మధురం మధురేభ్యోఽపి మంగళేభ్యోఽపి మంగళం |
పావనం పావనేభ్యోఽపి హరేర్నామైవ కేవలం || 1 ||
ఆబ్రహ్మస్తంబపర్యంతం సర్వం మాయామయం జగత్ |
సత్యం సత్యం పునః సత్యం హరేర్నామైవ కేవలం || 2 ||
స గురుః స పితా చాపి సా మాతా బాంధవోఽపి సః |
శిక్షయేచ్చేత్సదా స్మర్తుం హరేర్నామైవ కేవలం || 3 ||
నిశ్శ్వాసే న హి విశ్వాసః కదా రుద్ధో భవిష్యతి |
కీర్తనీయమతో బాల్యాద్ధరేర్నామైవ కేవలం || 4 ||
హరిః సదా వసేత్తత్ర యత్ర భాగవతా జనాః |
గాయంతి భక్తిభావేన హరేర్నామైవ కేవలం || 5 ||
అహో దుఃఖం మహాదుఃఖం దుఃఖాత్ దుఃఖతరం యతః |
కాచార్థం విస్మృతం రత్నం హరేర్నామైవ కేవలం || 6 ||
దీయతాం దీయతాం కర్ణే నీయతాం నీయతాం వచః |
గీయతాం గీయతాం నిత్యం హరేర్నామైవ కేవలం || 7 ||
తృణీకృత్య జగత్సర్వం రాజతే సకలోపరి |
చిదానందమయం శుద్ధం హరేర్నామైవ కేవలం || 8 ||