ఏకదా సుఖమాసీనం శంకరం లోకశంకరం |
పప్రచ్ఛ గిరిజాకాంతం కర్పూరధవళం శివం || 1 ||
పార్వత్యువాచ |
భగవన్ దేవదేవేశ లోకనాథ జగద్గురో |
శోకాకులానాం లోకానాం కేన రక్షా భవేద్ధ్రువం || 2 ||
సంగ్రామే సంకటే ఘోరే భూతప్రేతాదికే భయే |
దుఃఖదావాగ్నిసంతప్తచేతసాం దుఃఖభాగినాం || 3 ||
ఈశ్వర ఉవాచ |
శృణు దేవి ప్రవక్ష్యామి లోకానాం హితకాంయయా |
విభీషణాయ రామేణ ప్రేంణా దత్తం చ యత్పురా || 4 ||
కవచం కపినాథస్య వాయుపుత్రస్య ధీమతః |
గుహ్యం తే సంప్రవక్ష్యామి విశేషాచ్ఛృణు సుందరి || 5 ||
అస్య శ్రీహనుమత్ కవచస్తోత్రమంత్రస్య శ్రీరామచంద్ర ఋషిః అనుష్టుప్ ఛందః శ్రీమహావీరో హనుమాన్ దేవతా, మారుతాత్మజ ఇతి బీజం, ఓం అంజనాసూనురితి శక్తిః, ఓం హ్రైం హ్రాం హ్రౌం ఇతి కవచం స్వాహా ఇతి కీలకం లక్ష్మణప్రాణదాతా ఇతి బీజం మమ సకలకార్యసిద్ధ్యర్థే జపే వినియోగః ||
కరన్యాసః –
ఓం హ్రాం అంగుష్ఠాభ్యాం నమః |
ఓం హ్రీం తర్జనీభ్యాం నమః |
ఓం హ్రూం మధ్యమాభ్యాం నమః |
ఓం హ్రైం అనామికాభ్యాం నమః |
ఓం హ్రౌం కనిష్ఠికాభ్యాం నమః |
ఓం హ్రః కరతలకరపృష్ఠాభ్యాం నమః |
అంగన్యాసః –
ఓం అంజనాసూనవే హృదయాయ నమః |
ఓం రుద్రమూర్తయే శిరసే స్వాహా |
ఓం వాయుసుతాత్మనే శిఖాయై వషట్ |
ఓం వజ్రదేహాయ కవచాయ హుం |
ఓం రామదూతాయ నేత్రత్రయాయ వౌషట్ |
ఓం బ్రహ్మాస్త్రనివారణాయ అస్త్రాయ ఫట్ |
దిగ్బంధః –
ఓం రామదూతాయ విద్మహే కపిరాజాయ ధీమహి | తన్నో హనుమాన్ ప్రచోదయాత్ ||
ఓం హుం ఫట్ స్వాహా | ఇతి దిగ్బంధః ||
ధ్యానం –
ధ్యాయేద్బాలదివాకరద్యుతినిభం దేవారిదర్పాపహం
దేవేంద్రప్రముఖప్రశస్తయశసం దేదీప్యమానం రుచా |
సుగ్రీవాదిసమస్తవానరయుతం సువ్యక్తతత్త్వప్రియం
సంరక్తారుణలోచనం పవనజం పీతాంబరాలంకృతం || 1 ||
ఉద్యన్మార్తండకోటిప్రకటరుచియుతం చారువీరాసనస్థం
మౌంజీయజ్ఞోపవీతారుణరుచిరశిఖాశోభితం కుండలాంగం |
భక్తానామిష్టదం తం ప్రణతమునిజనం వేదనాదప్రమోదం
ధ్యాయేద్దేవం విధేయం ప్లవగకులపతిం గోష్పదీభూతవార్ధిం || 2 ||
వజ్రాంగం పింగకేశాఢ్యం స్వర్ణకుండలమండితం |
నియుద్ధకర్మకుశలం పారావారపరాక్రమం || 3 ||
వామహస్తే మహావృక్షం దశాస్యకరఖండనం |
ఉద్యద్దక్షిణదోర్దండం హనుమంతం విచింతయే || 4 ||
స్ఫటికాభం స్వర్ణకాంతిం ద్విభుజం చ కృతాంజలిం |
కుండలద్వయసంశోభిముఖాంభోజం హరిం భజేత్ || 5 ||
ఉద్యదాదిత్యసంకాశముదారభుజవిక్రమం |
కందర్పకోటిలావణ్యం సర్వవిద్యావిశారదం || 6 ||
శ్రీరామహృదయానందం భక్తకల్పమహీరుహం |
