సావిత్ర్యువాచ |
తపసా ధర్మమారాధ్య పుష్కరే భాస్కరః పురా |
ధర్మం సూర్యఃసుతం ప్రాప ధర్మరాజం నమాంయహం || 1 ||
సమతా సర్వభూతేషు యస్య సర్వస్య సాక్షిణః |
అతో యన్నామ శమనమితి తం ప్రణమాంయహం || 2 ||
యేనాన్తశ్చ కృతో విశ్వే సర్వేషాం జీవినాం పరం |
కామానురూపం కాలేన తం కృతాన్తం నమాంయహం || 3 ||
బిభర్తి దండం దండాయ పాపినాం శుద్ధిహేతవే |
నమామి తం దండధరం యః శాస్తా సర్వజీవినాం || 4 ||
విశ్వం చ కలయత్యేవ యః సర్వేషు చ సంతతం |
అతీవ దుర్నివార్యం చ తం కాలం ప్రణమాంయహం || 5 ||
తపస్వీ బ్రహ్మనిష్ఠో యః సంయమీ సంజితేంద్రియః |
జీవానాం కర్మఫలదస్తం యమం ప్రణమాంయహం || 6 ||
స్వాత్మారామశ్చ సర్వజ్ఞో మిత్రం పుణ్యకృతాం భవేత్ |
పాపినాం క్లేశదో యస్తం పుణ్యమిత్రం నమాంయహం || 7 ||
యజ్జన్మ బ్రహ్మణోంఽశేన జ్వలన్తం బ్రహ్మతేజసా |
యో ధ్యాయతి పరం బ్రహ్మ తమీశం ప్రణమాంయహం || 8 ||
ఇత్యుక్త్వా సా చ సావిత్రీ ప్రణనామ యమం మునే |
యమస్తాం శక్తిభజనం కర్మపాకమువాచ హ || 9 ||
ఇదం యమష్టకం నిత్యం ప్రాతరుత్థాయ యః పఠేత్ |
యమాత్తస్య భయం నాస్తి సర్వపాపాత్ప్రముచ్యతే || 10 ||
మహాపాపీ యది పఠేన్నిత్యం భక్తిసమన్వితః |
యమః కరోతి సంశుద్ధం కాయవ్యూహేన నిశ్చితం || 11 ||
ఇతి శ్రీమద్దేవీభాగవతే మహాపురాణే నవమస్కంధే ఏకత్రింశోఽధ్యాయః |