జ్వర ఉవాచ |
నమామి త్వానంతశక్తిం పరేశం
సర్వాత్మానం కేవలం జ్ఞప్తిమాత్రం |
విశ్వోత్పత్తిస్థానసంరోధహేతుం
యత్తద్బ్రహ్మ బ్రహ్మలింగం ప్రశాంతం || 1 ||
కాలో దైవం కర్మ జీవః స్వభావో
ద్రవ్యం క్షేత్రం ప్రాణ ఆత్మా వికారః |
తత్సంఘాతో బీజరోహప్రవాహ-
-స్త్వన్మాయైషా తన్నిషేధం ప్రపద్యే || 2 ||
నానాభావైర్లీలయైవోపపన్నై-
-ర్దేవాన్ సాధూన్ లోకసేతూన్ బిభర్షి |
హంస్యున్మార్గాన్ హింసయా వర్తమానాన్
జన్మైతత్తే భారహారాయ భూమేః || 3 ||
తప్తోఽహం తే తేజసా దుఃసహేన
శాంతోగ్రేణాత్యుల్బణేన జ్వరేణ |
తావత్తాపో దేహినాం తేఽంఘ్రిమూలం
నో సేవేరన్ యావదాశానుబద్ధాః || 4 ||
శ్రీభగవానువాచ |
త్రిశిరస్తే ప్రసన్నోఽస్మి వ్యేతు తే మజ్జ్వరాద్భయం |
యో నౌ స్మరతి సంవాదం తస్య త్వన్న భవేద్భయం || 5 ||
ఇతి శ్రీమద్భాగవతే దశమస్కంధే త్రిషష్టితమోఽధ్యాయే జ్వరస్తుతిర్నామ శ్రీ కృష్ణ స్తోత్రం |