అభయం వరదం దోర్భ్యాం కలయే మారుతాత్మజం || 7 ||
అన్యాజిత నమస్తేఽస్తు నమస్తే రామపూజిత |
ప్రస్థానం చ కరిష్యామి సిద్ధిర్భవతు మే సదా || 8 ||
యో వారాంనిధిమల్పపల్వలమివోల్లంఘ్య ప్రతాపాన్వితో
వైదేహీఘనశోకతాపహరణో వైకుంఠతత్త్వప్రియః |
అక్షాద్యూర్జితరాక్షసేశ్వరమహాదర్పాపహారీ రణే |
సోఽయం వానరపుంగవోఽవతు సదా యుష్మాన్ సమీరాత్మజః || 9 ||
వజ్రాంగం పింగకేశం కనకమయలసత్కుండలాక్రాంతగండం
నానావిద్యాధినాథం కరతలవిధృతం పూర్ణకుంభం దృఢం చ |
భక్తాభీష్టాధికారం నిహతనరభుజం సర్వదా సుప్రసన్నం
త్రైలోక్యత్రాణహేతుం సకలభువనగం రామదూతం నమామి || 10 ||
ఉద్యల్లాంగూలకేశప్రచలజలధరం భీమమూర్తిం కపీంద్రం
వందే రామాంఘ్రిపద్మభ్రమణపరివృతం తత్త్వసారం ప్రసన్నం |
వజ్రాంగం వజ్రరూపం కనకమయలసత్కుండలాక్రాంతగండం
దంభోలిస్తంభసారప్రహరణవికటం భూతరక్షోఽధినాథం || 11 ||
వామే కరే వీరగదాం వహంతం
శైలం చ దక్షే నిజకంఠలగ్నం |
దధానమాసాద్య సువర్ణవర్ణం
భజే జ్వలత్కుండల రామదూతం || 12 ||
పద్మరాగమణికుండలత్విషా
పాటలీకృతకపోలమండలం |
దివ్యదేహ కదళీవనాంతరే
భావయామి పవమాననందనం || 13 ||
ఈశ్వర ఉవాచ |
ఇతి వదతి విశేషాద్రాఘవో రాక్షసేంద్రం
ప్రముదితవరచిత్తో రావణస్యానుజో హి |
రఘువరవరదూతం పూజయామాస భూయః
స్తుతిభిరతికృతార్థం స్వం పరం మన్యమానః || 14 ||
వందే విద్యుద్వలయసుభగం స్వర్ణయజ్ఞోపవీతం
కర్ణద్వంద్వే కనకరుచిరే కుండలే ధారయంతం |
ఉచ్చైర్హృష్యద్ద్యుమణికిరణశ్రేణిసంభావితాంగం
సత్కౌపీనం కపివరవృతం కామరూపం కపీంద్రం || 15 ||
మనోజవం మారుతతుల్యవేగం
జితేంద్రియం బుద్ధిమతాం వరిష్ఠం |
వాతాత్మజం వానరయూథముఖ్యం
శ్రీరామదూతం సతతం స్మరామి || 16 ||
న్యాసః –
ఓం నమో భగవతే హృదయాయ నమః |
ఓం ఆంజనేయాయ శిరసే స్వాహా |
ఓం రుద్రమూర్తయే శిఖాయై వషట్ |
ఓం రామదూతాయ కవచాయ హుం |
ఓం హనుమతే నేత్రత్రయాయ వౌషట్ |
ఓం అగ్నిగర్భాయ అస్త్రాయ ఫట్ |
ఓం నమో భగవతే అంగుష్ఠాభ్యాం నమః |
ఓం ఆంజనేయాయ తర్జనీభ్యాం నమః |
ఓం రుద్రమూర్తయే మధ్యమాభ్యాం నమః |
ఓం వాయుసూనవే అనామికాభ్యాం నమః |
ఓం హనుమతే కనిష్ఠికాభ్యాం నమః |
ఓం అగ్నిగర్భాయ కరతలకరపృష్ఠాభ్యాం నమః |
మంత్రాః –
ఓం ఐం హ్రౌం హ్రాం హ్రీం హ్రూం హ్రైం హ్రౌం హ్రః |
ఓం హ్రీం హ్రౌం ఓం నమో భగవతే మహాబలపరాక్రమాయ భూత ప్రేత పిశాచ శాకినీ డాకినీ యక్షిణీ పూతనా మారీ మహామారీ భైరవ యక్ష వేతాళ రాక్షస గ్రహరాక్షసాదికం క్షణేన హన హన భంజయ భంజయ మారయ మారయ శిక్షయ శిక్షయ మహామాహేశ్వర రుద్రావతార హుం ఫట్ స్వాహా || 1 ||
