ధ్యానం –
వ్యాఖ్యారుద్రాక్షమాలే కలశసురభితే బాహుభిర్వామపాదం
బిభ్రాణో జానుమూర్ధ్నా వటతరునివృతావస్యధో విద్యమానః |
సౌవర్ణే యోగపీఠే లిపిమయకమలే సూపవిష్టస్త్రిణేత్రః
క్షీరాభశ్చంద్రమౌళిర్వితరతు నితరాం శుద్ధబుద్ధిం శివో నః ||
స్తోత్రం –
విద్యారూపీ మహాయోగీ శుద్ధజ్ఞానీ పినాకధృత్ |
రత్నాలంకృతసర్వాంగో రత్నమాలీ జటాధరః || 1 ||
గంగాధార్యచలావాసీ సర్వజ్ఞానీ సమాధిధృత్ |
అప్రమేయో యోగనిధిస్తారకో భక్తవత్సలః || 2 ||
బ్రహ్మరూపీ జగద్వ్యాపీ విష్ణుమూర్తిః పురాంతకః |
ఉక్షవాహశ్చర్మవాసాః పీతాంబరవిభూషణః || 3 ||
మోక్షసిద్ధిర్మోక్షదాయీ దానవారిర్జగత్పతిః |
విద్యాధారీ శుక్లతనుః విద్యాదాయీ గణాధిపః || 4 ||
పాపాపస్మృతిసంహర్తా శశిమౌళిర్మహాస్వనః |
సామప్రియః స్వయం సాధుః సర్వదేవైర్నమస్కృతః || 5 ||
హస్తవహ్నిధరః శ్రీమాన్ మృగధారీ చ శంకరః |
యజ్ఞనాథః క్రతుధ్వంసీ యజ్ఞభోక్తా యమాంతకః || 6 ||
భక్తానుగ్రహమూర్తిశ్చ భక్తసేవ్యో వృషధ్వజః |
భస్మోద్ధూళితసర్వాంగోఽప్యక్షమాలాధరో మహాన్ || 7 ||
త్రయీమూర్తిః పరం బ్రహ్మ నాగరాజైరలంకృతః |
శాంతరూపో మహాజ్ఞానీ సర్వలోకవిభూషణః || 8 ||
అర్ధనారీశ్వరో దేవో మునిసేవ్యః సురోత్తమః |
వ్యాఖ్యానదేవో భగవాన్ అగ్నిచంద్రార్కలోచనః || 9 ||
జగత్స్రష్టా జగద్గోప్తా జగద్ధ్వంసీ త్రిలోచనః |
జగద్గురుర్మహాదేవో మహానందపరాయణః || 10 ||
జటాధారీ మహావీరో జ్ఞానదేవైరలంకృతః |
వ్యోమగంగాజలస్నాతా సిద్ధసంఘసమర్చితః || 11 ||
తత్త్వమూర్తిర్మహాయోగీ మహాసారస్వతప్రదః |
వ్యోమమూర్తిశ్చ భక్తానామిష్టకామఫలప్రదః || 12 ||
వీరమూర్తిర్విరూపీ చ తేజోమూర్తిరనామయః |
వేదవేదాంగతత్త్వజ్ఞశ్చతుష్షష్టికళానిధిః || 13 ||
భవరోగభయధ్వంసీ భక్తానామభయప్రదః |
నీలగ్రీవో లలాటాక్షో గజచర్మా చ జ్ఞానదః || 14 ||
అరోగీ కామదహనస్తపస్వీ విష్ణువల్లభః |
బ్రహ్మచారీ చ సంన్యాసీ గృహస్థాశ్రమకారణః || 15 ||
దాంతశమవతాం శ్రేష్ఠః సత్త్వరూపదయానిధిః |
యోగపట్టాభిరామశ్చ వీణాధారీ విచేతనః || 16 ||
మంత్రప్రజ్ఞానుగాచారో ముద్రాపుస్తకధారకః |
రాగహిక్కాదిరోగాణాం వినిహంతా సురేశ్వరః || 17 ||
ఇతి శ్రీ దక్షిణామూర్త్యష్టోత్తరశతనామ స్తోత్రం ||