రాధా రాసేశ్వరీ రాసవాసినీ రసికేశ్వరీ |
కృష్ణప్రాణాధికా కృష్ణప్రియా కృష్ణస్వరూపిణీ || 1 ||
కృష్ణవామాంగసంభూతా పరమానందరూపిణీ |
కృష్ణా వృందావనీ వృందా వృందావనవినోదినీ || 2 ||
చంద్రావళీ చంద్రకాంతా శరచ్చంద్రప్రభాననా |
నామాన్యేతాని సారాణి తేషామభ్యంతరాణి చ || 3 ||
రాధేత్యేవం చ సంసిద్ధా రాకారో దానవాచకః |
స్వయం నిర్వాణదాత్రీ యా సా రాధా పరికీర్తితా || 4 ||
రా చ రాసే చ భవనాద్ధా ఏవ ధారణాదహో |
హరేరాలింగనాదారాత్తేన రాధా ప్రకీర్తితా || 5 ||
రాసేశ్వరస్య పత్నీయం తేన రాసేశ్వరీ స్మృతా |
రాసే చ వాసో యస్యాశ్చ తేన సా రాసవాసినీ || 6 ||
సర్వాసాం రసికానాం చ దేవీనామీశ్వరీ పరా |
ప్రవదంతి పురా సంతస్తేన తాం రసికేశ్వరీం || 7 ||
ప్రాణాధికా ప్రేయసీ సా కృష్ణస్య పరమాత్మనః |
కృష్ణప్రాణాధికా సా చ కృష్ణేన పరికీర్తితా || 8 ||
కృష్ణాస్యాతిప్రియా కాంతా కృష్ణో వాఽస్యాః ప్రియః సదా |
సర్వైర్దేవగణైరుక్తా తేన కృష్ణప్రియా స్మృతా || 9 ||
కృష్ణరూపం సంవిధాతుం యా శక్తా చావలీలయా |
సర్వాంశైః కృష్ణసదృశీ తేన కృష్ణస్వరూపిణీ || 10 ||
వామాంగార్ధేన కృష్ణస్య యా సంభూతా పరా సతీ |
కృష్ణవామాంగసంభూతా తేన కృష్ణేన కీర్తితా || 11 ||
పరమానందరాశిశ్చ స్వయం మూర్తిమతీ సతీ |
శ్రుతిభిః కీర్తితా తేన పరమానందరూపిణీ || 12 ||
కృషిర్మోక్షార్థవచనో ణ ఏవోత్కృష్టవాచకః |
ఆకారో దాతృవచనస్తేన కృష్ణా ప్రకీర్తితా || 13 ||
అస్తి వృందావనం యస్యాస్తేన వృందావనీ స్మృతా |
వృందావనస్యాధిదేవీ తేన వాఽథ ప్రకీర్తితా || 14 ||
సంఘః సఖీనాం వృందః స్యాదకారోఽప్యస్తివాచకః |
సఖివృందోఽస్తి యస్యాశ్చ సా వృందా పరికీర్తితా || 15 ||
వృందావనే వినోదశ్చ సోఽస్యా హ్యస్తి చ తత్ర వై |
వేదా వదంతి తాం తేన వృందావనవినోదినీం || 16 ||
నఖచంద్రావళీవక్త్రచంద్రోఽస్తి యత్ర సంతతం |
తేన చంద్రవళీ సా చ కృష్ణేన పరికీర్తితా || 17 ||
కాంతిరస్తి చంద్రతుల్యా సదా యస్యా దివానిశం |
సా చంద్రకాంతా హర్షేణ హరిణా పరికీర్తితా || 18 ||
శరచ్చంద్రప్రభా యస్యాశ్చాఽఽననేఽస్తి దివానిశం |
మునినా కీర్తితా తేన శరచ్చంద్రప్రభాననా || 19 ||
ఇదం షోడశనామోక్తమర్థవ్యాఖ్యానసంయుతం |
నారాయణేన యద్దత్తం బ్రహ్మణే నాభిపంకజే || 20 ||
బ్రహ్మణా చ పురా దత్తం ధర్మాయ జనకాయ మే |
ధర్మేణ కృపయా దత్తం మహ్యమాదిత్యపర్వణి || 21 ||
పుష్కరే చ మహాతీర్థే పుణ్యాహే దేవసంసది |
రాధాప్రభావప్రస్తావే సుప్రసన్నేన చేతసా || 22 ||
ఇదం స్తోత్రం మహాపుణ్యం తుభ్యం దత్తం మయా మునే |
నిందకాయాఽవైష్ణవాయ న దాతవ్యం మహామునే || 23 ||
యావజ్జీవమిదం స్తోత్రం త్రిసంధ్యం యః పఠేన్నరః |
రాధామాధవయోః పాదపద్మే భక్తిర్భవేదిహ || 24 ||
అంతే లభేత్తయోర్దాస్యం శశ్వత్ సహచరో భవేత్ |
అణిమాదికసిద్ధిం చ సంప్రాప్య నిత్యవిగ్రహం || 25 ||
వ్రతదానోపవాసైశ్చ సర్వైర్నియమపూర్వకైః |
చతుర్ణాం చైవ వేదానాం పాఠైః సర్వార్థసంయుతైః || 26 ||
సర్వేషాం యజ్ఞతీర్థానాం కరణైర్విధిబోధితైః |
ప్రదక్షిణేన భుమేశ్చ కృత్స్నాయా ఏవ సప్తధా || 27 ||
శరణాగతరక్షాయామజ్ఞానాం జ్ఞానదానతః |
దేవానాం వైష్ణవానాం చ దర్శనేనాపి యత్ ఫలం || 28 ||
తదేవ స్తోత్రపాఠస్య కలాం నార్హతి షోడశీం |
స్తోత్రస్యాస్య ప్రభావేణ జీవన్ముక్తో భవేన్నరః || 29 ||
ఇతి శ్రీబ్రహ్మవైవర్తే మహాపురాణే శ్రీకృష్ణజన్మఖండే సప్తదశోఽధ్యాయే శ్రీనారాయణకృత శ్రీ రాధా షోడశనామ వర్ణనం ||