మాతంగి మాతరీశే మధుమదమథనారాధితే మహామాయే |
మోహిని మోహప్రమథిని మన్మథమథనప్రియే నమస్తేఽస్తు || 1 ||
స్తుతిషు తవ దేవి విధిరపి పిహితమతిర్భవతి విహితమతిః |
తదపి తు భక్తిర్మామపి భవతీం స్తోతుం విలోభయతి || 2 ||
యతిజనహృదయనివాసే వాసవవరదే వరాంగి మాతంగి |
వీణావాదవినోదిని నారదగీతే నమో దేవి || 3 ||
దేవి ప్రసీద సుందరి పీనస్తని కంబుకంఠి ఘనకేశి |
మాతంగి విద్రుమౌష్ఠి స్మితముగ్ధాక్ష్యంబ మౌక్తికాభరణే || 4 ||
భరణే త్రివిష్టపస్య ప్రభవసి తత ఏవ భైరవీ త్వమసి |
త్వద్భక్తిలబ్ధవిభవో భవతి క్షుద్రోఽపి భువనపతిః || 5 ||
పతితః కృపణో మూకోఽప్యంబ భవత్యాః ప్రసాదలేశేన |
పూజ్యః సుభగో వాగ్మీ భవతి జడశ్చాపి సర్వజ్ఞః || 6 ||
జ్ఞానాత్మికే జగన్మయి నిరంజనే నిత్యశుద్ధపదే |
నిర్వాణరూపిణి శివే త్రిపురే శరణం ప్రపన్నస్త్వాం || 7 ||
త్వాం మనసి క్షణమపి యో ధ్యాయతి ముక్తామణీవృతాం శ్యామాం |
తస్య జగత్త్రితయేఽస్మిన్ కాస్తాః నను యాః స్త్రియోఽసాధ్యాః || 8 ||
సాధ్యాక్షరేణ గర్భితపంచనవత్యక్షరాంచితే మాతః |
భగవతి మాతంగీశ్వరి నమోఽస్తు తుభ్యం మహాదేవి || 9 ||
విద్యాధరసురకిన్నరగుహ్యకగంధర్వయక్షసిద్ధవరైః |
ఆరాధితే నమస్తే ప్రసీద కృపయైవ మాతంగి || 10 ||
వీణావాదనవేలానర్తదలాబుస్థగిత వామకుచాం |
శ్యామలకోమలగాత్రీం పాటలనయనాం స్మరామి త్వాం || 11 ||
అవటుతటఘటితచూలీతాడితతాలీపలాశతాటంకాం |
వీణావాదనవేలాకంపితశిరసం నమామి మాతంగీం || 12 ||
మాతా మరకతశ్యామా మాతంగీ మదశాలినీ |
కటాక్షయతు కల్యాణీ కదంబవనవాసినీ || 13 ||
వామే విస్తృతిశాలిని స్తనతటే విన్యస్తవీణాముఖం
తంత్రీం తారవిరావిణీమసకలైరాస్ఫాలయంతీ నఖైః |
అర్ధోన్మీలదపాంగమంసవలితగ్రీవం ముఖం బిభ్రతీ
మాయా కాచన మోహినీ విజయతే మాతంగకన్యామయీ || 14 ||
వీణావాద్యవినోదనైకనిరతాం లీలాశుకోల్లాసినీం
బింబోష్ఠీం నవయావకార్ద్రచరణామాకీర్ణకేశావళిం |
హృద్యాంగీం సితశంఖకుండలధరాం శృంగారవేషోజ్జ్వలాం
మాతంగీం ప్రణతోఽస్మి సుస్మితముఖీం దేవీం శుకశ్యామలాం || 15 ||
స్రస్తం కేసరదామభిః వలయితం ధంమిల్లమాబిభ్రతీ
తాలీపత్రపుటాంతరేషు ఘటితైస్తాటంకినీ మౌక్తికైః |
మూలే కల్పతరోర్మహామణిమయే సింహాసనే మోహినీ
కాచిద్గాయనదేవతా విజయతే వీణావతీ వాసనా || 16 ||
వేణీమూలవిరాజితేందుశకలాం వీణానినాదప్రియాం
క్షోణీపాలసురేంద్రపన్నగవరైరారాధితాంఘ్రిద్వయాం |
ఏణీచంచలలోచనాం సువసనాం వాణీం పురాణోజ్జ్వలాం
శ్రోణీభారభరాలసామనిమిషః పశ్యామి విశ్వేశ్వరీం || 17 ||
మాతంగీస్తుతిరియమన్వహం ప్రజప్తా
జంతూనాం వితరతి కౌశలం క్రియాసు |
వాగ్మిత్వం శ్రియమధికాం చ గానశక్తిం
సౌభాగ్యం నృపతిభిరర్చనీయతాం చ || 18 ||
ఇతి మంత్రకోశే శ్రీ మాతంగీ స్తుతిః |