అగణితగుణగణమప్రమేయమాద్యం
సకలజగత్స్థితిసంయమాది హేతుం |
ఉపరతమనోయోగిహృన్మందిరం తం
సతతమహం దక్షిణామూర్తిమీడే || 1 ||
నిరవధిసుఖమిష్టదాతారమీడ్యం
నతజనమనస్తాపభేదైకదక్షం |
భవవిపినదవాగ్నినామధేయం
సతతమహం దక్షిణామూర్తిమీడే || 2 ||
త్రిభువనగురుమాగమైకప్రమాణం
త్రిజగత్కారణసూత్రయోగమాయం |
రవిశతభాస్వరమీహితప్రదానం
సతతమహం దక్షిణామూర్తిమీడే || 3 ||
అవిరతభవభావనాఽతిదూరం
పదపద్మద్వయభావినామదూరం |
భవజలధిసుతారణాంఘ్రిపోతం
సతతమహం దక్షిణామూర్తిమీడే || 4 ||
కృతనిలయమనిశం వటాకమూలే
నిగమశిఖావ్రాతబోధితైకరూపం |
ధృతముద్రాంగుళిగంయచారుబోధం
సతతమహం దక్షిణామూర్తిమీడే || 5 ||
ద్రుహిణసుతపూజితాంఘ్రిపద్మం
పదపద్మానతమోక్షదానదక్షం |
కృతగురుకులవాసయోగిమిత్రం
సతతమహం దక్షిణామూర్తిమీడే || 6 ||
యతివరహృదయే సదా విభాంతం
రతిపతిశతకోటిసుందరాంగమాద్యం |
పరహితనిరతాత్మనాం సుసేవ్యం
సతతమహం దక్షిణామూర్తిమీడే || 7 ||
స్మితధవళవికాసితాననాబ్జం
శ్రుతిసులభం వృషభాధిరూఢగాత్రం |
సితజలజసుశోభిదేహకాంతిం
సతతమహం దక్షిణామూర్తిమీడే || 8 ||
వృషభకృతమిదమిష్టసిద్ధిదం
గురువరదేవసన్నిధౌ పఠేద్యః |
సకలదురితదుఃఖవర్గహానిం
వ్రజతి చిరం జ్ఞానవాన్ శంభులోకం || 9 ||
ఇతి శ్రీవృషభదేవ కృత శ్రీ దక్షిణామూర్త్యష్టకం ||