ఓం నమో భగవతే హనుమదాఖ్య రుద్రాయ సర్వదుష్టజనముఖస్తంభనం కురు కురు హ్రాం హ్రీం హ్రః ఠంఠంఠం ఫట్ స్వాహా || 2 ||
ఓం నమో భగవతే అంజనీగర్భసంభూతాయ రామలక్ష్మణానందకరాయ కపిసైన్యప్రకాశనాయ పర్వతోత్పాటనాయ సుగ్రీవసాధకాయ రణోచ్చాటనాయ కుమారబ్రహ్మచారిణే గంభీరశబ్దోదయాయ ఓం హ్రాం హ్రీం హ్రః సర్వదుష్టనివారణాయ స్వాహా || 3 ||
ఓం నమో హనుమతే సర్వగ్రహాన్ భూతభవిష్యద్వర్తమానాన్ దూరస్థాన్ సమీపస్థాన్ సర్వకాల దుష్టదుర్బుద్ధీనుచ్చాటయోచ్చాటయ పరబలాని క్షోభయ క్షోభయ మమ సర్వకార్యం సాధయ సాధయ హనుమతే ఓం హ్రాం హ్రీం హ్రూం ఫట్ జహి ఓం శివం సిద్ధం హ్రాం హ్రీం హ్రౌం ఓం స్వాహా || 4 ||
ఓం నమో హనుమతే పరకృత యంత్రమంత్ర పరాహంకార భూత ప్రేత పిశాచ పరదృష్టి విఘ్నదుర్జనచేటకవిద్యా సర్వగ్రహభయాన్ నివారయ నివారయ వధ వధ పచ పచ దల దల చిలు చిలు కిల కిల సర్వకుయంత్రాణి దుష్టవాచం ఫట్ స్వాహా || 5 ||
ఓం నమో హనుమతే పాహి పాహి ఏహి ఏహి సర్వగ్రహభూతానాం శాకినీడాకినీనాం జ్వల జ్వల ప్రజ్వల ప్రజ్వల భూతమండలం ప్రేతమండలం పిశాచమండలం నివారయ నివారయ భూతజ్వర ప్రేతజ్వర చాతుర్థికజ్వర విషమజ్వర మాహేశ్వరజ్వరాన్ ఛింధి ఛింధి భింధి భింధి అక్షిశూల వక్షఃశూల శిరోఽభ్యంతరశూల గుల్మశూల పిత్తశూల బ్రహ్మరాక్షసకుల పరకుల నాగకుల విషం నాశయ నాశయ నిర్విషం కురు కురు ఫట్ స్వాహా | ఓం హ్రీం సర్వదుష్టగ్రహాన్ నివారయ ఫట్ స్వాహా || 6 ||
ఓం నమో హనుమతే పవనపుత్రాయ వైశ్వానరముఖాయ హన హన అంత్యాదృష్ట్యా పాపదృష్టిం దుష్టదృష్టిం హన హన హనుమదాజ్ఞయా స్ఫుర స్ఫుర ఫట్ స్వాహా || 7 ||
శ్రీరామచంద్ర ఉవాచ |
హనుమాన్ పూర్వతః పాతు దక్షిణే పవనాత్మజః |
పాతు ప్రతీచ్యాం రక్షోఘ్నః ఉత్తరస్యామబ్ధిపారగః || 1 ||
ఉదీచ్యామూర్ధ్వగః పాతు కేసరీప్రియనందనః |
అధశ్చ విష్ణుభక్తస్తు పాతు మధ్యం చ పావనిః || 2 ||
అవాంతరదిశః పాతు సీతాశోకవినాశనః |
లంకావిదాహకః పాతు సర్వాపద్భ్యో నిరంతరం || 3 ||
సుగ్రీవసచివః పాతు మస్తకం వాయునందనః |
భాలం పాతు మహావీరో భ్రువోర్మధ్యే నిరంతరం || 4 ||
నేత్రే ఛాయాపహారీ చ పాతు నః ప్లవగేశ్వరః |
కపోలౌ కర్ణమూలే తు పాతు శ్రీరామకింకరః || 5 ||
నాసాగ్రంజనీసూనుర్వక్త్రం పాతు హరీశ్వరః |
వాచం రుద్రప్రియః పాతు జిహ్వాం పింగళలోచనః || 6 ||
పాతు దంతాన్ ఫాల్గునేష్టశ్చిబుకం దైత్యప్రాణహృత్ |
పాతు కంఠం చ దైత్యారిః స్కంధౌ పాతు సురార్చితః || 7 ||
భుజౌ పాతు మహాతేజాః కరౌ తు చరణాయుధః |
