అథ రాత్ర్యాం వ్యతీతాయాం విశ్వామిత్రో మహామునిః |
ఆపృష్ట్వా తౌ చ రాజానౌ జగామోత్తరపర్వతం || 1 ||
ఆశీర్భిః పూరయిత్వా చ కుమారాంశ్చ సరాఘవాన్ |
విశ్వామిత్రే గతే రాజా వైదేహం మిథిలాధిపం || 2 ||
ఆపృష్ట్వాథ జగామాశు రాజా దశరథః పురీం |
గచ్ఛంతం తం తు రాజానమన్వగచ్ఛన్నరాధిపః || 3 ||
అథ రాజా విదేహానాం దదౌ కన్యాధనం బహు |
గవాం శతసహస్రాణి బహూని మిథిలేశ్వరః || 4 ||
కంబలానాం చ ముఖ్యానాం క్షౌమకోట్యంబరాణి చ |
హస్త్యశ్వరథపాదాతం దివ్యరూపం స్వలంకృతం || 5 ||
దదౌ కన్యాపితా తాసాం దాసీదాసమనుత్తమం |
హిరణ్యస్య సువర్ణస్య ముక్తానాం విద్రుమస్య చ || 6 ||
దదౌ పరమసంహృష్టః కన్యాధనమనుత్తమం |
దత్త్వా బహుధనం రాజా సమనుజ్ఞాప్య పార్థివం || 7 ||
ప్రవివేశ స్వనిలయం మిథిలాం మిథిలేశ్వరః |
రాజాప్యయోధ్యాధిపతిః సహ పుత్రైర్మహాత్మభిః || 8 ||
ఋషీన్సర్వాన్పురస్కృత్య జగామ సబలానుగః |
గచ్ఛంతం తం నరవ్యాఘ్రం సర్షిసంఘం సరాఘవం || 9 ||
ఘోరాః స్మ పక్షిణో వాచో వ్యాహరంతి తతస్తతః |
భౌమాశ్చైవ మృగాః సర్వే గచ్ఛంతి స్మ ప్రదక్షిణం || 10 ||
తాన్దృష్ట్వా రాజశార్దూలో వసిష్ఠం పర్యపృచ్ఛత |
అసౌంయాః పక్షిణో ఘోరా మృగాశ్చాపి ప్రదక్షిణాః || 11 ||
కిమిదం హృదయోత్కంపి మనో మమ విషీదతి |
రాజ్ఞో దశరథస్యైతచ్ఛ్రుత్వా వాక్యం మహానృషిః || 12 ||
ఉవాచ మధురాం వాణీం శ్రూయతామస్య యత్ఫలం |
ఉపస్థితం భయం ఘోరం దివ్యం పక్షిముఖాచ్చ్యుతం || 13 ||
మృగాః ప్రశమయంత్యేతే సంతాపస్త్యజ్యతామయం |
తేషాం సంవదతాం తత్ర వాయుః ప్రాదుర్బభూవ హ || 14 ||
కంపయన్మేదినీం సర్వాం పాతయంశ్చ మహాద్రుమాన్ |
తమసా సంవృతః సూర్యః సర్వా న ప్రబభుర్దిశః || 15 ||
భస్మనా చావృతం సర్వం సంమూఢమివ తద్బలం |
వసిష్ఠశ్చర్షయశ్చాన్యే రాజా చ ససుతస్తదా || 16 ||
ససంజ్ఞా ఇవ తత్రాసన్సర్వమన్యద్విచేతనం |
తస్మింస్తమసి ఘోరే తు భస్మచ్ఛన్నేవ సా చమూః || 17 ||
దదర్శ భీమసంకాశం జటామండలధారిణం |
భార్గవం జామదగ్న్యం తం రాజారాజవిమర్దినం || 18 ||
కైలాసమివ దుర్ధర్షం కాలాగ్నిమివ దుఃసహం |
జ్వలంతమివ తేజోభిర్దుర్నిరీక్ష్యం పృథగ్జనైః || 19 ||
స్కంధే చాసాద్య పరశుం ధనుర్విద్యుద్గణోపమం |
ప్రగృహ్య శరముఖ్యం చ త్రిపురఘ్నం యథా శివం || 20 ||
తం దృష్ట్వా భీమసంకాశం జ్వలంతమివ పావకం |
వసిష్ఠప్రముఖాః సర్వే జపహోమపరాయణాః || 21 ||
సంగతా మునయః సర్వే సంజజల్పురథో మిథః |
కచ్చిత్పితృవధామర్షీ క్షత్రం నోత్సాదయిష్యతి || 22 ||
పూర్వం క్షత్రవధం కృత్వా గతమన్యుర్గతజ్వరః |
క్షత్రస్యోత్సాదనం భూయో న ఖల్వస్య చికీర్షితం || 23 ||
ఏవముక్త్వార్ఘ్యమాదాయ భార్గవం భీమదర్శనం |
ఋషయో రామరామేతి వచో మధురమబ్రువన్ || 24 ||
ప్రతిగృహ్య తు తాం పూజామృషిదత్తాం ప్రతాపవాన్ |
రామం దాశరథిం రామో జామదగ్న్యోఽభ్యభాషత || 25 ||
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాండే చతుఃసప్తతితమః సర్గః || 74 ||
Balakanda Sarga 74 pdf download – బాలకాండ చతుఃసప్తతితమః సర్గః (74)
Author
Pavan Teja
పవన్ తేజ రచయితగా సినిమాలు, రాజకీయం, ఆరోగ్యం, వ్యాయామం, అందం, ధర్మం, విజ్ఞాన శాస్త్రం, సాంకేతికత, డబ్బు సంపాదించే మార్గాలు, ఆంగ్లం నుండి తెలుగు అనువాదం మొదలైన అంశాలలో అనుభవం పొందాడు. అతను గతంలో తెలుగు సినిమా విశ్లేషకుడిగా పని చేశాడు. ప్రస్తుతం అసిస్టెంట్ డైరెక్టర్ గా పనిచేస్తున్నాడు.
