శ్రీశంభో మయి కరుణాశిశిరాం దృష్టిం దిశన్ సుధావృష్టిం |
సంతాపమపాకురు మే మంతా పరమేశ తవ దయాయాః స్యాం || 1 ||
అవసీదామి యదార్తిభిరనుగుణమిదమోకసోఽంహసాం ఖలు మే |
తవ సన్నవసీదామి యదంతకశాసన న తత్తవానుగుణం || 2 ||
దేవ స్మరంతి తవ యే తేషాం స్మరతోఽపి నార్తిరితి కీర్తిం |
కలయసి శివ పాహీతి క్రందన్ సీదాంయహం కిముచితమిదం || 3 ||
ఆదిశ్యాఘకృతౌ మామంతర్యామిన్నసావఘాత్మేతి |
ఆర్తిషు మజ్జయసే మాం కిం బ్రూయాం తవ కృపైకపాత్రమహం || 4 ||
మందాగ్రణీరహం తవ మయి కరుణాం ఘటయితుం విభో నాలం |
ఆక్రష్టుం తాంతు బలాదలమిహ మద్దైన్యమితి సమాశ్వసిమి || 5 ||
త్వం సర్వజ్ఞోఽహం పునరజ్ఞోఽనీశోఽహమీశ్వరస్త్వమసి |
త్వం మయి దోషాన్ గణయసి కిం కథయే తుదతి కిం దయా న త్వాం || 6 ||
ఆశ్రితమార్తతరం మాముపేక్షసే కిమితి శివ న కిం దయసే |
శ్రితగోప్తా దీనార్తిహృదితి ఖలు శంసంతి జగతి సంతస్త్వాం || 7 ||
ప్రహరాహరేతి వాదీ ఫణితమదాఖ్య ఇతి పాలితో భవతా |
శివ పాహీతి వదోఽహం శ్రితో న కిం త్వాం కథం న పాల్యస్తే || 8 ||
శరణం వ్రజ శివమార్తీః స తవ హరేదితి సతాం గిరాఽహం త్వాం |
శరణం గతోఽస్మి పాలయ ఖలమపి తేష్వీశ పక్షపాతాన్మాం || 9 ||
ఇతి శ్రీశ్రీధరవేంకటేశార్యకృతం ఆర్తిహరస్తోత్రం |