Sri Kalika Swaroopa Stuti pdf download – శ్రీ కాళికా స్వరూప స్తుతిః

సితతరసంవిదవాప్యం సదసత్కలనావిహీనమనుపాధి |
జయతి జగత్త్రయరూపం నీరూపం దేవి తే రూపం || 1 ||
ఏకమనేకాకారం ప్రసృతజగద్వ్యాప్తివికృతిపరిహీనం |
జయతి తవాద్వయరూపం విమలమలం చిత్స్వరూపాఖ్యం || 2 ||
జయతి తవోచ్ఛలదంతః స్వచ్ఛేచ్ఛాయాః స్వవిగ్రహగ్రహణం |
కిమపి నిరుత్తరసహజస్వరూపసంవిత్ప్రకాశమయం || 3 ||
వాంత్వా సమస్తకాలం భూత్యా ఝంకారఘోరమూర్తిమపి |
నిగ్రహమస్మిన్ కృత్వానుగ్రహమపి కుర్వతీ జయసి || 4 ||
కాలస్య కాలి దేహం విభజ్య మునిపంచసంఖ్యయా భిన్నం |
స్వస్మిన్ విరాజమానం తద్రూపం కుర్వతీ జయసి || 5 ||
భైరవరూపీ కాలః సృజతి జగత్కారణాదికీటాంతం |
ఇచ్ఛావశేన యస్యాః సా త్వం భువనాంబికా జయసి || 6 ||
జయతి శశాంకదివాకరపావకధామత్రయాంతరవ్యాపి |
జనని తవ కిమపి విమలం స్వరూపరూపం పరంధామ || 7 ||
ఏకం స్వరూపరూపం ప్రసరస్థితివిలయభేదస్త్రివిధం |
ప్రత్యేకముదయసంస్థితిలయవిశ్రమతశ్చతుర్విధం తదపి || 8 ||
ఇతి వసుపంచకసంఖ్యం విధాయ సహజస్వరూపమాత్మీయం |
విశ్వవివర్తావర్తప్రవర్తక జయతి తే రూపం || 9 ||
సదసద్విభేదసూతేర్దలనపరా కాపి సహజసంవిత్తిః |
ఉదితా త్వమేవ భగవతి జయసి జయాద్యేన రూపేణ || 10 ||
జయతి సమస్తచరాచరవిచిత్రవిశ్వప్రపంచరచనోర్మి |
అమలస్వభావజలధౌ శాంతం కాంతం చ తే రూపం || 11 ||
సహజోల్లాసవికాసప్రపూరితాశేషవిశ్వవిభవైషా |
పూర్ణా తవాంబ మూర్తిర్జయతి పరానందసంపూర్ణా || 12 ||
కవలితసకలజగత్రయవికటమహాకాలకవలనోద్యుక్తా |
ఉపభుక్తభావవిభవప్రభవాపి కృశోదరీ జయసి || 13 ||
రూపత్రయపరివర్జితమసమం రూపత్రయాంతరవ్యాపి |
అనుభవరూపమరూపం జయతి పరం కిమపి తే రూపం || 14 ||
అవ్యయమకులమమేయం విగలితసదసద్వివేకకల్లోలం |
జయతి ప్రకాశవిభవస్ఫీతం కాల్యాః పరం ధామ || 15 ||
ఋతుమునిసంఖ్యం రూపం విభజ్య పంచప్రకారమేకైకం |
దివ్యౌఘముద్గిరంతీ జయతి జగత్తారిణీ జననీ || 16 ||
భూదిగ్గోఖగదేవీచక్రసంజ్ఞానవిభవపరిపూర్ణం |
నిరుపమవిశ్రాంతిమయం శ్రీపీఠం జయతి తే రూపం || 17 ||
ప్రలయలయాంతరభూమౌ విలసితసదసత్ప్రపంచపరిహీనాం |
దేవి నిరుత్తరతరాం నౌమి సదా సర్వతః ప్రకటాం || 18 ||
యాదృఙ్మహాశ్మశానే దృష్టం దేవ్యాః స్వరూపమకులస్థం |
తాదృగ్ జగత్రయమిదం భవతు తవాంబ ప్రసాదేన || 19 ||
ఇత్థం స్వరూపస్తుతిరభ్యధాయి
సంయక్సమావేశదశావశేన |
మయా శివేనాస్తు శివాయ సంయక్
మమైవ విశ్వస్య తు మంగళాయ || 20 ||
ఇతి శ్రీశ్రీజ్ఞాననేత్రపాద రచితం శ్రీ కాళికా స్వరూప స్తుతిః |