Sri Ramapati Ashtakam pdf download – శ్రీ రమాపత్యష్టకం

జగదాదిమనాదిమజం పురుషం
శరదంబరతుల్యతనుం వితనుం |
ధృతకంజరథాంగగదం విగదం
ప్రణమామి రమాధిపతిం తమహం || 1 ||
కమలాననకంజరతం విరతం
హృది యోగిజనైః కలితం లలితం |
కుజనైః సుజనైరలభం సులభం
ప్రణమామి రమాధిపతిం తమహం || 2 ||
మునిబృందహృదిస్థపదం సుపదం
నిఖిలాధ్వరభాగభుజం సుభుజం |
హృతవాసవముఖ్యమదం విమదం
ప్రణమామి రమాధిపతిం తమహం || 3 ||
హృతదానవదృప్తబలం సుబలం
స్వజనాస్తసమస్తమలం విమలం |
సమపాస్త గజేంద్రదరం సుదరం
ప్రణమామి రమాధిపతిం తమహం || 4 ||
పరికల్పితసర్వకలం వికలం
సకలాగమగీతగుణం విగుణం |
భవపాశనిరాకరణం శరణం
ప్రణమామి రమాధిపతిం తమహం || 5 ||
మృతిజన్మజరాశమనం కమనం
శరణాగతభీతిహరం దహరం |
పరిపుష్టమహాహృదయం సుదయం
ప్రణమామి రమాధిపతిం తమహం || 6 ||
సకలావనిబింబధరం స్వధరం
పరిపూరితసర్వదిశం సుదృశం |
గతశోకమశోకకరం సుకరం
ప్రణమామి రమాధిపతిం తమహం || 7 ||
మథితార్ణవరాజరసం సరసం
గ్రథితాఖిలలోకహృదం సుహృదం |
ప్రథితాద్భుతశక్తిగుణం సుగుణం
ప్రణమామి రమాధిపతిం తమహం || 8 ||
సుఖరాశికరం భవబంధహరం
పరమాష్టకమేతదనన్యమతిః |
పఠతీహ తు యోఽనిశమేవ నరో
లభతే ఖలు విష్ణుపదం స పరం || 9 ||
ఇతి శ్రీమత్పరమహంస స్వామి బ్రహ్మానంద విరచితం శ్రీ రమాపత్యష్టకం |