కవీశ్వర నమస్తుభ్యం హవ్యకవ్యవిదాం వర |
ఉపాసక సరస్వత్యా మృతసంజీవనప్రియ || 1 ||
దైత్యపూజ్య నమస్తుభ్యం దైత్యేంద్రశాసనకర |
నీతిశాస్త్రకలాభిజ్ఞ బలిజీవప్రభావన || 2 ||
ప్రహ్లాదపరమాహ్లాద విరోచనగురో సిత |
ఆస్ఫూర్జిజ్జితశిష్యారే నమస్తే భృగునందన || 3 ||
సురాశన సురారాతిచిత్తసంస్థితిభావన |
ఉశనా సకలప్రాణిప్రాణాశ్రయ నమోఽస్తు తే || 4 ||
నమస్తే ఖేచరాధీశ శుక్ర శుక్లయశస్కర |
వారుణ వారుణీనాథ ముక్తామణిసమప్రభ || 5 ||
క్షీబచిత్త కచోద్భూతిహేతో జీవరిపో నమః |
దేవయానీయయాతీష్ట దుహితృస్థేయవత్సల || 6 ||
వహ్నికోణపతే తుభ్యం నమస్తే ఖగనాయక |
త్రిలోచన తృతీయాక్షిసంస్థిత శుకవాహన || 7 ||
ఇత్థం దైత్యగురోః స్తోత్రం యః స్మరేన్మానవః సదా |
దశాదౌ గోచరే తస్య భవేద్విఘ్నహరః సితః || 8 ||
సోమతుల్యా ప్రభా యస్య చాసురాణాం గురుస్తథా |
జేతా యః సర్వశత్రూణాం స కావ్యః ప్రీయతాం మమ || 9 ||