శ్రీకంఠప్రేమపుత్రాయ గౌరీవామాంకవాసినే |
ద్వాత్రింశద్రూపయుక్తాయ శ్రీగణేశాయ మంగళం || 1 ||
ఆదిపూజ్యాయ దేవాయ దంతమోదకధారిణే |
వల్లభాప్రాణకాంతాయ శ్రీగణేశాయ మంగళం || 2 ||
లంబోదరాయ శాంతాయ చంద్రగర్వాపహారిణే |
గజాననాయ ప్రభవే శ్రీగణేశాయ మంగళం || 3 ||
పంచహస్తాయ వంద్యాయ పాశాంకుశధరాయ చ |
శ్రీమతే గజకర్ణాయ శ్రీగణేశాయ మంగళం || 4 ||
ద్వైమాతురాయ బాలాయ హేరంబాయ మహాత్మనే |
వికటాయాఖువాహాయ శ్రీగణేశాయ మంగళం || 5 ||
పృశ్నిశృంగాయాజితాయ క్షిప్రాభీష్టార్థదాయినే |
సిద్ధిబుద్ధి ప్రమోదాయ శ్రీగణేశాయ మంగళం || 6 ||
విలంబియజ్ఞసూత్రాయ సర్వవిఘ్ననివారిణే |
దూర్వాదళసుపూజ్యాయ శ్రీగణేశాయ మంగళం || 7 ||
మహాకాయాయ భీమాయ మహాసేనాగ్రజన్మనే |
త్రిపురారివరోద్ధాత్రే శ్రీగణేశాయ మంగళం || 8 ||
సిందూరరంయవర్ణాయ నాగబద్ధోదరాయ చ |
ఆమోదాయ ప్రమోదాయ శ్రీగణేశాయ మంగళం || 9 ||
విఘ్నకర్త్రే దుర్ముఖాయ విఘ్నహర్త్రే శివాత్మనే |
సుముఖాయైకదంతాయ శ్రీగణేశాయ మంగళం || 10 ||
సమస్తగణనాథాయ విష్ణవే ధూమకేతవే |
త్ర్యక్షాయ ఫాలచంద్రాయ శ్రీగణేశాయ మంగళం || 11 ||
చతుర్థీశాయ మాన్యాయ సర్వవిద్యాప్రదాయినే |
వక్రతుండాయ కుబ్జాయ శ్రీగణేశాయ మంగళం || 12 ||
తుండినే కపిలాఖ్యాయ శ్రేష్ఠాయ ఋణహారిణే |
ఉద్దండోద్దండరూపాయ శ్రీగణేశాయ మంగళం || 13 ||
కష్టహర్త్రే ద్విదేహాయ భక్తేష్టజయదాయినే |
వినాయకాయ విభవే శ్రీగణేశాయ మంగళం || 14 ||
సచ్చిదానందరూపాయ నిర్గుణాయ గుణాత్మనే |
వటవే లోకగురవే శ్రీగణేశాయ మంగళం || 15 ||
శ్రీచాముండాసుపుత్రాయ ప్రసన్నవదనాయ చ |
శ్రీరాజరాజసేవ్యాయ శ్రీగణేశాయ మంగళం || 16 ||
శ్రీచాముండాకృపాపాత్ర శ్రీకృష్ణేంద్రవినిర్మితాం |
విభూతిమాతృకారంయాం కల్యాణైశ్వర్యదాయినీం || 17 ||
శ్రీమహాగణనాథస్య శూభాం మంగళమాలికాం |
యః పఠేత్సతతం వాణీం లక్ష్మీం సిద్ధిమవాప్నుయాత్ || 18 ||
ఇతి శ్రీకృష్ణరాజేంద్రకృత శ్రీమహాగణపతి మంగళమాలికా స్తోత్రం |