసంగి సుదర్శనం || 9 ||
స్వభావతేజసా యుక్తం యదర్కాగ్నిమయం మహత్ |
విశేషతో హరేర్గత్వా సర్వదేవమయం కరం || 10 ||
దుర్వృత్తదైత్యమథనం జగతః పరిపాలకం |
తన్నమామి హరేశ్చక్రం దైత్యచక్రహరం పరం || 11 ||
కరోతు మే సదా శర్మ ధర్మతాం చ ప్రయాతు మే |
ప్రసాదసుముఖే కృష్ణే తస్య చక్రం సుదర్శనం || 12 ||
స్వభావతేజసా యుక్తం మధ్యాహ్నార్కసమప్రభం |
ప్రసీద సంయుగేఽరిణాం సుదర్శనసుదర్శనం || 13 ||
విద్యుజ్జ్వాలామహాకక్షం దహాంతర్మమ యత్తమః |
జహి నో విషయగ్రాహి మనో గ్రహవిచేష్టితం |
విస్ఫోటయాఖిలాం మాయాం కురుష్వ విమలాం మతిం || 14 ||
ఇతి విష్ణుధర్మేషు అష్టసప్తతితమోఽధ్యాయే బలి కృత చక్ర స్తవః |