నఖాన్నఖాయుధః పాతు కుక్షిం పాతు కపీశ్వరః || 8 ||
వక్షో ముద్రాపహారీ చ పాతు పార్శ్వే భుజాయుధః |
లంకావిభంజనః పాతు పృష్ఠదేశం నిరంతరం || 9 ||
నాభిం చ రామదూతస్తు కటిం పాత్వనిలాత్మజః |
గుహ్మం పాతు మహాప్రాజ్ఞః సక్థినీ చ శివప్రియః || 10 ||
ఊరూ చ జానునీ పాతు లంకాప్రాసాదభంజనః |
జంఘే పాతు మహాబాహుర్గుల్ఫౌ పాతు మహాబలః || 11 ||
అచలోద్ధారకః పాతు పాదౌ భాస్కరసన్నిభః |
పాదాంతే సర్వసత్వాఢ్యః పాతు పాదాంగుళీస్తథా || 12 ||
సర్వాంగాని మహావీరః పాతు రోమాణి చాత్మవాన్ |
హనుమత్ కవచం యస్తు పఠేద్విద్వాన్ విచక్షణః || 13 ||
స ఏవ పురుషః శ్రేష్ఠో భుక్తిం ముక్తిం చ విందతి |
త్రికాలమేకకాలం వా పఠేన్మాసత్రయం సదా || 14 ||
సర్వాన్ రిపూన్ క్షణే జిత్వా స పుమాన్ శ్రియమాప్నుయాత్ |
మధ్యరాత్రే జలే స్థిత్వా సప్తవారం పఠేద్యది || 15 ||
క్షయాఽపస్మార కుష్ఠాది తాపత్రయనివారణం |
అర్కవారేఽశ్వత్థమూలే స్థిత్వా పఠతిః యః పుమాన్ || 16 ||
స ఏవ జయమాప్నోతి సంగ్రామేష్వభయం తథా |
అచలాం శ్రియమాప్నోతి సంగ్రామే విజయీ భవేత్ || 17 ||
యః కరే ధారయేన్నిత్యం స పుమాన్ శ్రియమాప్నుయాత్ |
వివాహే దివ్యకాలే చ ద్యూతే రాజకులే రణే || 18 ||
భూతప్రేతమహాదుర్గే రణే సాగరసంప్లవే |
దశవారం పఠేద్రాత్రౌ మితాహారీ జితేంద్రియః || 19 ||
విజయం లభతే లోకే మానవేషు నరాధిపః |
సింహవ్యాఘ్రభయే చాగ్నౌ శరశస్త్రాస్త్రయాతనే || 20 ||
శృంఖలాబంధనే చైవ కారాగ్రహనియంత్రణే |
కాయస్తంభే వహ్నిదాహే గాత్రరోగే చ దారుణే || 21 ||
శోకే మహారణే చైవ బ్రహ్మగ్రహవినాశనే |
సర్వదా తు పఠేన్నిత్యం జయమాప్నోత్యసంశయం || 22 ||
భూర్జే వా వసనే రక్తే క్షౌమే వా తాళపత్రకే |
త్రిగంధేనాథవా మష్యా లిఖిత్వా ధారయేన్నరః || 23 ||
పంచసప్తత్రిలోహైర్వా గోపితం కవచం శుభం |
గళే కట్యాం బాహుమూలే కంఠే శిరసి ధారితం |
సర్వాన్ కామానవాప్నోతి సత్యం శ్రీరామభాషితం || 24 ||
ఇతి శ్రీబ్రహ్మాండపురాణే శ్రీ ఏకముఖ హనుమత్ కవచం ||
Sri Ekamukha Hanumath Kavacham pdf download – శ్రీ ఏకముఖ హనుమత్ కవచం
Author
Pavan Teja
పవన్ తేజ రచయితగా సినిమాలు, రాజకీయం, ఆరోగ్యం, వ్యాయామం, అందం, ధర్మం, విజ్ఞాన శాస్త్రం, సాంకేతికత, డబ్బు సంపాదించే మార్గాలు, ఆంగ్లం నుండి తెలుగు అనువాదం మొదలైన అంశాలలో అనుభవం పొందాడు. అతను గతంలో తెలుగు సినిమా విశ్లేషకుడిగా పని చేశాడు. ప్రస్తుతం అసిస్టెంట్ డైరెక్టర్ గా పనిచేస్తున్నాడు.
