Nirguna manasa puja pdf download – నిర్గుణ మానస పూజా

శిష్య ఉవాచ –
అఖండే సచ్చిదానందే నిర్వికల్పైకరూపిణి |
స్థితేఽద్వితీయభావేఽపి కథం పూజా విధీయతే || 1 ||
పూర్ణస్యావాహనం కుత్ర సర్వాధారస్య చాసనం |
స్వచ్ఛస్య పాద్యమర్ఘ్యం చ శుద్ధస్యాచమనం కుతః || 2 ||
నిర్మలస్య కుతః స్నానం వాసో విశ్వోదరస్య చ |
అగోత్రస్య త్వవర్ణస్య కుతస్తస్యోపవీతకం || 3 ||
నిర్లేపస్య కుతో గంధః పుష్పం నిర్వాసనస్య చ |
నిర్విశేషస్య కా భూషా కోఽలంకారో నిరాకృతేః || 4 ||
నిరంజనస్య కిం ధూపైర్దీపైర్వా సర్వసాక్షిణః |
నిజానందైకతృప్తస్య నైవేద్యం కిం భవేదిహ || 5 ||
విశ్వానందయితుస్తస్య కిం తాంబూలం ప్రకల్పతే |
స్వయంప్రకాశచిద్రూపో యోఽసావర్కాదిభాసకః || 6 ||
గీయతే శ్రుతిభిస్తస్య నీరాజనవిధిః కుతః |
ప్రదక్షిణమనంతస్య ప్రణామోఽద్వయవస్తునః || 7 ||
వేదవాచామవేద్యస్య కిం వా స్తోత్రం విధీయతే |
అంతర్బహిః సంస్థితస్య ఉద్వాసనవిధిః కుతః || 8 ||
శ్రీ గురురువాచ –
ఆరాధయామి మణిసంనిభమాత్మలింగం
మాయాపురీహృదయపంకజసంనివిష్టం |
శ్రద్ధానదీవిమలచిత్తజలాభిషేకై-
ర్నిత్యం సమాధికుసుమైర్నపునర్భవాయ || 9 ||
అయమేకోఽవశిష్టోఽస్మీత్యేవమావాహయేచ్ఛివం |
ఆసనం కల్పయేత్పశ్చాత్స్వప్రతిష్ఠాత్మచింతనం || 10 ||
పుణ్యపాపరజఃసంగో మమ నాస్తీతి వేదనం |
పాద్యం సమర్పయేద్విద్వన్సర్వకల్మషనాశనం || 11 ||
అనాదికల్పవిధృతమూలాజ్ఞానజలాంజలిం |
విసృజేదాత్మలింగస్య తదేవార్ఘ్యసమర్పణం || 12 ||
బ్రహ్మానందాబ్ధికల్లోలకణకోట్యంశలేశకం |
పిబంతీంద్రాదయ ఇతి ధ్యానమాచమనం మతం || 13 ||
బ్రహ్మానందజలేనైవ లోకాః సర్వే పరిప్లుతాః |
అచ్ఛేద్యోఽయమితి ధ్యానమభిషేచనమాత్మనః || 14 ||
నిరావరణచైతన్యం ప్రకాశోఽస్మీతి చింతనం |
ఆత్మలింగస్య సద్వస్త్రమిత్యేవం చింతయేన్మునిః || 15 ||
త్రిగుణాత్మాశేషలోకమాలికాసూత్రమస్ంయహం |
ఇతి నిశ్చయమేవాత్ర హ్యుపవీతం పరం మతం || 16 ||
అనేకవాసనామిశ్రప్రపంచోఽయం ధృతో మయా |
నాన్యేనేత్యనుసంధానమాత్మనశ్చందనం భవేత్ || 17 ||
రజఃసత్త్వతమోవృత్తిత్యాగరూపైస్తిలాక్షతైః |
ఆత్మలింగం యజేన్నిత్యం జీవన్ముక్తిప్రసిద్ధయే || 18 ||
ఈశ్వరో గురురాత్మేతి భేదత్రయవివర్జితైః |
బిల్వపత్రైరద్వితీయైరాత్మలింగం యజేచ్ఛివం || 19 ||
సమస్తవాసనాత్యాగం ధూపం తస్య విచింతయేత్ |
జ్యోతిర్మయాత్మవిజ్ఞానం దీపం సందర్శయేద్బుధః || 20 ||
నైవేద్యమాత్మలింగస్య బ్రహ్మాండాఖ్యం మహోదనం |
పిబానందరసం స్వాదు మృత్యురస్యోపసేచనం || 21 ||
అజ్ఞానోచ్ఛిష్టకరస్య క్షాలనం జ్ఞానవారిణా |
విశుద్ధస్యాత్మలింగస్య హస్తప్రక్షాలనం స్మరేత్ || 22 ||
రాగాదిగుణశూన్యస్య శివస్య పరమాత్మనః |
సరాగవిషయాభ్యాసత్యాగస్తాంబూలచర్వణం || 23 ||
అజ్ఞానధ్వాంతవిధ్వంసప్రచండమతిభాస్కరం |
ఆత్మనో బ్రహ్మతాజ్ఞానం నీరాజనమిహాత్మనః || 24 ||
వివిధబ్రహ్మసందృష్టిర్మాలికాభిరలంకృతం |
పూర్ణానందాత్మతాదృష్టిం పుష్పాంజలిమనుస్మరేత్ || 25 ||
పరిభ్రమంతి బ్రహ్మాండసహస్రాణి మయీశ్వరే |
కూటస్థాచలరూపోఽహమితి ధ్యానం ప్రదక్షిణం || 26 ||
విశ్వవంద్యోఽహమేవాస్మి నాస్తి వంద్యో మదన్యతః |
ఇత్యాలోచనమేవాత్ర స్వాత్మలింగస్య వందనం || 27 ||
ఆత్మనః సత్క్రియా ప్రోక్తా కర్తవ్యాభావభావనా |
నామరూపవ్యతీతాత్మచింతనం నామకీర్తనం || 28 ||
శ్రవణం తస్య దేవస్య శ్రోతవ్యాభావచింతనం |
మననం త్వాత్మలింగస్య మంతవ్యాభావచింతనం || 29 ||
ధ్యాతవ్యాభావవిజ్ఞానం నిదిధ్యాసనమాత్మనః |
సమస్తభ్రాంతివిక్షేపరాహిత్యేనాత్మనిష్ఠతా || 30 ||
సమాధిరాత్మనో నామ నాన్యచ్చిత్తస్య విభ్రమః |
తత్రైవ బహ్మణి సదా చిత్తవిశ్రాంతిరిష్యతే || 31 ||
ఏవం వేదాంతకల్పోక్తస్వాత్మలింగప్రపూజనం |
కుర్వన్నా మరణం వాపి క్షణం వా సుసమాహితః || 32 ||
సర్వదుర్వాసనాజాలం పదపాంసుమివ త్యజేత్ |
విధూయాజ్ఞానదుఃఖౌఘం మోక్షానందం సమశ్నుతే || 33 ||