అహోబిలం నారసింహం గత్వా రామః ప్రతాపవాన్ |
నమస్కృత్వా శ్రీనృసింహం అస్తౌషీత్ కమలాపతిం || 1 ||
గోవింద కేశవ జనార్దన వాసుదేవ
విశ్వేశ విశ్వ మధుసూదన విశ్వరూప |
శ్రీపద్మనాభ పురుషోత్తమ పుష్కరాక్ష
నారాయణాచ్యుత నృసింహ నమో నమస్తే || 2 ||
దేవాః సమస్తాః ఖలు యోగిముఖ్యాః
గంధర్వ విద్యాధర కిన్నరాశ్చ |
యత్పాదమూలం సతతం నమంతి
తం నారసింహం శరణం గతోఽస్మి || 3 ||
వేదాన్ సమస్తాన్ ఖలు శాస్త్రగర్భాన్
విద్యాబలే కీర్తిమతీం చ లక్ష్మీం |
యస్య ప్రసాదాత్ సతతం లభంతే
తం నారసింహం శరణం గతోఽస్మి || 4 ||
బ్రహ్మా శివస్త్వం పురుషోత్తమశ్చ
నారాయణోఽసౌ మరుతాం పతిశ్చ |
చంద్రార్క వాయ్వగ్ని మరుద్గణాశ్చ
త్వమేవ తం త్వాం సతతం నతోఽస్మి || 5 ||
స్వప్నేఽపి నిత్యం జగతాం త్రయాణాం
స్రష్టా చ హంతా విభురప్రమేయః |
త్రాతా త్వమేకస్త్రివిధో విభిన్నః
తం త్వాం నృసింహం సతతం నతోఽస్మి || 6 ||
ఇతి స్తుత్వా రఘుశ్రేష్ఠః పూజయామాస తం విభుం |
పుష్పవృష్టిః పపాతాశు తస్య దేవస్య మూర్ధని |
సాధు సాధ్వితి తం ప్రోచుః దేవా ఋషిగణైః సహ || 7 ||
దేవాః ఊచుః |
రాఘవేణ కృతం స్తోత్రం పంచామృతమనుత్తమం |
పఠంతి యే ద్విజవరాస్తేషాం స్వర్గస్తు శాశ్వతః || 8 ||
ఇతి శ్రీరామ కృత శ్రీ నృసింహ పంచామృత స్తోత్రం |